HAR'OHUUSE 3 - Biblía Axweesantá Hhohho' ar Mungú 2004

Xoordaá naa meetiye'

¹ Xoorduuká' an kudá' AAKOÓ MUNGÚ aa máy, as múk Israeli kudá' slaqwarár yaamaá Kana'ani ga xuaaká nguwa iiari.

² Adoorí gana tleéhh as kahhó' umuúqo qartá hi'iita ar múk Israeli slaqwara ngiwa intsahh, ak aleeró kudá' slaqwara ngi geerií xua'aaká.

³ Xoorduudá' taa máy an kuká': Ayeemaá kooán awa waawituú Filisti nee múk Kana'ani sleémeero, nee múk Sidoni, nee múk Hifi, kudá' baraá tlom'aá Lebanonír hootá', iimír tloomár Ba'al-hermonír wa tleemu ay Lebo-hamati.

⁴ Inós gina máy as múk Israeli nguwa iiari ar xoorduudá', as ngiwa tsaahhi, áx hara'ayár AAKOÓ MUNGÚ ngi iialoeesiía, tidá' aa baabi'ii'ín i oó' ar loohír Mose.

⁵ Aluuwo xoorór Israeli ina hót baraá tla/ángw múk Kana'anír wá ale nee oo Hiti, nee oo Amori nee oo Perisi, nee oo Hifi nee oo Yebusi.

⁶ Dasuú mukdá' ngway duxuutiyé', nee dasuuín oo kilá' kuna duxuút nee daaqoó xoorduudá', munguaá xoorduudá' ngiri sagadiyuusiyé'.

Har'ohusmo Otnieli

⁷ Múk Israeli adór slasla/aar gana tleéhh dír ilaá AAKOÓ MUNGUHE, AAKOÓ MUNGÚ, Munguúín nguri gunqareesiyé', inooín munguiidá' ta bay Ba'ali nee Ashera ngiri sagadiyuusiyé'.

⁸ Gawaá adoorihe AAKOÓ MUNGÚ iri buúhh, múk Israeli guri máy kuwa baali, nee waawutmoó Mesopotamia oo ta bay Kushan-rishataimu. Múk Israeli Kushan-rishataimu nguri sagadiyuusiyé' ar har afiqoomár kureeraá dakaate.

⁹ Ala qoomár xoorór Israeli iwa /á/ amór AAKOÓ MUNGÚ, AAKOÓ MUNGÚ heé xoorór Israeli ga tuú/ guri sláy, heewí ku bay Otnieli garmoó Kenasi, hhiyoó niiná oo Kalebu.

¹⁰ Qeeruú AAKOÓ MUNGÚ Otnieli guri hatsiís, inós tari har'ohusmoó múk Israeli, iri slaqwarár áy. AAKOÓ MUNGÚ Kushan-rishataimu waawutmoó Mesapotamia guri gawaá dabaawós i qaás, inós Kushan-rishataimu guri baál.

¹¹ Yaamu wayda nguri slayé' ar har afiqoomár kureeraá mibeeri tsiyahhe. Aluuwo Otnieli garmoó Kenasi iri gwaá'.

Har'ohusmo Ehudi

¹² Aluuwo xoorór Israeli tlakweema giri malé tléhh dír ilaá AAKOÓ MUNGUHE. Gawaá adoorihe AAKOÓ MUNGÚ waawutmo Egloni oo Moabu guri /uurií haniís xoorór Israeli ngiwa baali, asma tlakweemaadá' naa tleehhiyé' dír ilaá AAKOÓ MUNGUHE.

¹³ Egloni xoorór Amoni nee Amaleki gana burumbuúr, tari slaáqw nee xoorór Israeli, xoorór Israeli kari baál. Inooín gixsadár slaansla ngari hayoohiyé'.

¹⁴ Xoorór Israeli waawutmo Egloni, oo Moabu guri sagadiyús ar har afiqoomár kureeri mibaá nee dakaát.

