HOSEA 9 - Biblía Axweesantá Hhohho' ar Mungú 2004

Hosea i sakwasleemár Israeli alki/iit

¹ Ma qwalaala/aara' aá múk Israeli! Ma adór múk xoordaá hatlá' wa qwalaala/aara'. Asma adoosíng kuungá' AAKOÓ MUNGÚ kuwa sié' ana daté' baraá fuqi. Slaasláwár fuqi kari ilatleerusé' umuúqo dír tawa balángw slahhana.

² Ala angaánoosíng tundur bu'un, nee darama'aá difaáiro, nu buiiaaká /aymisiro. Tam difaáír /aben sleeme a sleera'aaká.

³ Múk Israeli i baraá yaamaá AAKOÓ MUNGÚ i meetiiká. Ala tan kii/ baraá yaamaá Misri. Inooín nee múk Ashuru muruú /aymár ta waki kuri al/aay.

⁴ Ilahhooár difaái ka sangw dír AAKOÓ MUNGÚ i hanisiiká, tam ngu sangw qwal/atisiiaaká ar ilahhooár muruú ta tsu/i. Ilahhooaar'ín ar muruú ta tsui tari adór mikaátér múk tsuunqumiís. Umuúqo heé gaa /ayi kwaa meetagaás. Asma mikaáter'ín tidá' gár iwa hariin a har qwarkuín gun tse'eemís, i harindaaká kawa baraá doó AAKOÓ MUNGÚ i huwi.

⁵ Bál deeloodá' ur ar AAKOÓ MUNGÚ adór ta laqa', tidá' taa amohhe'eés laqaá baalaadár muruú /aymár AAKOÓ MUNGÚHE.

⁶ Asma ga/aawaak, qwanayhúng un ilagobá' tunduri ilaoh nee múk Misri, ala /antaá Memfisi nu daamaraná'. Daqaari'iimarhúng ar peésa sla/a ngi alti'ít, nee marayhúng laqaya' ngi alti'iitiyá'.

⁷ Deelór nuwa muux naa xeér. Deelór li/aay nguwa buu' naa hardát. Múk Israeli gari xuxuu' qoomaadae, kuungásingá' kaahá', ‹Aarusmo a daktani! Heé ta geeraharahari nee qeeruú Mungú a slarhhamá!› Adoorí an katá' asma tlakweemaahúng naa tlahhiyé' nee aahhirhúng ar tlakw aa tláhh sleeme daanduueene.

⁸ Anuú aarusmo a xuumusmoó múk Israeli, múk Munguúeé', ala umuúqo amór i kay'a kaa tsaaxweelírí qaás, tam baraá doó Munguine inooín ki slaiiká.

⁹ Kuungá' aga faakamisé' tlakweema tlehhtuuwo, adoodá' aáng aa tleehharut baraá Gibearo. Mungú dakuúsar'ín gan inslasláy nee giri muux as tlakweemaaín.

Tlakweemaá Israeli nee bu'utuuín

¹⁰ Aníng múk Israeli nguwa sláw, a adór sabiíbuú darma. Taati'iihúng ngiwa ár ki afhhamít adór mamaá /aantsí awa har geera. Ala tawa hardáh Ba'al-peori, tiri paraatliyé' dir'eene as Ba'ali nguwa sluufmisiya'. Aníng inooín ina aáhh adór Ba'alír ale, kudá' i slaiya'.

¹¹ Xirfuú múk Israeli i adór tsir/ír wa tláy iri sawees. Na/ii ki laqwaliiká, /ameenír tsiiháy i kaáhh, laqaá tam /ameenír tsih i káhh.

¹² Tam bir na/ii'ín umina'a, aníng na/ii'ín i slafíngwí geexawaaká tam oo wák. A tsaxwaaín bál bira kilooín geexáw.

¹³ Aáng Israeli nguwa ár a adór slaanslír taa dahaás dír hhapér hho'. Ala hamí Israeli na/iiwós gi haniis dír kiwa tsu/i.

¹⁴ AAKOÓ MUNGÚ mukwí slahheek, hamí gár kir slahh a milá? /Ameenar'ín gur'e ngi kwakwahh nee iseemaaín i /one'.

Sakwasleemár Mungú dír múk Israeli

¹⁵ Tlakweemaín sleémeero dír ni dahhiya' a Gilgali, asma amorqá' an amór ngiwa geerií aáhh. Aníng inooín i guús baraá dooeene, asma tlehhmi'ii'ín awa tlakw Aníng inooín i malé sla'aaká, geeraharuuser'ín sleémeero aa dee/aanuumít.

¹⁶ Múk Israeli kwaa muúx, dee/aruín aa káh, mamu ngi laqwaliaaká. Tam na/ii ngi laqwaalia, aníng na/ii'ín kudá' i sla'aa'ana' in tsuú/.

Axweesantá aarusmo daanduú xoorór Israeli

¹⁷ Munguúeé' gin amór saáw i kwaahh, asma ngwa mayé' iiárií qaasaro. Inooín tay múk tawó tambeeruús baraá xoorduú wa alé.