HAR'OHUUSE 8 - Biblía Axweesantá Hhohho' ar Mungú 2004

Múk Midiani kuwa ló'wa baál

¹ Múk tlahhoó Efraimu Gideoni nguri yaahasiyé' tawa kaahi, «Asma milá mista adoorí tléhh? Ahaá mista ateti'iiká qoomár tawa slaqwa' nee múk Midiani?» Nguri ló'wa ii buhhiyé'.

² Ala Gideoni gina báy, «Muruú aníng naa tleéhh a ak gaarooká burkwa alqoomeés nee kudá' kuungá' taa tlehhé'. Muruú múk Efraimu aa sleemiís alaá bu'uungo ku ló'wa hhó', slám ku hhohhó' ta bu'úngw Abieseri kuduú tlahhay'eene.

³ Mungú múk urén oo Midiani ngwa gawaá dabaahúng i qaás, Orebu nee Se'ebu. Xáy, aníng gár naa tleéhh a milá birta alqoomeés nee kuungá'.» Gideoni adoorí ooaro ngiwa hhe'eés, buhhtaaín nay tsauyé'.

⁴ Gideoni nee mukós kuduú tsiire tám tana hardáh Yordani, tay waaraáhh. Tam naa ló'wa slaaqamitii'i aqo nina kumiitiyé' wakuuser'ín ngiwa aluú wa gusisiná'.

⁵ Naagáy qoomár tawa hardáh Sukoti, Gideoni múk Sukoti guna báy, «Na'asé', hhaee'eé' kuká' mikaátérír haniisaak, asma naa ló'wa slaaqamiitiyé', ala aníng a kumiít waawituú Midiani nguwa aluú wa eehar, Seba nee Salmuna.»

⁶ Ala geeraharuusér Sukoti guri yaahás, «Ahaá gár mikaátér slaqwaruuseerók ngis haniisaan barqo kuungá' Seba nee Salmuna iga ohiindi'iiká?»

⁷ Gideoni giri báy, «I qoón, ala AAKOÓ MUNGÚ bar Seba nee Salmuna ngaa qaás gawaá dabaeé', daqaní aníng slaqoohúng in tu/uúm ar difiitmoó laqeelaá koóm nee muumuír baraá xaanxaay.»

⁸ Ina didá' wa tláy ay amór múk Penueli, giri adoodár firín. Múk Penueli nguna mu/aywatsiyé' ar adór múk Sukoti.

⁹ Gideoni giri báy, «Aníng birna kií/ ar wayda do'owí gáwtí tleér un feé/.»

¹⁰ Seba nee Salmuna ta baraá yaamaá Karkorírí dirii' dinkwa nee slaqwaruusér kume mibaá nee kooán ar aa met slaqwaruusér da/aawe, asma hhaeeín awa slaqwarár paangadu ngi baalá' awa kume tsiiru nee mibeeraá tsár kina qororo'oós.

¹¹ Gideoni loohír /uwa tidá' bihhaá da/aáw awa Noba nee Yogbeha gana eehár, slaqwaruuseerí gari hhaawiís, giri tsitsiíhh muxtaaro slám inooín taa amohhe'esi'iiká.

¹² Waawituú Midiani Seba nee Salmuna nina gowiyé', ala Gideoni giri aluúwaá alkón giri ohín, slaqwaruuse sleémeero daér yaariir gari eér.

¹³ Aluuwo Gideoni garmoó Yoashi, niri baraá slaqwarár wa waátl dír /etángw Heresi guri ar waaraáhh.

¹⁴ Garmaako Sukoti guri óh guri yaahamiís. Garmaawí umér geeraharuusér Sukoti gari gooín, dinkwaaro a mibeeri faanqw nee faanqw.

¹⁵ Gideoni iri kií/ amór múk Sukoti, giri báy, «A insleerá'aáke adór ira niqisé' tawa oé', ‹Gár mukók oo aa slaaqamiit ngus mikaáteérí hanisaan a milá bar Seba nee Salmuna iga qo ohiindi'iiká.› Gimsé' daxta, Seba nee Salmuna an sangw kuká'.»

¹⁶ Aluuwo, bariisér Sukoti kari iintsaahhatimís hhawaate sleémeero ar slaqooín ngiwa karslamisiya' ar laqeelo nee ar fuquráy.

¹⁷ Sleeme do'dá' tleér oo Penueli guri feé/, nee múk baraá gixsadá' hoót guri tsuú/.

