HAR'OHUUSE 7 - Biblía Axweesantá Hhohho' ar Mungú 2004

Gideoni múk Midiani nguwa baál

¹ Gideoni kudá' ta bay Yeruba'ali nee mukós sleémeero matlaatleero nina tseewa tlayé', xafay'ín nguri tleehhiyé' bihhaá kutltá Harodi. Múk Midiani xafay'ín ngua tleehhiyé' bihhaá /iya, baraá xatsa didár geetuú More.

² AAKOÓ MUNGÚ Gideoni guri báy, «Múk kuúng ta koon ku ló'wa úr dir'eene baali ngiwa haniis dír múk Midianiwo. Aluuwo baraá múk Israeliwo hee miwa kilós oó', ‹Aníng tina tuú/ ar dakw'eé',› nee aníng iri gaárií xuiaaká.

³ Tláw muu ádbaweek, ‹Bar heé daimiít i deer, miwa daqáy, i watli amór do'ós.› » Gideoni muu guri iiár, múk kume mibeeri tsár nee tsár tari waátl, múk kume mibaangw iri didií meét.

⁴ AAKOÓ MUNGÚ iri malé oó', «Tam hamí muksíng ku ló'wa úr sleeme. Gimáy, muksíng huweek baraá yaae, aníng daqaní u didá' wa paraátl. Aníng daqaní kuúng bura báw, ‹Heewí nee kuúng ti alkoondá',› inós daqaní i daqay. Barnaxes, aníng kuúng ugwa báw heesíng i daqayká, inós miwa daqáy.»

⁵ Naagáy mukdaádá' guri ar /eét baraá ma'aay. AAKOÓ MUNGÚ Gideoni guri báy, «Heé ma'aay gaa wah adór seeaay ma'aay ngir wahaahan ar tsifraangós, kwí ku bihhií parátl, nee kudá' aa tumbarara'aat sleeme ku parátl.»

⁶ Múk ma'aay gaa taatahhan ar dabaaín, kiri halqamiís ar tsifraangw a tsiire tám, ala múk hatlá' sleémeero tana tumbarara'amiít tawa ma'aá wahan.

⁷ AAKOÓ MUNGÚ Gideoni guri báy, «Aníng kuúng u arba/tír i haniís ar múk Midiani kuwa bal ar mukuú tsiire tám, kuká' ma'aay ngaa wahiye' adór seeaay ma'aay ngir wahaahan, ala múk hatlá' i watli.»

⁸ Naagáy Gideoni sirwoó ninákw oo muruú /ayma gway gawaá daber'ín wa taataáhh nee tarumbeétaaro, muu sleémeero oo Israeli guri watlís umuú heewo amór heémaarós, ala múk tsiire tám guri ilaá/. Xafoó múk Midiani dir'ine i bihhaá baraay baraá xatsa.

⁹ Xweeradaá kilae AAKOÓ MUNGÚ Gideoni guna báy, «Ti amohhe'es, xafoó múk Midiani kuwa i haratleer, asma aníng arba/ati ngaa dirógí haniís.

¹⁰ Ala bar daiimít, ti alkoonde' nee Pura sagadiyusmoowók ay didár xafay'ín.

¹¹ Kuúng kángw inooín ta axweesi u axás, /uuru kuri sleér as tawa slaqwarár eer.» Naagáy Gideoni nee sagadiyusmoowós Pura tari tláy ay wa/aameedá' xuumuusér múk Midiani iwa xuun ar baalaqaasi.

¹² Múk Midiani, nee múk Amaleki, nee múk hatlá' sleémeero oo da/aá daáhh xatsa ngaa qaroó alqaatiyé', yaareemaawo a adór ingigi, nee inooín angamíár yaariir adór hhasángw afaá tlawi ngi koná'.

¹³ Qoomár Gideoni iwa hardáh dír xafoó múk Midiani, naxés heeko wák i axwees dír mulqumoowós, i kaahi, «Gám aníng aga tlatitiím, /aarmoó mukaatmoó shayiíri ina gwangwara'aát baraá xafoó múk Midiani, heéma gari dalaá/, iri hú', iri /arankwatsít, iri yaamií hhaafít.»

