HOSEA 1 - Biblía Axweesantá Hhohho' ar Mungú 2004

¹ Kaangwí an axweesantá AAKOÓ MUNGÚ ar Hosea aa axaás, garmoó Be'eri, de'emaá waawituú yaamaá Yuda tawa Usia, nee Yotam, nee Ahasi nee Hesekia, nee waawutmoó yaamaá Israeli tawa Yeroboamu garmoó Yoashi.

Harér Hosea nee na/iiwós

² Wa'aá geeraawo AAKOÓ MUNGÚ ina axweés dír múk Israeli ar afkú Hosea. AAKOÓ MUNGÚ Hosea guna báy, «Tláw, harér tsaatuso'o duuxeek, nee na/aá tsaatuuse kiwa sleer, asma ayaawí tsaatu'uumár yaariir gaa tleéhh ar AAKOÓ MUNGÚ kuwa geexáy.»

³ Hosea Gomeri dasír Diblaimu, gay duúx iri tsít, na/oó garma guri xwayluúr.

⁴ AAKOÓ MUNGÚ iri oó', «Umuuwós ku beer Yesre'eli, asma deelór aa met ka ureeká, doó Yehu u hhitiím, asma tseerér aa ku'uús baraá Yesre'eli nee waawuti'iimár doó Israeli an suqúw.

⁵ Baalaadae baraá xatstá Yerse'eliro aníng slaqwaruusér múk Israeli tam nee /uureemooine in suwawaá'.»

⁶ Gomeri iri malé tsít, dasi gari xwayluúr. AAKOÓ MUNGÚ Hosea guri báy «Umuuwós ku beer, Lo-Ruhama. Asma múk Israeli u baloó gurtlawaaká, tam ado gaalá.

⁷ Ala múk Yuda u gurtláw. Aníng AAKOÓ MUNGÚ, Munguúín, in ba/amís. Slám i ba/amisaaká ar ga/ale, laqaá ar paánga, laqaá ar slaqwara, laqaá ar faras, laqaá ar múk faras ngwa i tsa/an.»

⁸ Gomeri Lo-Ruhama ngiwa /oomés, iri tsít, garma guri xwayluúr.

⁹ AAKOÓ MUNGÚ Hosea guri báy, «Umuuwós ku beer, Lo-Ami. Asma kuungá' a muk'eeneeká, aníng sleeme a Munguúhungeeká.»

Xoorór Israeli ka /abees

¹⁰ Aluuwo faarór múk Israeli a adór hhasángw afaá tlawi oo qoomay wásl, nee oo faaroro ta aslayká. Adoodá' geeraawo kiwa bay, «Kuungá' a muk'eeneeká,» daxta kin tundun bay, «Na/aá Munguúdá' slaáf.»

¹¹ Múk Yuda nee múk Israeli ta haragwaa' diinkwárí alé, geeraharusmooín oo wák kuri tsawaar, inooín nay diihhe'eesiyá' baraá yaamuudae. Asma deeloodár Yesre'eli ka ló'wa ur.