HOSEA 7 - Biblía Axweesantá Hhohho' ar Mungú 2004

¹ Qoomár bar múk Israeli u ba/amisár wa slaá', tlakweemaaín kingin geehhoees, nee tlehhma'aá tlakw awa Samaria kingin laqán, asma tin kilooín al/aginá', nee in fisisiná', tan darah baraá maraá muu tan fisiisín, nee amoqár tsee/aawo malguuse i muruú múk hayohiín ar /uuru.

² Inooín tam tsaahhár niiná ngi kon'aaká, adór aníng tlakweemaaín ngir xuú', ala inooín kaa nagwaáhh nee tlakweemaaín badu sleémeero, tlakweemaaín sleémeero aníng i ga/áw.

Geewaqaqatíngw baraá doó waawutmo

³ Waawutmo ngun qwal/amisiyá' ar tlakweemaaín, nee muk'ín oo urén ar foluuín.

⁴ Inooín sleémeero a fuquuse, a adór asltá taa slaáx nee huuruso'o, iri puuruú lufuu/ár eér, asla gari meér gutlhhuungo ay dír puuruúdá' i sluufi.

⁵ Baraá deelór ur ar waawutmoowo múk urén kuri xufiitimiís iri baa/umiit oonitameero, waawutmo nee niquuse tari dinku'umiís.

⁶ Asma gur'er'ín asla gay al'ót, da/tá adór bohóngw asla xweera sleémeero nin qa/imamitiyá' buhhtaawo. Matlaatleero buhhta naa oohiriyé' adór tsángw asltá wa ale.

⁷ Sleémeero naa da/atuutuyé' buhhtaawo adór layu, geeraharuuser'ín nga haleleiyé'. Waawitaáín sleémeero aa huuhu'ún, baraá tla/angw'ine tam heé wák oo i fiririím i kaahh.

Israeli nee xoordaá hatlá'

⁸ Múk Israeli aa haragwaá' amór múk xoordaá hatlá'. Inooín a adór mukatmoó taa warqeesiiká.

⁹ Dahaaye gwaa /uuru fák, ala inós gár i xui i káhh. Sagós al/awtani gwaa gás, ala inós gár i xui i káhh.

¹⁰ Daara/ángw múk Israeli ku geehhoó'. Ala tam adoorihe inooín taa ki/iiká amór AAKOÓ MUNGÚ, Munguúín. Tam sleeme ngwa leelehhi'iiká baraá muruuwí sleémeero.

¹¹ Múk Israeli a adór hhooki, ar daktani nee fuqurángw koomaaká. Motsuuwo tan múk Misrír firór aa'áy, ta beer iqo amór múk Ashurúr kakayá'.

¹² Birnda tlayé' aníng in tsaxweelírí qaás as ngiwa ohiim, in gawtá wa /arara/aás adór tsir/ór wa ale, in muúx as tlehhmi'ii'ín kudá' tlakw.

¹³ A tsaxwaaín! Asma naa aníng wa gowiyé', alók in hhaná'! Asma aníng iga si'iyé'. Aníng inooín in mak ba/amisár wa slaá', ala inooín aníng i lámtí tlaaqiyá'.

¹⁴ Aníng i firirina'aaká ar muunuú ló', qoomár niwa gawaá qateenoín wa /a/amina'. Gár naa i burumburitiyé' a balaangw nee difaái, aníng iga aahhiyé'.

¹⁵ Handá' tam iga ale/iisi /uuru ngway slayé', tam adoorihe muruú tlákw ngwa ístií tsatiyé' nguwa aníngií tlehhiitiya'.

¹⁶ Inooín i mak kiki/iyá', ala a amór Munguú gáwtí diriaaká. Inooín a adór ga/alér waslarmoowós aa slakwekwe'eet. Muk'ín oo urén ku daasl ar paánga, asma afa kaharemaaín. Inooín kiri niqín baraá yaamaá Misriro.