IIMU/UUNGW 11 - Biblía Axweesantá Hhohho' ar Mungú 2004

Doó gáwtí tleér oo yaamaá Babuloni

¹ De'emuudae yaamu sleémeero tsifrír tar axweesi a wak, nee axweesantaín a wak.

² Alaá muu iwa bihhaá da/aáw wa tláy, xatsa kana ár baraá yaamaá Shinari. Tay amoodá' wa hoót.

³ Mukdá' tari al'axweés, tari oó', «Gimsé', matofaáli a tleehhaán, kari da/aán.» Ala inooín gár ta kon a matofaáli kitángw tlaa/eewo nee laámi kitángw busluwo.

⁴ Tari oó', «Gimsé', gixsarén a tleehhaán, nee baraá gixsarihe doó tleér u tleehhaán, oo tsitsinirós gawaá doorí hardah, nee tawa iiatleeruwaan, as mawa diya/ataán baraá yaamu sleémeero.»

⁵ AAKOÓ MUNGÚ nay aweér baraá yaamu as gixsa nee tsitsini ngiwa ari, tidá' taa tleéhh nee muu.

⁶ AAKOÓ MUNGÚ iri oó', «Ga/aaweek, mukwí a wak, nee inooín sleeme tsifrir'ín a wak, slám gaarí an sangw iimu/úngw gár ta tlehhemuú slai. Nee daxta umuúqo gár ta tlehhemuú wa slai ar gir baa/ i káhh.

⁷ Qwalaasé', a aweeraán yaamu, tsifrir'ín a qasmisaán, kahhó' heé axweesantá kuqá' ga tsaáhh i kaahh.»

⁸ AAKOÓ MUNGÚ inooín giri diyayaá/ gawaá daanduú yaamu sleémeero amór yaamaá sawen, gixsadá' tleehhamooro ngiri mayé'.

⁹ Gawaá adoorihe umuú gixsadá' kuri báy Babuloni, asma didá' an dír Mungú tsifrír yaamu sleémeero ngiwa qasmiís. Nee iimír didae AAKOÓ MUNGÚ muu guri diyayaá/ gawaá daanduú yaamu sleémeero.

Xwaylár Shemu

¹⁰ Kuká' an xwaylár Shemu. Shemu kureeriiwós tawa tsiiru, Arpakshadi guri laqwaál, kureeraá tsár alaá tluwoó da/tene.

¹¹ Shemu iri hoót kureeraá tsiire kooán alaá Arpakshadi nguwa laqwaál, na/aá hatlá' awa daaqaay nee dasu giri laqwaál.

¹² Arpakshadi kureeriiwós tawa mibeeri tám nee kooán, Shela guri laqwaál.

¹³ Arpakshadi alaá Shela nguwa laqwaál, kureeri ngaa hoót a tsiire tsiyáhh nee tám, na/aá hatlá' awa daaqaay nee dasu giri laqwaál.

¹⁴ Shela kureeriiwós tawa mibeeri tám, Eberi guri laqwaál.

¹⁵ Shela alaá Eberi nguwa laqwaál, kureeri ngaa hoót a tsiire tsiyáhh nee tám, na/aá hatlá' awa daaqaay nee dasu giri laqwaál.

¹⁶ Eberi kureeriiwós tawa mibeeri tám nee tsiyáhh, Pelegi guri laqwaál.

¹⁷ Eberi alaá Pelegi nguwa laqwaál, kureeri ngaa hoót a tsiire tsiyáhh nee mibeeri tám, na/aá hatlá' awa daaqaay nee dasu giri laqwaál.

¹⁸ Pelegi kureeriiwós tawa mibeeri tám, Reu guri laqwaál.

¹⁹ Pelegi alaá Reu nguwa laqwaál, kureeri ngaa hoót a tsiire tsár nee gwaleél, na/aá hatlá' awa daaqaay nee dasu giri laqwaál.

²⁰ Reu kureeriiwós tawa mibeeri tám nee tsár, Serugi guri laqwaál.

²¹ Reu alaá Serugi nguwa laqwaál, kureeri ngaa hoót a tsiire tsár nee faanqw, na/aá hatlá' awa daaqaay nee dasu giri laqwaál.

²² Serugi kureeriiwós tawa mibeeri tám, Nahori guri laqwaál.

²³ Serugi alaá Nahori nguwa laqwaál, kureeri ngaa hoót a tsiire tsár, na/aá hatlá' awa daaqaay nee dasu giri laqwaál.

²⁴ Nahori kureeriiwós tawa mibeeri tsár nee gwaleél, Tera guri laqwaál.

²⁵ Nahori alaá Tera nguwa laqwaál, kureeri ngaa hoót a tsiiru nee mibaá nee gwaleél, na/aá hatlá' awa daaqaay nee dasu giri laqwaál.

²⁶ Tera kureeriiwós tawa mibeeri faanqw, Abramu nee Nahori nee Harani giri laqwaál.

Xwaylár Tera

²⁷ Kuká' an xwaylár Tera. Tera an baabuú Abramu, nee Nahori nee Harani. Harani Loti guri laqwaál.

²⁸ Harani iri gwaá' baraá gixsár Uri ar baraá yaamaá Kaldayo, didá' kuwa laqwaál. Inós gwa'araaro ina giirín dír baabuúwós Terawo.

²⁹ Abramu nee Nahori tari duuxuuxún. Harér Abramu umuuwós a Sarai, nee ar Nahori umuuwós a Milka, dasír Harani. Harani an baabuú Iska sleeme.

³⁰ Sarai a kampeeri, inós na/aay gwa sleeriiká.

³¹ Tera Abramu garmaawós gurir tláy, nee Loti garmoó naangós, na/oó Harani, nee Sarai harér garmaawós Abramu. Inooín nina altlayé' iimír gixsár Uri wa alé ar baraá yaamaá Kaldayo as tawa yaamaá Kana'anír kay. Ala tawa hardáh yaamaá Harani, tana baraadá' wa hoót.

³² Tera ina gwaá' baraá yaamaá Harani kureeriiwós tawa tsiire tsár nee kooán.