¹⁸ Aluuwo Gideoni Seba nee Salmuna gina yaahaás giri báy, «Mukdá' taa tsu/é' baraá Taboriro a múk adoomá?» Inooín nguna mu/aywatsiyé' tana oó', «A slaqamís nee kuúng, asma a adór daaqoó waawutmo.»

¹⁹ Inós giri báy, «Kwisingá' an hhaee'eé' na/aá aayír'ér xwayliito'ó. Hám geeraawo bar ina tsu/i'iiká ar looeemaawo án kuungá' nu mak tsu/aaká.»

²⁰ Gideoni Yeteri garmaawós oo barís guri báy, «Sihhiít, tsu/eek.» Yeteri iri da'ayuút paángarós ngiwa taataahhi asma inós a masoomo.

²¹ Aluuwo Seba nee Salmuna Gideoni nguri bayé', «Sihhiitáng, kuúnguú kilá' ti tsu/, asma gadiyeérí ar hhawaate.» Gideoni giri tsuú/ inósuú kilá', muruuduú parooti oo gawaá isér angamíar'ín guri ar tláy.

²² Ala múk Israeli Gideoni kuri báy, «Kuúng atén ti sawaawuti'iin, nee aluuwoge xwaylarók ti sawaawuti'iin, asma kuúng atén tina tú/ dír múk Midianír wa alé.»

²³ Gideoni giri mu/aywaáts, giri báy, «Aníng kuungá' nu sawaawuti'iimaaká, laqaá na/ay'eé nu sawaawuti'inká, ala AAKOÓ MUNGÚ an waawutmoohúng.»

²⁴ Giri malé báy, «Aníng kuungá' nu firiím gár wake, na'asé', umuúqo heewo saaqaánduú sahaábu kudá' taa sleeré' haasaáng wa ale haniisare'.» As múk Midiani tawa oo tlahhoó Ishmaeli parooti a gar'ín.

²⁵ Muu Gideoni guri báy, «Atén ngi hanisaán ar sla'aarirén.» Tlaba kiri hhaáf umuúqo heewo saaqaánduúwós kuduú haasaáng guri gawaadií kwaáhh.

²⁶ Saaqaánduú sahaábu oo taa haniís dír Gideoni a kílo mibeeri tsár, dinkwa nee saqaánduuwihe, muruú hatlá' taa hanmiís a tlabaá sirdaa/aten awa mibeeri tsár, dinkwa nee tlabaá waawituú Midiani aa dahamiís nee himtaawér baraá isaá angamiaduuín.

²⁷ Gideoni sahaábuudá' guri naifeérár kaahamusmór tleéhh, gari qaás baraá gixsarós ar ta bay Ofra. Múk Israeli sleémeero iri amoodá' i tláy as kuwa sluufmiisi. Naifeéradá' iri tsaaxweeli tleehhít dír Gideoni nee múk do'ose.

²⁸ Naagáy múk Midiani kuri ló'wa arbaá/, tam múk Israeli ngwaa baloó dae tsati'iiká. Yaamaá Israeli wayda ngway slayé' ar afiqoomár kureeri mibeeri tsiyáhh de'emaá Gideoniwo.

Gwa'arár Gideoni

²⁹ Gideoni kudá' ta bay Yeruba'ali garmoó Yoashi, iri waátl amór do'ós iri amoodá' wa hoót.

³⁰ Gideoni daaqaay ngu kon a mibeeri faanqw, asma inós /ameena nga duxuút ka yaariir.

³¹ Amór Shekemuwo /ameenír quturmo wasl ga kón, guna na/oó garmií xwayluúr, umuuwós a Abimeleki.

³² Gideoni garmoó Yoashi iri dín iri gwaá', kuri foól baraá /aantár baabuúwós Yoashi, baraá gixsár Ofra ar múk Abieseri.

³³ Alaá gwa'arár Gideoniwo, múk Israeli Mungú sluufmisuuwo nguri malé mayé'. Munguaá Ba'ali ngiri sluufmisiyé'. Munguúdá' ta bay Ba'al-beriti nguna munguúín tleehhiyé'.

³⁴ Múk Israeli AAKOÓ MUNGÚ nguna gunqareesiyé', Munguúín kudá' gaa ba/amis dír wakuuser'ín ar yaariire ar gaa harwet bihhe sleémeero.

³⁵ Slám inooín múk doó Gideoni ngwa hhooeemáy tleehhi'iiká ar adoodá' Gideoni hhooeema ngira tleéhh baraá Israeliwo.