HOSEA 11 - Biblía Axweesantá Hhohho' ar Mungú 2004

Mungú sla'aarirós ka ur ta buhhtaawose

¹ Israeli kuwa niiná una slaá', garmaaeé' kwí ngway ateét niwa Misrír wa ti'iiti.

² Adoodá' ngira alkoóm ateetiingo, án inooín tina ak geexáy. Ilahhooadár muruú ta tsu/i ta Ba'ali hanmiisi ngina ooha hhe'eesiyé', nee ilahhooár mooyángw tsuú' ngina hanmisiyé' dír munguaá slaqsi'i.

³ Aníng múk Israeli una intsaahhatís hi'iitanooro, anuú kilá' ina amohhe'eemiís ar dabaaeé', ala inooín ngaa xui'iiká adór ngira amohhe'eemiís.

⁴ Aníng ina geerahaár ar gurtleemu, ngiri uuruúx ar sla'aari, taaqwantadár gawaá isooín ngiri hingeés, aníng ana xupuú' ngiri /aymiís.

⁵ Inooín ta kii/ Misri, kiri sawaawuti'ín nee waawutmoó Ashuru, asma ki/imaá amor'eé' ngaa si'iyé'.

⁶ Gixsaduín ki qwaarees ar slaqwara, nee afér maray'ín kari giqáy ar paangadu, inooín kiri hhaamiis, baraá guruú koo/ir'ín tidá' gawit.

⁷ Muk'eé' aa maariít iga si'iyé', handá' ki ateetín tawa ki/i amór Kuduú Gawa, tam heé wák i kaahh oo inós gu xirfayeemiís.

⁸ Aá múk Efraimu adór nur geexaw? Án kuungá' múk Israeli adór nur sii'? Adór ngir aslaw nuwa adór gixsár Adma tleehh? Adór ngir aslaw nuwa adór gixsár Seboimu tleehh? Muunaáeé' aa warqáy, guruueé' aa ló'wa tláy.

⁹ Aníng buhhta i máw, múk Israeli u malé qwaareesár awaaká. Asma aníng a Mungú, aníng a heewooká. Aníng an kudá' hhoohhoó' baraá tla/angwhunge, aníng nu hhaamisár awaaká ar xarasleemaeé'.

¹⁰ Inooín anuú AAKOÓ MUNGÚ i eehariyá', anuúdá' /oroótl adór diraangw, an i /oroótl, na/ii niri /uwá wa hardihiyá' ar daaraxaay.

¹¹ Tindin hardah ta daaraax adór tsir/ór Misrír daahh, nee adór hhooka ar yaamaá Ashurúr daahh. Aníng ngiri watlís baraá maray'ín. Anuú AAKOÓ MUNGÚ tí ngina oó'.

Múk Israeli nee oo Yuda kuwa sakwasleemuuti

¹² Múk Efraimu iga lamtár gaás, nee múk Israeli a al/aymuuse, ala Yuda tam hamí in tawo babaqaamiis dír Munguhe, dír inósuudá' hhoohhoó', kudá' inkihhím.