¹⁴ Mulqumoowós kudá' guri mu/aywaáts iri oó', «Gaasíng hamí aqo paángár Gideoniwokáhe, garmoó Yoashi, heé Israeli. Mungú múk Midiani nee slaqwaruuser'ine sleémeero gaa haniís baraá dabaawós i ale.»

¹⁵ Gideoni kangwduú tlataadá' nee waagweermooro ngiwa axaás, Mungú guri sluufiís, iri wayaá' amór slaqwaruusér múk Israeli, giri báy, «Tlawaaré', asma AAKOÓ MUNGÚ slaqwaruusér Midiani ngaa qaás gawaá dabaahúngí ale.»

¹⁶ Inós mukduú tsiire tám guri qasiís baraá daqooroó tám i ale, umuúqo heewo guri tarumbeétár i haniís nee sirwír niina ar kaahaar ar gura tsaa'astá koom.

¹⁷ Inós mukdá' guri báy, «Qoomár aníng bar aga hardáh bihhiiqaá xafaay, aníng na ga/aawaré', adoodá' aníng ni tleehh daqaní kuungá' ka tlehhá'.

¹⁸ Qoomár aníng nee daqtaeé' tarumbeéta bara ufahhaán, daqaní kuungá' toohúng ka ufahhá', xafaay ngu harwedá', nee ta tseá' ar afór ur tawa kata', ‹As AAKOÓ MUNGÚ nee as Gideoni.› »

¹⁹ Gideoni nee múk tsiiru tari bihhaaqá' i hardáh awa xafoó múk Midiani qoomár xweeraá dakingo, qoomár xuumuuse tiwa warqeská. Naagáy tarumbeetadu ngiri ufaahhiyé' nee sirwaydá' ta kon kuri yaamúr slaáhh.

²⁰ Nee daqtadár tsár sleeme adoodá' ngina tleehhiyé'. Inooín sleeme tsaa'aso ngina oohiyé' ar daber'ín ar doó basáy nee tarumbeetadu dabér doó /iyáy, nee tari tseé' ar afór ur tawa kaahi, «Lawaalarí ar AAKOÓ MUNGÚ nee ar Gideoni.»

²¹ Umuúqo heewo ina sihhiít dirós i alé as xafaydá' kuwa harweeri. Slaqwaruusér Midiani iri góp i hara uuamiín.

²² Qoomár múk Gideoni tarumbeétadaá tsiire tám ngiwa ufaahhiyé', AAKOÓ MUNGÚ tlaahhi gari kwaáhh dír slaqwaruusér Midiani, tiri kilooín mutiné' ar paangadu. Inooín tana ta'aaín tay saweés ay Bet-shita geeraá Serera, ay Abel-Mehola iisaapoó Tabati.

²³ Naagáy, afo kari ilahaniís amór tlahh'aá Naftali nee Asheri nee bihhe tsaraawo ar Manase kari ateét, múk Midiani kuri aluú wa guús.

²⁴ Gideoni iri ya/abín ay yaamuudaá tlom'i awa Efraimu iwa kaahi, «Qwalaasé' /akumitaré' as nee múk Midiani tawa slaqwaan. Wa/aamedár ma'aay kay hhekiiti hayoohare' tam ay Bet-bara nee yaaér Yordaniro sleeme.» Naagáy múk Efraimu sleémeero kuri dinkwárí ateét, wa/aamedár ma'aay ki hhekiiti ngiri hayoohiyé' ay amoodár Bet-bara tam ay yaaér Yordani sleeme.

²⁵ Inooín waawituú tsár oo múk Midiani nguri ohiné', waawitaádá' a Orebu nee Se'ebu, Orebu kuri gaás didá' ta bay tlaa/ár Orebu, nee Se'ebu kuri gaás didá' mamaá sabiíbu kiwa tsoo/a/iti ar ta bay Se'ebu. Inooín tana kumiít múk Midiani gusisiingo nee ságw Orebu nee oo Se'ebuwo kiri huúw amór Gideoni. Qoomaadae Gideoni i gayuú da/aáw oo yaaér Yordani.