HAR'OHUUSE 20 - Biblía Axweesantá Hhohho' ar Mungú 2004

Múk Israeli i slaqwarár amohhe'eemiis

¹ Aluuwo xoorór Israeli iri ti'ít sleémeero, Dani ay Be'er-sheba dinkwa nee Gileadi, iri iwít iri qartlamít dír geeraá AAKOÓ MUNGÚ baraá Mispa.

² Geeraharuusér uren ar tlahhi'i sleémeero awa múk Israeli iri daqeér baraá dinku'uumár múk Munguhe. Inooín sleémeero a slaqwaruusér kume tsiire tsiyáhh ar ya'ár hi'iimiit ar xoslaá slaqwarár koom.

³ Tlahhoó Benyamini kaangwí guri axaás adór xoorór Israeli ira burumburít baraá Mispa. Xoorór Israeli iri ó', «Áx qwalaas, iiaarén qawaare' adór tlakweemaaká' nira tleehharumiitiyé' a adoomá?»

⁴ Heeduú Laáwi hhawaatuú /ameenidá' taa gaás, giri mu/aywaáts iri oó', «Aníng ana hardáh Gibeár baraá yaamaá Benyamini, aníng nee /ameenir'eé' ti koomaán tari deelaán.

⁵ Hhawaataá Gibea niri haratlayé' dír do'dá' ni deél, do'dá' ngway harweeriyé' bihhe sleémeero qoomár xweeraawo. Nina tsabiné' aníng iwa gaasiya', /ameenir'eé' ngari gaasiyé' ar tsaatu'uumar'ín.

⁶ Aníng /ameenir'eé' ngiri taataáhh, ngiri tlaáq umuúqo diqito'ooro, ngiri huúw baraá yaamu sleémeero awa múk Israeli, as gár tlaakw ar adór tí naa tleehhiyé', nee alsi'imuú adór kwí baraá Israeliwo.

⁷ Kuungá' xoorór Israeli, daxta axweesé' nee kwasleemarhúng tsataak.»

⁸ Mukwí sleémeero iri sihhiít adór heé wák ar ale tawa kaahi, «Tam heé wák oo waátl amór heémarós, laqaá tam amór do'ós i kaahh.

⁹ Ala gár ta tleehhaan dír múk Gibearo a tí, tsawdo an tleehhaán ar adór kir i haratlawaan.

¹⁰ Atén múk mibaangw un tsawaaraán baraá umuúqo múk tsiiruú wake, baraá tlahh'aá Israeli sleémeero. Nee múk tsiiruú wák un tsawaaraán baraá umuúqo múk kumuú wake, gadiyér'ín a muu nguwa muruú /aymár i huwiya', kudá' slaqwarár áw amór Gibeár yaamaá Benyamini as li/oó alsi'imuudá' nguwa buiya', nee gadaádá' tlaakw naa tleehhiyé' dír Israeli.»

¹¹ Hhawaatedaá Israeli sleémeero tiri doogiyé' tari dabe oohiyé' át heé wákár ale as gixsár Gibea kawa i haraatlay.

¹² Múk Israeli iri ya/abín amór múk Benyamini sleémeero tari oó', «Xáy, tlakweemaaká' tla/angwhúng i diriiá' a tlakweemaá adoomá?

¹³ Mukwí aa hhiturumiit baraá Gibearo duuxare' as kuwa tsu/aan nee tlakweemaaká' kiwa hingeesaan baraá Israeliwo. Ala tlahhoó Benyamini kángw hhaeeín kwa ya/aniiká.»

¹⁴ Múk Benyamini tiri doók baraá gixsár Gibea, nina baraá gixsaduín wa tlayé', tawa slaqwarár ay nee múk Israeli.

¹⁵ Múk Benyamini iri buruumburiít baraá gixsaduuín wa ale. Dinkwaaro a kume mibeeri tsár nee lahhoó', múk slaqwarár paangadu ga baál nee yaamuloouusér Gibea tidá' aa burumburit a tsiire faanqw ar taa tsawaár.

