HOSEA 2 - Biblía Axweesantá Hhohho' ar Mungú 2004

¹ Hhaeehúng awa daaqaay ki beera', «Ami». Nee hhaeehúng awa dasu ki beera', «Ruhama».

Inkihhimu waslér Gomeri nee ar múk Israeli

² Aayorhúng harhheehhe'eesaak, asma inós a harer'eeneeká nee aníng sleeme a hhawaatuuwoseeká. Harhheehhe'eesaak tsaatu'uumarós ngi meer, aníng mawa ga/aw, nee iseemaawós mingiwa ilatleerí múkár tleemís.

³ Bir axamiská aníng a tlaba' hingeés, gwe'eedo gay tsee/áy tsát, ngiri ki/ís adoodár bál kingiwa laqwaál, inós ngiri adór xaanxaay tleéhh iri mét ar pakáy, ngiri gaás ar waxe.

⁴ Ga/aaweek, na/iiwós i baloó gurtlawaaká, asma a na/aá naa tsee/aá wa sleér.

⁵ Asma aayor'ín tsaatu'uuma gaa tléhh, tidá' inooín gaa tsit, muruú alsi'ím guna tléhh, asma ina ó', «Aníng nee mulqer'eé' an alhi'iimitaán, kudá' i muruú /aymár i slaslaawá' nee ma'aay, nee tsitaay nee di/i nee xuftaro.»

⁶ Gawaá adoorihe, loohirós an yaáw ar laqaya', ngay koo/írír harweér tam loohír ti'inaangw mingiwa sleér.

⁷ Inós mulqeerós gay eeharahaduú eér, ala gi sleeraaká, gi leelehhít ala gi aandaaká, iri o', «Aníng a kií/ amór hhawaatuueé' kuduú bi/i, asma adoodá' dír hhawaatueene nira hoót a tsiní ta adoorí hám ni diriia.»

⁸ Asma inós gaa xuiká adór aníng ngira balaángwí i hanmiís nee difaáiro nee di/to, nee aníng inós ana tsuúq ngay peésa nee sahaábu yaariírí haniís, kudá' aa húp dír Ba'ali.

⁹ Gawaá adoorihe qoomár bu'uungo angaánooeé' un ar tláw, nee difaáir'eene. Aníng tlabaaeé' kudá' aa /aankwetsuuwós ar lú/, kudá' taa tleéhh ar se'éngw bee/aangw nee kitaáni, in hayóh.

¹⁰ Aníng an /aankwetsiís dír ilaá mulqeerós wa ale, tam heé wák oo ga baraá dabaaeéná wa tuú/ i kaahh.

¹¹ Slám qwal/amaayeerós sleémeero a hingeés. Nee deeloorós tidá' urene, nee deelór uren ar slahhaangw niwa ti'iít, nee deelór Sabaáto nee deeloodá' uren taa qaás.

¹² Aníng qamuuwós awa sabiíbu nee awa /aantsihe, in hhitiím kudá' inós iwa kat, ‹Qamuuká' an bu'utueé', kudá' mulqer'eé' naa hanís.› Aníng in gara tleéhh, makaá sla/a ngiri /ayiyá'.

¹³ Aníng a muúx as deeloodá' ur ar munguaá ta bay Ba'ali i aaeer, nee ilahhooadár mooyángw koom deeloodae i da/a/ángw aaeer dír munguiidá'. Tina parootumaamís ar peéterós nee ar muruudá' tlaxo gawdén, iri tleér amór mulqeerós, aníng iri gunqaarés. Anuú AAKOÓ MUNGÚ tí ngina oó'.

Mungú mukós gu slaa'

¹⁴ Hamí daxta ga/aaweek, aníng a harhheehhe'eés ngiwa huuw baraá darma, ngiri i axweés ar fur'ár tsa'.

¹⁵ Aníng qamuuwós awa sabiíbu ngay amoodá' wa haniís, nee xatstá Akori tidá' ta bay slahh'amaaye tari harahhifoorós. Inós aníng iri ya/aán ar adoodá' aáng ngira sa'axweés tawa /amaatliito'o, nee adór qoomaadá' niwa ti'ít Misrír wa ale.

¹⁶ AAKOÓ MUNGÚ i kaahi, «Slám deeloodae aníng in beer, ‹Hhawaatuueé'› i beeraaká, ‹Ba'aálieé'.›

¹⁷ Umér munguiidá' ta bay Ba'ali qoomaadae a hingeés gawaá afkose, kiri baloó ooiiká.

¹⁸ Qoomaadae al'axweesani ngiri oó' nee makaá sla/a nee tsir/ór gawaá doori, slám nee naanagár baraá hhape, as miwa slahh'eesiyé', ga/ale nee paánga ngay geeqáw nee xoslaá hatlá' awa slaqwara ngiri hingeés baraá yaamuwo. Aníng kuungá' nuri tsuúq, tari hotá' ar wayda.

¹⁹ Aníng kiíng iri sa'axweés tawa harer'eé' ar daqisleém, kiíng iri sa'axweés ar hotaá ganaa'á' nee ar sakwasleemár ganaa', nee ar sla'aarír warqawaaká nee ar gurtleemu.

²⁰ I sa'axweés ar inkihhimu, kiíng AAKOÓ MUNGÚ kuri xú'.»

²¹ AAKOÓ MUNGÚ i kaahi, «Baalaadae aníng doori in tsuúq as tluwaay iwa baraá yaamií tluwi

²² Yaamu balaangw nguri hamareesiyá', nee sabiíbuwo nee seituúniro, baraá xatstá Yesre'elír wa alé.

²³ Aníng yaamaá Yesre'eli in diihhooatís, heedaádá' taa gurtlayká aníng u gurtláw, mukduú aáng kwe'eeneeká ngway baw, ‹Muk'eé'.› Inooín tari ooi, ‹Kuúng an Munguúrén.› »