¹⁵ Ala qoomár xoorór Israeli AAKOÓ MUNGÚ nguwa i /á/, gina iiárií qaás, heé gi tuú/ guri sláy. Heewí an Ehudi, garmoó Gera, heé dawa bás, oo tlahhoó Benyamini. Looarka wake xoorór Israeli Ehudi guri ya/áp as ohme ngiwa huwi amór waawutmo Egloni oo Moabu.

¹⁶ Ehudi paángár afe tsár gana tleéhh, tlenaango a sentimiíta mibeeri kooán, gari tseék baraá afetloowós, bihhaá doó /iyáy, baraá guruú tlabaawós.

¹⁷ Aluuwo waawutmo Egloni oo Moabu guri ohmeérí huúw. Egloni a heé aa ló'wa wahhaar.

¹⁸ Ehudi ohme haniisaro ngiwa hhe'eés, mukdá' ohme ngaa huuw, guri báy, «Tlawsé' watlé'.»

¹⁹ Ala inós iwa hardáh dír tlaa/eedá' taa qaalín awa iisaapoó Gilgali, iri kií/ amór waawutmo Egloni guri báy, «Aá waawutámo /aymuuwók kooko oo naaqo u koóm.» Waawutmo sagadiyuseerós gari báy, «Quutlé'.» Inooín niri tsee/ií ti'iitiyé'.

²⁰ Ehudi iri tseewúy amór waawutmo gawaá siitsana, didá' tsa' waawutmo iwa fur'ár /ayi, guri báy, «Ya/abtoorók tooka a koóm ar amór Mungú daahh.» Waawutmo nina gawaá kitaangós wa tláy iri sihhiít.

²¹ Ehudi ar dakós oo doó basayhe paángarós ngina duúx bihhaá doó /iyáy wa alé, Egloni guri gura' muút.

²² Paangadá' ina qupu/út, tam kipaywós sleeme iri dáh baraá gurií alé, di/i paángadá' gari ót. Asma Ehudi paánga gaa duuxiiká, saanka nari tsee/ií wá/.

²³ Aluuwo Ehudi iri afeenírí ti'iít, afér do' gari alií tseék.

²⁴ Ehudi iwa tláy, sagadiyuusér waawutmo iri kí/. Ngiwa ariyé' adór afér do' kara tseék, tari oó', «Doóqa aako aa sla/atá slahhtá áy.»

²⁵ Tari damraarán naxés aako afkú do' gu gwediitiiká, niri xuruutiyé', naagáy gweermo ngiri taataahhiyé' afkú do' kuri gweér, naxés aakooín aa huú' baraá tleera, slám aa gwaá'.

²⁶ Qoomár mukdá' iwa daamaaran, Ehudi iri /akuút dir'ín wa ale, iri waaraáhh ar gawaá tlaa/eedá' taa qaalín, iri tiaaín ay Seira.

²⁷ Iwa hardáh baraá yaamaá tlom'aá Efraimuwo, tarumbeéta gari ufaáhh. Ehudi xoorór Israeli gari geerahaár, niri al'aweeriyé' gawaá tloomár wa ale.

²⁸ Giri báy, «Aníng na eeharaaré' asma AAKOÓ MUNGÚ wakuuserhúng tidár Moabu ngaa gawaá dabaahúng i qaás.» Ehudi nguri eehariyé', tari /eét ay amór yaaér Yordani, didá' ta warhhaahhati ar ya'a', ngiri hayoohiyé', ngiri tseegiyé', tam heé wák aa waarahhiiká.

²⁹ Baalaadae hhawaataá kume mibaangw awa Moabu kina tsuú/, slám sleémeero a tlaa/aá tawo, tam panmo aa meetiiká.

³⁰ Naagáy múk Moabu kuri baál nee xoorór Israeli, har kureeraá mibeeri dakaate, yaamu niri amohhoouyé'.

Har'ohusmo Shamgari

³¹ Alaá Ehudiwo Shamgari garmoó Anati kitángw Ehudi guri óh, múk Filisti oo tsiire lahhoó' guri tsuú/ ar hhartá i hikwár de'en. Inós xoorór Israeli sleeme gari tuú/.