HOSEA 6 - Biblía Axweesantá Hhohho' ar Mungú 2004

Hhu'u'úngw lama

¹ Qwalaasé', a amór AAKOÓ MUNGÚ i ki/aán, inós atén tina karslamiís nee inós atén tin hungu/uus, inós tina tlaqamiís, nee inós inkahhi'iirén ngin tseek.

² Alaá deelo tsare atén ti malé slafis, bál tame atén tin waslee/atis, as kahhó' nee inós tawa alhootaan.

³ Atén AAKOÓ MUNGÚ ku xuaán nee ta kumiitaán kuwa xuaan, hardahamuuwós i pa/iiká adór matlaatle. Inós tin adór tluwáy wá i hardah, adór tluwoó laweei yaamu ngir i tlubaabin.

⁴ Israéli, aníng kuúng adór u laaq? Yúda, aníng kuúng adór u laaq? Asma sla'aarirhúng a adór tlaangír matlaatle, nee adór hara'uú tseewa huú'.

⁵ Gawaá adoorihe án kuungá' naa tlaáq ar afér aaruuse, nuna tsuú/ ar axweesantá afkueé', sakwasleemar'eé' i gaansliín adór gwa/aateema.

⁶ Aníng ilahhooár muruú ta tsu/i a sla'aaká, ala gár ni slaa' a sla'aarír warqawaaká, aníng ilahhooár da/a/aangw a sla'aaká, ala a Mungú kuwa xui.

⁷ Ala inooín alqado ngaa mayé', adoodá' naa tleehhiyé' amór yaamuudá' ta bay Adam wa alé, slám inooín naa iia wasleesiyé' dir'eene.

⁸ Gileadi a gixsár múk muruú tlákw tlehhahhiít, kaa tseerdúr sliík.

⁹ Adoodá' fisuuse muu ngur gigdaadiin, an adoodá' daqtá kaahamuuse muu ngur gigdaadiin baraá loohír Shekemuro. Ar ló' tlakweemaá ur ngaa tleehhiyé'.

¹⁰ Baraá doó Israeliwo gár ni waak aga ár. Fuqi ana ár dír múk Israeli, nee inooín sleeme tiri kilooín slasla/areesiyé'.

¹¹ Kuungaá múk Yuda, qoomár bu'uungw aga qoomeés, qoomár bar muk'eé' kudá' taa tsegiít ngwaa ki/ís.