HOSEA 12 - Biblía Axweesantá Hhohho' ar Mungú 2004

¹ Umuú gaaro ar múk Efraimu i tlehhiiti a tawo. Lameemo nee muruú tlakwe ngin alkoná' tlehhtuuwo. Inooín alqado ngin tlehhiitiyá' nee múk Ashuru, nee di/i kan huwahuuw ay Misri.

² AAKOÓ MUNGÚ i kwasleemár kón daanduú Yudawo, inós xwaylár Yakobo ga slaahh as tlehhmi'ii'ín awa tlakw, giri buu' ar har qoomoó tlehhmi'ii'ín.

³ Baraá guruú aayoorose koolór hhiyaawós gana óh, iwa uráy tina tlaampa'asiyé' nee Mungú.

⁴ Tina tlaampa'asiyé' nee malaykamo guri ar baá/, guna i /aa/amín gurtleemu guri firín. Inós nee Mungú tiri doogiyé' baraá Beteli, amoodae inós nee Mungú tari axweés.

⁵ Eeít, AAKOÓ MUNGÚ, MUNGÚ Aleesleemusmo, AAKOÓ MUNGÚ an umuuwós.

⁶ Ala kuungá', ki/é' amór Munguúhúng, sla'aari nee gan'amu aldakuutaak, nee Munguúhúng harahhifaak umuúqo daqto.

⁷ Múk Israeli a adór heé halaanu'uumár tleéhh ar al/ayma, muu gun slaa' nguwa /aytin.

⁸ Múk Israeli ta kaahi, «Ar ló' aga tsuwa ló'wa daqaari'iitaán, muruú yaariír ugwa slawaán, baraá gadiyeérén sleémeero, tlakweemaarén ki ariiká.»

⁹ Ala aníng a AAKOÓ MUNGÚ, Munguúhúng, iimír niwa tleeré' baraá yaamaá Misrír wa ale. Aníng kuungá' nu male ki/ís tawa hotaá eera' baraá heemadu, ar adoodá' ta tlehhaahhita deelór ur ar isleeriwo.

¹⁰ Aníng ana axweés dír aaruuse, nee ngay iigu'utuú yaariírí haniís, niri axweés ar slaqsi'i ar loohír aaruuse.

¹¹ Tam hamí munguaá hatlá' ki sluufmiis baraá Gileadiro, mukdá' sleémeero gi sluufmiís ku hhaamiis. Ala tam hamí damaay ki ilahhooár muruú ta tsú/í hanmiis baraá Gilgaliro, ala kiteeridaá ilahhooa ki ufér tlaa/e tleehh baraá hha'aá qamuuwo.

¹² Yakobo aáng ina tláy ay yaamaá Aramu, amoodá' iwa gadiyuús as hare ngiwa slay. Inós bee/aangw guna de'én as hare ngiwa slay.

¹³ Ar loohír aarusmoowo AAKOÓ MUNGÚ múk Israeli guna duúx yaamaá Misrír wa ale, nee ar loohír aarusmoowo giri amohhe'eemiís.

¹⁴ Múk Israeli AAKOÓ MUNGÚ gwaa ló'wa buhhtís, ala gawaá adoorihe tseerduudá' naa ku'uumamisiyé' gi gawaaíní ki/is, li/ayduú /osliislingw'ín gu gawaaíní buu'.