HOSEA 8 - Biblía Axweesantá Hhohho' ar Mungú 2004

Tlakweemaá uren awa xoorór Israeli

¹ Tarumbeéta ufahhaak! Asma wakusmo i adór gwareesír wá haraatláy amór doó AAKOÓ MUNGÚ, asma alqador'eé' ngaa mayé' nee hara'ayar'eé' ngaa aahhiyé'.

² Múk Israeli ta amor'eé' /aa/, tawa ooi, «Munguúrén, ataá múk Israeli kuúng u xuaán.»

³ Xoorór Israeli hhooeema gaa sí', as adoorí inooín wakuuse gi alkoón.

⁴ Waawitaáín nguwa tsawaariyé' ala aníng iga yaahasi'iiká, múk urén ngwaa qaminé', ala aníng u xuaaká. Munguúín nguna tleehhiyé' ar peésa nee sahaábu as kahhó' niwa hhana'.

⁵ Aá múk Samaria, Munguúhúng kuduú dama ugwa sií', aníng aga qa/iít buhhtaawo as kuungá', tlakweema tlehhtuuwo ta kumaamita' ay xaylá.

⁶ Asma baraá Israeliwo múk dakór baál i deer, inooín dama ngina tleehhiyé' ala a munguheeká baloó ale. Ala damarír Samaria ka suwawaa'.

⁷ Asma inooín gár ta dahamiisi a fur'a, inooín gár ta bu'un a bambaao. Hhaansli i balaalír koondaaká, balangw'ín i wa'amír konká, sleeme i puuruú konká. Ala tim i laqwaali, a dahaaye gun /ák.

⁸ Xoorór Israeli kaa guú/, hamí ta baraá tla/ángw xoordaá hatlá' adór xooslmoó ado wásl.

⁹ Inooín nina tlayé' ay Ashuru a slaqás nee daqoó kopoormo oo baraá darmuú wa kilós hi'iimiít. Múk Israeli mulqer'ín ar /ameena ngaa tlaxwiyé'.

¹⁰ Tam mulqe ngaa tlaxwi'i baraá xoordaá hatlá' wa ale, ala aníng in haraki/ís ar wa'aá wák. Inooín ki al'iilooúy qoomár niinawe, nee waawutmoodá' úr taa iimbalaáx ar di/i nee geeraharuusero.

¹¹ Asma múk Israeli kiteeraá yaariir awa ilahhooa kawa hanmiisi kina tleéhh as tlakweema tlehhit. Tiri didaádá' i dogiitiyá' as tlakweema tlehhit.

¹² Aníng tam hara'ayár kumér mibaangw a amor'ín i gooima, ala inooín kan harafaar adór gár xuaawasl.

¹³ Inooín ilahhooár muruú ta tsu/i hanmisuuwo ngi slaiyá', nee fu'unaydá' kiri /aay. Ala AAKOÓ MUNGÚ ku baloó sla'atimisiiká nee inooín. Aníng hamí tlakweemaaín kuká' in insláw ngiri muúx as tlakweemaaín kuká', ngiri ki/ís baraá lawaali'iimár yaamaá Misri.

¹⁴ Asma múk Israeli tleehharusmooín kwaa gunqareés. Inooín maraá waawutmo kiri tleéhh. Nee múk Yuda gixsadaá yaariir awa koo/i gawden ngiri tleehhiyé', ala aníng asla an kwaáhh baraá gixsaduuwós. Asltí ko/uuwós kudá' gawden giri tukuúr.