¹⁶ Baraá mukwí sleémeero hhawaataá tsiire faanqw i dayá', awa taa tsawaár awa dabe bás. Umuúqo heewo tlaa/ano guna tsaxaár ar kukumaayi, tam se'eemír wák gaa dakusiiká.

¹⁷ Múk Israeli kuna dimbé faár dír múk Benyaminiro, a hhawaate kume tsiire tsiyáhh awa paangadaá koomá', sleémeero a miguusér slaqwara.

Israeli tawa slaáqw nee Benyamini

¹⁸ Xoorór Israeli iri tleér tay tsa/án Beteli, Mungú nguri yaahasiyé' kuri báy, «A heemá oo geerií tláw direne baraá slaqwarár nee múk Benyaminiro?» Aako giri báy, «Yuda i giirin.»

¹⁹ Múk Israeli matlaatleero tay tláy, heemaduín kay siíhh iisaapoó gixsár Gibea.

²⁰ Múk Israeli niri ti'iít as tawa slaqwi nee múk Benyamini, didár iisaapoó Gibeár wa ale.

²¹ Múk Benyamini niri ti'iít Gibeár wa alé slaqwaruusér Israeli kari hhaamiís muu kume mibeeri tsár nee tsár baldár kilae.

²² Múk Israeli aa mune si'iiká tiri amohhe'eesiye' bál tsare Gibeár wa alé.

²³ Múk Israeli tay gáwtí tsa/án tari /aa/amín dír AAKOÓ MUNGÚ ay tsiindo tawa kaahi, «A tlawaána tawa slaqwaan nee hhaeerén awa Benyamini.» AAKOÓ MUNGÚ giri báy, «Tlawsé' slaqwé' nee inooín.»

²⁴ Bál tsare múk Israeli iri tseewúy amór múk Benyamini as tawa slaqwi.

²⁵ Múk Benyamini iri Gibeár wa ti'iít as tawa slaqwi nee inooín wa'aá tsare, muu kume mibaá nee dakaát oo slaqwaruusér Israeli kuri hhaamiís malé alé. Mukwí sleémeero xoslaá slaqwara gi kón.

²⁶ Xoorór Israeli sleémeero nee muu sleémeero tari tsa/án Beteli, tay tsuunqumiís amoodá' wa ale, tay gwaawín ay tsiindo, nee AAKOÓ MUNGÚ nguwa i /aa/amina'. Ilahhooár da/a, nee ilahhooár wayduuwo kari haniís dír AAKOÓ MUNGÚ.

²⁷ Xoorór Israeli Aakoó MUNGÚ gway yaahás, asma sandakmoó alqadór AAKOÓ MUNGÚ i amór Beteli.

²⁸ Finehasi garmoó Eleasari garmoó Aroni a heé sihhimiít dír geeraá sandakmoodá' wa alé deeloodae. AAKOÓ MUNGÚ kuri yaahaás tari oó', «A malé tlawaána as tawa slaqwaan nee hhaeerén awa Benyamini, laqaá i mawaán.» AAKOÓ MUNGÚ giri báy, «Tlawsé', tsa/amé', asma matlo aníng ngi gawaá dabaahúng i qaás.»

²⁹ Múk Israeli iri tsa/án Gibea tari nahhaát, gixsár Gibea kari harweér bihhe sleémeero.

³⁰ Múk Israeli iri tsa/án tawa slaqwi nee múk Benyamini bál tame. Tiri amohhe'eesiyé' as tawa slaqwi nee Gibea, ar adoodá' tara slaáqw geeradae.

³¹ Múk Benyamini tay tláy as iwa slaqwiya' nee inooín, kiri ar goów as tawa saweesi dír gixsadae. Slaqwara kay iimu/ún, tay tsu/uút baraá mukwihe múk mibeeri tám oo Israeli kuri tsuú/ adoodá' naa tleehhiyé' qoomár hatlae. Dír kiwa tsuú/ a baraá lohaá uren awa Beteli nee Gibea, nee tidá' baraá xatstá kaw.

³² Múk Benyamini iri oó', «In male muxaán adoodár geeraá wa ale.» Ala múk Israeli iri oó', «Gusé' a ta'aimaán, i ar guwaán ay baraá loohír ur, as gixsa ngiwa geexaya'.»

