HOSEA 10 - Biblía Axweesantá Hhohho' ar Mungú 2004

¹ Xoorór Israeli a adór sabiíbu hhó'. Sabiíbuú mamaá hho' gi laqwaliím. Adoodá' mamuuwós nira tlahhiyé', an adoodá' inooín kiteeraá ilahhooa ngira tlehhiitiyé'. Adoodá' yaamuuín nira dihhe'eesiyé', an adór uheemaá kiteeraá ilahhooa ngira parootusiyé'.

² Inooín a al/aymuuse, hám daxta adór kis hariím ngi slayá'. AAKOÓ MUNGÚ kiteeri'ín kudaá ilahhooa gin yaamií daahh, uheemidá' giri fee/.

³ Hamí daxa tan ooi, «Atén waawutmoó u koomanaaká. Asma AAKOÓ MUNGÚ u ilaiwawa/anaaká. Ala geeraawo waawutmo gár tiwa /iisi a milá?»

⁴ Gaa a boqoondaá tawo kin axwees. Al'axweesantá lama kan oín. Gawaá adoorihe sakwasleema a adór xa'anoó tsu/uút, oo baraá hha'aá qaymo.

⁵ Yaamuloouusér Samaria in daaraxát as damaadár baraá Bet-aweni. Inooín tari tsuunqumiis as damaadá', kaahamuusér damaadá' ga sluufmiis iri /aa/amiín, as xirfuú damaadá' kuwa hingeés.

⁶ Slaqsayduú dama kuri huuw Ashuru. Kuri koódír wa haniis dír waawutmoó úr, múk Efraimu kuri mureekees, nee múk Israeli iri muruut as slaqsayduú mungú.

⁷ Waawutmoó Samaria kun kahhtis adór parhhamtá xa'ano ar gawaá daanduú ma'aá yaae.

⁸ Wa/aamér munguúaá hatlá' kiwa sluufmiisi ar gawaá gongooamoó Afeni, tidár tlakweemaá Israeli, ka hhitín, fuquráy nee sla/a nin ti'iitiyá' gawaá kitángw sluufáy wa ale. Inooín tlom'i kiri bay, ‹Atén ti tuuntuke,› nee gongo'oma' kiri bay, ‹Atén ti harahue'.›

Múk Israeli bu'utuú tlehhmi'i'ín ngu slayá'

⁹ Aá múk Israeli, tlakweema ina tlehhé' iimír tawa baraá Gibea, nee tam hamí a kumaamitá', ar ló' tundu hhaamiis ar slaqwara baraadaá kilaá Gibea.

¹⁰ Aníng a daqáw amór mukwí nee nguri muúx. Xoordu nin burumburitiyá', inooín kiri i haratláy, kiri muux as tlakweemaaín kudá' naa harwaraahhiye'.

¹¹ Múk Israeli a adór awuú taa intsaahhatisa hhe'eés oo balaangw kal/aango gu slaá'. Ala hám aníng istós tidá' hhoohhoo' an taaqwantí tseék. Múk Yuda i doosl ar kurmo, múk Yakobo kurmoó kakaani gun uuruux.

¹² Hotaá ganaa'á' ar hootaak, sla'aarír warqawaaká ka sleerá', slafingwhúng amohhe'eesaak, asma qoomaarí an qoomár AAKOÓ MUNGÚ kuwa leelehhita', as kahhó' inós niwa hardihi, nuri geerahaar baraá hotaá ganaa'á'.

¹³ Ala kuungá' tlakweema in ar hotatiindá', sakwasleemár ganaa' kari qwaaresé', lameemoohúng nuri saki/iyé', asma /uureemoohúng ina harahhifé' nee miguuserhúng tidá' yaariire.

¹⁴ Gawaá adoorihe slaqwaruuse ni haratleér amór mukók, nee maraywók kudá' koo/i gawden kiri yaamií hhaaf, adoodá' Shalmani Beti-arbeli ngira yaamií hhaáf bál slaqwaraaro, ín aayo kiri nakaa/arúy dinkwa nee na/ii'ine.

¹⁵ Aá múk Beteli, adoorí an adór tindi kuungá' i tleehhi, as tlakweemaahúng kudá' yaariir. Qoomár looa birni tlatleér waawutmoó Israeli ku suqtis.