HOSEA 5 - Biblía Axweesantá Hhohho' ar Mungú 2004

¹ Tí iiárií qaasaak, kuungá' kaahamuusér Mungú! Iia qaasaak, kuungá' múk Israeli! Iia qaasaak, múk doó waawutmo, asma kwasleemarí i kuungá' wa hariín. Asma kuungá' aga tsaaxweeli tleehhité' baraá Misparo, nee xotloompír taa qaás daanduú tloomár Tabori.

² Kuungá' baa'ár saaw aga folé' baraá Shitimu, ala aníng kuungá' sleémeero nu muúx.

³ Aníng múk Efraimu u xuú', tam múk Israeli dir'eene aa nahhaatiiká. Asma daxta kuungá' múk Efraimu a fuqusá', as adoorí inooín kaa meetagaás.

Naanaqtá Hosea daanduú munguaá hatlá' kiwa sluufmiisi

⁴ Mukwí kwaa ilaá/ nee tlehhmi'ii'ín as kahhó' matawa kií/ amór Munguúín. Asma inslawoo fuqi aa haáts baraaine, tam AAKOÓ MUNGÚ ngu xuiaaká.

⁵ Nee daara/ángw múk Israeli ku geehhoó'. Gawaá adoorihe inooín ta dukuuts baraá tlakweemaaín. Múk Yuda sleeme i aldukuuts dinkwa nee inooín.

⁶ Inooín ta tláy nee bee/aangw'ine nee hikwaaine as AAKOÓ MUNGÚ kuwa leelehhtuú ay, ala ngu ariiaaká. Asma inós taa paraátl dir'ine.

⁷ Inooín dír AAKOÓ MUNGUHE naa iia wasleesiyé', asma inooín na/aá taa laqwaál a kudá' tinda tsee/aá wa sláy. Slahhángw /awaák birna ti'iít inooín i hhaná'.

Slaqwarár múk Yuda nee oo Israeli

⁸ Xareemi ufaahhaak baraá Gibearo, tarumbeéta baraá Ramaro. Uui tleereesaak baraá Beti-aweniro, múk Benyamini wakuuserhúng hanoos aluuhúng.

⁹ Aníng múk Israeli bura slaáhh iri deewaa' baraá tla/ángw tlahh'aá Israeliwo, kaangwí naa oó' oo ló'.

¹⁰ Geeraharuusér Yuda ni hardát, inooín a adór múk digeemaá hingeemiís. Aníng inooín in i buhhtaeéní ku'uús adór ma'áy wa alé.

¹¹ Múk Israeli kwaa baramaanuús baraá kwasleemaro, asma inooín taa tsabín loohír qwanaay eeharto.

¹² Gawaá adoorihe aníng a adór tlusá dír múk Israeliwo, nee adór inkaahhoó sooní dír Yudawo.

¹³ Qoomár múk Israeli tiqtir'ín ngiwa tsaáhh, nee múk Yuda inkahhi'ii'ín ngiwa tsaáhh, Múk Israeli iri tláy amór Ashuru, muu guri ya/aáw amór waawutmoó úr, ala inós kuungá' hungu/uusaro nu aleeslayká, tam inkahhi'iihúng gi hungu/uusiiká.

¹⁴ Asma aníng a adór diraangw tleehhiít dír múk Israeliwo, nee adór na/aá diraangw dír doó Yudawo. Aníng, nu karslamiís, nuri hhimbiriítl, tam heé nu tuú/ iri qwaar.

¹⁵ Aníng an kií/ dír kitangw'eé' tin paraátl dir'ine, ay dír tlakweemaaín ngay gwadidina' aníng iri leelehhtuú ayá', slahh'amu giri intsaahhatis aníng iri leelehhiyá' tawa kaahi.