HAR'OHUUSE 5 - Biblía Axweesantá Hhohho' ar Mungú 2004

Daa'ángw Debora nee Baraka

¹ Aluuwo baalaadár kilae Debora nee Baraka garmoó Abinoamu daa'angwí nguri daaiyé', daa'angwí i kaahi,

² «AAKOÓ MUNGÚ xirfayeemisaak! Geeraharuuse múk Israeli guri geerahát baraá slaqwara, nee muu tina haniís ar sla'aarir'ín.

³ «Kuungaásingaá waawitá axaasé' nee kuungaásingaá múk urén iia qaasaak, aníng AAKOÓ MUNGÚ u sadaá', an daá' ar afór hhohho' dír AAKOÓ MUNGÚ, Munguú Israeli.

⁴ «Aá AAKOÓ MUNGÚ, qoomár tawa Seirír dahh, qoomár tawa Edomúr dahh, yaamu nay daaraxaatiyé', doori ma'aay ngay paahhamiisiyé', eeít, huunkáy tluwaay nguri paahhaás.

⁵ Tlom'i niri diingitiyé' dír geeraá AAKOÓ MUNGÚ wa ale, eeít, tloomár Sinai ina diingít geeraá AAKOÓ MUNGÚ, Munguú Israelír wa ale.

⁶ «Qoomár deelór Shamgari, garmoó Anati, qoomár Yaeliro, waaraangír aauuse loohidá' gana meér, aauuse iri waráhh ar baraá sla/a.

⁷ Tam doosluuse ina suqút. Ina suqút baraá yaamaá Israeliro, ay qoomár kiíng Debóra niwa ti'ít, kiíngasír aayór Israeli.

⁸ Qoomár munguaá /aben ngiwa tsawaariyé', slaqwara niri ti'ít baraá ayko. Ala hee i deéro oo lawaala gaa taataahh, laqaá gaamboót, baraá tla/ángw slaqwaruusér kume mibeeri tsiyáhh ar Israeliwo?

⁹ Geeraharuusér Israeli ilaaín i iiqaytaaká, kudá' taa kilooín haniisiye' ar sla'aari baraá tla/ángw muko. AAKOÓ MUNGÚ xirfayeemisaak.

¹⁰ «Kaangwí ilaharisaak, kuungaásingaá daqaare awa daqwaayér /awak aga i tsa/aande', nee kuungásingá' iwaawitá' baraá hhafetaá tlaxo gawdén wa alé, tam kuungaásingá' hi'iimitá' lohuuwo, kangwsíng alki/itaak.

¹¹ Afór boo/oó muu oo dír hhaleerí iiárií qaasaak, arba/atír AAKOÓ MUNGÚ ngin alki/iitiyá', nee arba/atír doosluuseerós ar Israeli. Aluuwo múk AAKOÓ MUNGÚ niri baraá gixsar'ínií /eét.

¹² «Tlawáng, tlawáng, kiíng Debóra. Tlawáng, tlawáng daa'aangw daaeek. Tlawáng, kuúng Baráka garmoó Abinoamu, haasaánguuwók ar tlaweek.

¹³ Kudá' pihh'uumár koomá' nina aweeriyé'. Múk AAKOÓ MUNGÚ ina tláy as nguwa aleeslaqwiya', dír múk /uuruú kooma.

¹⁴ Nina aweeriyé' iimír Efraimu wa alé ay xatstá Amaleki, hhaeeín awa múk Benyamini ngay eehariyé', iimír Makiri wa tleemu slaqwaruuse nina awét, iimír Sebuluniro a múk urén nina aweér.

¹⁵ Múk urén oo Isakari nee Debora tina alkoné', múk Isakari ina iialooeés dír Barakáwí ale, nari aluuwós wa fi'iitiyé' ay baraá xatsa. Ala baraá tla/ángw tlahhoó Reubeniwo babaqaamis ku úr.

¹⁶ Gár nisa meetiyé' baraá maray'íní ale a milá? As /aa/aá bee/aangw ngiwa axamisiía? Ala baraá tla/ángw tlahhoó Reubeniwo babaqaamis ku úr.

¹⁷ Múk yaamaá Gileadi ina meét gayuú Yordani. Tlahhoó Dani, asma milá masa meté' baraá miringe? Tlahhoó Asheri ina meét afaá tlawi, nina iwiiwitiyé' dir'ín tidá' wa alé.

¹⁸ Ala tlahhoó Sebuluni a múk hhiintleemoín gaa lak tsiqiit as slaqwara. Nee tlahhoó Naftali tsaxwa kina wa /akumiít baraá slaqwarár wa ale.

¹⁹ Waawitá ina slaqwarár áy, an qoomár waawituú Kana'ani iwa slaáqw nee xoorór Israeli baraá Ta'anakír wa ale, afaá kutltá Megido. Tam haasaánguú peésa oo taa sláy i káhh.

²⁰ Tsatse/uú gawaá doori ina dinku'uús baraá slaqwararo, loohir'ín gana eehár tari slaáqw nee Sisera.

²¹ Yaaér Kishoni giri ar wá/ amór saáw i alé, eeít, ma'aá yaaér Kishoni ngiri ar wa/iyé'. Aníng an geerií kumiít ar pihh'uuma.

²² «Aluuwo faras niri hardáh ar kididiheliingw, i yaamaá kal/án ar fuqeeni'ín.

²³ «Malaykamoó AAKOÓ MUNGÚ i kaahi, ‹Merosi lu'usaak, yaamuloouuseerós, lu'usaak sleeme, asma AAKOÓ MUNGÚ ngwaa alee/isár ay'iiká, qoomár iwa slaqwi nee slaqwaruusér /uureemaá koom.›

²⁴ Yaeli harér Heberi oo tlahhoó Keni ka tsuuqi ta /ameena sleémeero. Ka tsuuqi ta /ameena sleémeero ar baraá heémár hoota.

²⁵ Sisera gana firín ma'aywo, ala inós guna ilwáy hanís, guna di/tá /awák i hanís ar baraá slooqamoó hhoohhoó'.

²⁶ Ina tlangarereeít kiki'ír heéma gari taatáhh, ar dakós oo doó /iyayhe yuúnduú kareeramo guri ót. Eeít, kiki'idá' gari sláhh gawaá gitsee/a, gway saga ma/afuúr.

²⁷ Sisera iri xupuú' iri huú', iri qaát dír ya'aá Yaeli. Didaádá' i xupuú' an dír i huú', iri gwaá'.

²⁸ Aayór Sisera ina pa/aángwár harqaytsít, ina harqaytsimít iwa kat, ‹Ahaá waáy gaárirós misinda tlík? Ahaá baré ka/ka/eelíngw farsuuwós naa adaá/?›

²⁹ Mu/aywatsa gay tleér dír /ameenár sageeloén wa ale. Tiri kilós gurkwa/ás ar mu/aywatstadá'.

³⁰ Iri ó', ‹Doóqa haasaáng ngun qasmiisiyá', umuú slaqwarusmoowo dasír wák laqaá tsár nee tlabaá daqaari'iima as Sisera, nee kudá' taa qaalín, nee himtaawér tsár ar aa qaalín as iste'eé'.›

³¹ «Aá AAKOÓ MUNGÚ, wakuuseerók sleémeero i hhaan. Ala mulqeerók masók i gwa/át adór tsee/amá qoomár bindi tsirariihh.» Yaamu wayda nguri slayé' har afiqoomár kureerí mibeeri tsiyahhe.