HAR'OHUUSE 21 - Biblía Axweesantá Hhohho' ar Mungú 2004

Tlaawoó tlahhoó Benyamini

¹ Múk Israeli lo'o kana /aáy dír Mispár wa ale tari oó', «Hee tumu wák miwa ya/án dasiirós kawa duuxi nee heé tlahhoó Benyamini.»

² Naagáy múk Israeli tari tláy ay Beteli dír geeraá Mungú, tari didií iwiít iimír matlaatlér wa tleemu ay tsiindo. Inooín tana tseeamín ar afór ur nee tana /aa/amín ar gurhaami.

³ Tari oó', «Aá, AAKOÓ MUNGÚ, Munguú múk Israeli, ahaá gaarí mista sleér ar tlahhoó wák iwa kahhi baraá tlahh'aá múk Israeliwo?»

⁴ Matlaatlér boo/e muu ina tseewa tláy, kitángw ilahhooa kuri tleéhh, ilahhooár da/a nee ar wayda ngiri haniisiyé'.

⁵ Naagáy tiri kilooín yaahamisiyé' tawa kaahi, «Xáy, baraá tlahh'aá Israeliwo tlahhoó aa daqayká dír geeraá AAKOÓ MUNGÚ i deéro?» Asma lo'o ngina /ayiyé' tawa kaahi, bar hee naa daqayká dír geeraá AAKOÓ MUNGÚ baraá Mispa gaasaro i harín.

⁶ Kár ala, múk Israeli gur'er'ín iri tleér daanduú tlahhoó Benyaminiwo tari oó', «Laarí tlahhoó wák oo múk Israeli kwaa hhaamiís.

⁷ Hamí daxta adór ta laqaan a adoomá, adór mukwí aa meet tlaawaay ngur slay. Asma lo'o aga qaroó /ayaán dír geeraá MUNGUHE ar dasuurén kuwa duxuutiiká nee inooín.»

⁸ Ngiri slaiyé' xu'utiro, áx tlahhoó aa daqayká i deéro baraá tla/ángw tlahh'aá Israeliwo baraá dinku'uumár Misparo. Ngiri tsaahhiyé' naxés baraá dinku'uumadae heé Yabesh-gileadi tumu wák oo naa daqay i kaahh.

⁹ Múk Israeli kuwa faár didár Misparo, naxés heé Yabesh-gileadi tumu wák oo naa daqay i kaahh.

¹⁰ Dinku'uumadá' slaqwaruusér kume mibaá nee tsár gari ya/áp, kari báy, «Tlawsé' múk Yabesh-gileadi tsu/aare', /ameena dinkwa nee na/iiwo.

¹¹ Bar aga hardaté' gár ta tlehha' a tí, hhawaate sleémeero hhaamiisaak, nee /ameena sleémeero tidá' nee hhawaate naa alqaqatine'.»

¹² Inooín baraá xooroodae dasuú nee hhawaate taa alqatiiká kway sláy oo tsiire tsiyáhh. Dasuuwí kunguri huúw ay Shilo tidár baraá yaamaá Kana'ani.

¹³ Naagáy dinku'uumadá' sleémeero ya/abuuse ngari ya/áp ar kángw wayda gu oo' dír tlahhoó Benyamini, kuduú baraá mar'ír tlaa/ár Rimoni.

¹⁴ Múk Benyamini tinday alií kií/, múk Israeli dasuudá' tinda ar waátl baraá slaqwarár wa ale oo Yabesh-gileadi kuri hanmiís dír múk tlahhoó Efraimu as tawa tlaaway'ín. Ala dasuudá' aa bu'utiiká tlaaway'ine.

¹⁵ Múk Israeli múk Benyamini guri gurtláy, asma AAKOÓ MUNGÚ wakaari ngiwa qaás tla/ángw múk Israeli nee oo Benyaminiwo.

¹⁶ Naagáy bariiseedá' aa didií burumburit tari oó', «Hamí daxta adór ta /iisaan a adoomá as hhawaateekaá tlahhoó Benyamini naa meetiye'. Asma dasuú tlahhay'ín kwa faák tsu/utaaro.

¹⁷ I ló'wa hariín hhawaateeká' naa meetiye' awa tlahhoó Benyamini iwa duuxuxuna', as tlahhay'ín miwa qwaár baraá tlahh'aá Israeliwo.

¹⁸ Ala dasuurén kuwa duxuuti i ya/aandaaká. Asma atén lo'o aga /ayaán hee dasiirós mingiwa haniís dír heé tlahhoó Benyamini.»

¹⁹ Niri inslawiné', adór deelodá' ur ar AAKOÓ MUNGÚ tidár Shilór wa tleehharumamiit umuú kurko nira naká/, gixsadá' bihhaá /iya awa Beteli. Gixsadá' i bihhaá da/aáw awa loohidá' ur ar naa Betelír wa tleer ay Shekemu, bihhaá basa awa Lebona.

²⁰ Gawaá adoorihe hhawaateedá' Benyamini kiri báy, «Tlawsé' baraá qamaá sabiíbu, dasu baraadá' wa giiraak,

²¹ daqaní ilakaaharu ku ló'wa tlehhá'. Dasuú Shilo birna tsee/ií ti'iít qoomár deelór ure barta ni/ín, kuungá' ta baraá qamaá sabiíbu wa ti'itá', umuú heewo dasi ngi oohi tawa hareerós. Aluuwo ta ki/á' baraá yaamaá Benyamini.»

²² Barnaxes baabi'ii'ín laqaá hhaeeín naa hardihiyé' as iwa gilna', atén i bawaan, «Atén kuungá' nu firimaán, múk Benyamini gurtlawaak /ameenarí ngi ar tlaye'. Asma baraá slaqwarár Yabesh-gileadiro tlaaway'ín ugwa slawaaniiká. Nee as adoorí kuungá' dasuuhúng kuwa hanisi'iiká lo'o nu eeraaká.»

²³ Múk tlahhoó Benyamini adoorí gari tleéhh, umuú heewo hareerós gari tsawaár dír dasuú Shilór wa ale kudá' ni/iím, nguri ar tlayé'. Niri watlayé' yaamuuín i ale, gixsaduuín ngay male tleehhiyé', niri hootiyé'.

²⁴ Deeloodár kilae múk Israeli iri waátl umuú heewo amór tlahhaywós nee dír do'ós nee dír muruuwós.

²⁵ Qoomaadae waawutmo i kaahh baraá yaamaá Israeliwo. Umuú heewo adoorós ar i slai gana tleéhh.