³³ Múk Israeli sleémeero wa/ameedá' ti amohhe'eesii'i nari ti'iitiyé', tiri amohhe'eesiyé' amór Ba'al-tamari wa alé. Nee múk Israeli kudá' baraá giiroórí dirií' niri ti'iít ar gaanslaay bihhaá /uwa awa gixsár Geba.

³⁴ Múk kume mibaangw oo taa tsawaár baraá Israeliwo tay tsa/án Gibea. Ala slaqwara baalaadae i ló'wa xarásl, ala múk Benyamini gaa xuiiká adór qoomár hhaamiisar'ín nira tseewuúr.

³⁵ AAKOÓ MUNGÚ múk Benyamini gway muúx geeraá xoorór Israeli wa ale, xoorór Israeli hhawaataá kume mibeeri tsár nee kooán nee tsiiruú wák awa Benyamini kina hhaamiís baalaadae, kuká' sleémeero slaqwara ngi baaliyá'.

³⁶ Naagáy múk Benyamini gari ár adór kira baál. Múk Israeli ina alií kií/, asma múk naa harahhifiyé' a hhaeeín kudá' taa qaás baraá giirór gixsár Gibea.

Slaqwaruusér Israeli adór ira baaliín

³⁷ Kudá' baraá giirór diriiá' niri gaansluutiyé' gixsár Gibea kay haraadáh, muu kuri hhaamiís ar paangadu.

³⁸ Ala layár taa al'axweés tla/ángw kudá' gigidiimá' nee múk Israeli a tí, bar quuír ur aga aandé' ar adór huunki i gáwtí tsa/aa/aán baraá gixsarihe,

³⁹ daqaní gixsa qoomaadae ka i haraatlay. Múk Benyamini múk Israeli oo kume mibeeri tám kwa qaroó tsuú/, niri kaahiyé', «Iga malé lawaán adoodár geeraá wa ale.»

⁴⁰ Ala qoomár huunkidár quui iwa gáwtí sihhít baraá gixsaro, múk Benyamini tay alií qaytsiít, naxés gixsa sleémeero quui gaa altinghít, i gáwtí tsa/a/aán ay doori.

⁴¹ Múk Israeli tay warqáy, múk Benyamini tari da'ayuút, kari tsaáhh adór qwanay'ín nira hamaár.

⁴² Naagáy nay warqayé' geeraá múk Israelír wa ale ay loohír baraá darma. Ala naxés gár taa ár a inooín kiwa harweér nee buhhaá tsár awa slaqwaruusér múk Israeli. Mukdá' naa baraá gixsár wa ti'iit múk Benyamini gway hhaamiís baraá tla/angw'íní ale.

⁴³ Múk Benyamini kway /amatseék bihhe sleémeerowo, kuri guús ay Noha kiri saweés gixsár Gibearo da/aáw, kudá' na hungu/umisiye' kiri kala/án.

⁴⁴ Múk Benyamini oo ta daáhh a kume mibaá nee dakaát, sleémeero a hhawaataá miguuse.

⁴⁵ Naagáy múk Benyamini iri warqáy, iri ta'aaín ay darma, tari hardáh ay tlaa/ár Rimoni. Múk kume kooán kuri tsuú/ baraá ti'iíngwí ale, múk Israeli baraakadár hatlá' ar Benyamini kari alkón ay Gidomu, múk kume tsár kway tsuú/.

⁴⁶ Múk Benyamini oo baalaadae taa daáhh a kume mibeeri tsár nee kooán, oo slaqwarár baál, kuká' sleémeero a miguuse.

⁴⁷ Ala hhawaataá tsiire lahhoó' nay warqayé' nay ta'ainé' ar darma amór mar'idár tlaa/ár Rimoni, nay baraá mar'idá' wa hootiyé' har afiqoomár slahheeraá tsiyahhe.

⁴⁸ Naagáy múk Israeli múk Benyamini kuri hara warqáy kway eehár, sleémeero kiri tsuú/ ar paangadu, hhawaate nee /ameenaro, nee na/iiwo nee makaywo. Slamí umuúqo gixsár naa arii'i kana ásltií oohiís.