HOSEA 13 - Biblía Axweesantá Hhohho' ar Mungú 2004

Sakwasleemár alhhe'eesáy dír múk Israeliwo

¹ Múk Efraimu iwa ilawaáts, muu iri daaraxaát, múk Efraimu iri iiatleerúy baraá Israeliwo, ala mungú Ba'ali nguri sluufmisiyé', tari qaátl as adoorí.

² Hám daxta tana ak kumiít tlakweema tlehhtuuwo, inooín munguú slaqsaay kway tleéhh ar peésa. Heé fuqurángw koóm slaqsaywí guna tleéhh ar peésa. Muruuwí sleémeero kuna tleéhh nee heé kwahhór baál, tari oó', «Ilahhooár muruú ta tsu/i dír muruuwí ti hanmisé'.» Muu slaqsi'iidá' mungui ngiri ma'amisiyé', kudá' taa tleéhh ar slaqsoó dama.

³ Gawaá adoorihe inooín tan ilaá wa qwaar adór tlaanguú matlaatle, nee adór har'ú gaanslár paáhh, nee adór muundoó fur'a ir tlatleer dír kitángw haritleemisuwo, nee adór quuír pa/ángw ar ti'imiit.

⁴ Aníng a AAKOÓ MUNGÚ, Munguúhúng, kudaádá' naa tuu/ imiír baraá yaamaá Misrír wa ale, ala Munguú hatlá' ta xu' i kaahh, aqo har aníng kilooeé'. Ba/amusmoó hatlá' i kaahh.

⁵ Aníng kuungá' nuna amohhe'eemiís iimír baraá xaanxáy wa alé, baraá yaamaá kaahaar awa waxe.

⁶ Ala qoomár inooín gur'er'ín ngiwa dala/ané', niri taqana/utiyé', aníng iri gunqareesiyé'.

⁷ Naagáy aníng nay adór diraangw tleehhiít dir'ine, nee ngiri baraá loohír wa gigidiím adór du'umuú wa ale.

⁸ Aníng nun hara/akumiít adór dúbuú taa na/ii hayóh, nuri da/eewe karslamiís, nuri /aáy adór diraangw, nuri tlaqaqaát adór makiito'ór sla/a.

⁹ Aá múk Israeli, án kuungá' nu hhaamiís, heé kuungá' nu tuú/ a heemá?

¹⁰ Waawutmohúng daxta hamí i amá oo nu tuú/? Geeraharuuserhúng gaálaay as kuungá' as nuwa xuun? Kudá' kuungá' tawa oé', «Waawutmoorén slawang nee geeraharuuseero as tiwa sawaawuti'ina'.»

¹¹ Aníng ana buúhh waawitaáhúng nguri haniís, ala ana qa/iít buhhtaawo nguri hingeés.

¹² Tlakweemaá múk Israeli kaa gooín, dakuúsar'ín kaa gunqaresiiká.

¹³ Múk Israeli asltá /ameenír xwayla gu i hardát, ala inooín a adór na/oó daktani oo qoomár xwayla gaa ay, ala qoomár xwayla bira xeér, in sii' ti'inaango baraá guruú aayooro.

¹⁴ Aníng i ba/amís baraá /uuruú gi'iiwo. Aníng nu wangeexwaár dír gwa'araro. Aá gwa'ára, tsu/utaarók gaálaay? Aá gí'i, hhitarhúng gaálaay? Gurtleemu u sangw koomaaká.

¹⁵ Inós tam i diihhe'eesi ta hhaeewose, ala AAKOÓ MUNGÚ fur'a ngi da/aá wa kwaahh ar baraá xaanxoó daahh. Kutlaay sleémeero guri kahás, hhaleeri'ín sleémeero giri /oomés. Daqaari'iimar'ín sleémeero ar afhhamít gari ar darát.

¹⁶ Múk Samaria doohhór tlakweemaaín ga sláy, asma Munguín ngwaa aahhiyé'. Inooín ki daasl ar paangadu, na/ii'ín awa qaweero kin naasaasúy, nee /ameenar'ín ar tsiihaawe kari gur'e posl'omiis.