HAR'OHUUSE 2 - Biblía Axweesantá Hhohho' ar Mungú 2004

Malaykamoó Mungú múk Israeli nguwa naanaáq

¹ Naagáy malaykamoó AAKOÓ MUNGÚ iri iimír Gilgalír wá waatláy ay Bokimu, múk Israeli guri báy, «Aníng kuungá' nuna waatleés iimír yaamaá Misri wa alé, nuri huúw baraá yaamuudá' naa lo'ór wa /aáy ngiwa haniis dír baabi'iihúng. Aníng ana oó', ‹Alqador'eé' a baloó warqeesaaká,

² nee kuungá' al'axweesani ma tleehhara' nee yaamuloouusér yaamuuká'. Kiteeri'ín awa ilahhooa kawa hanmiisi na fee/aak.› Ala afor'eé' kay axasi'iiká. Xáy, adoosíng gár kasa tlehhé' a milá?

³ Gawaá adoorihe hamí aníng an kah, án muksíng u guusaaká dír ilaahunge, ala in adór laqaya' tleehhitiyá' baraá slaqoohunge, nee munguii'ín nuri baraá iiara'adií dahaasiyá' oo kiwa sluufmisuú eera'.»

⁴ Alaá malaykamooduú AAKOÓ MUNGÚ /aymi'iiká' ooaro ngiwa hhe'eés dír múk Israeli sleémeero, mukwí afor'ín ngiri tleesiyé' tari /aa/amín.

⁵ Inooín umuú didá' kway báy Bokimu, amoodae ilahhooár muruú ta tsu/i ngiri haniisiyé' dír AAKOÓ MUNGÚ.

Gwa'arár Yoshua

⁶ Naagáy Yoshua iri ya/án xoorór Israeli sleémeero iwa ki/ amór yaamuuín, umuú heewo ina tláy yaamuuwós ngiwa i ki/i, as tawa aalin umuú heewo nee dirós.

⁷ Múk Israeli AAKOÓ MUNGÚ guri sagadiyuús deelo sleémeero ar Yoshua nee deelór bariiseedá' aa kumit alaá Yoshuawo, nee kudá' gadiyér AAKOÓ MUNGÚ nga ariye', tidá' aa tleéhh as múk Israeli.

⁸ Aluuwo Yoshua garmoó Nuni, sagadiyusmoó AAKOÓ MUNGÚ, kureeriiwós tawa tsiiru nee mibaangw iri gwaá'.

⁹ Inooín ngway fooliyé' dír digmuú aalirós baraá Timnat-heresi, baraá yaamaá tlom'i awa Efraimu, bihhaá /iya awa tloomár Ga'ashi.

¹⁰ Slám muu sleémeero oo qartadá' iwa faakiís, qartá hatlá' niri aluuín wa iitleér ar AAKOÓ MUNGÚ gu xuaaká, tam gadiyeédá' aa tleéhh as múk Israeli ngi xuiaaká.

Múk Israeli iwa dee/aanuút dír Munguhe

¹¹ Múk Israeli tlakweema kina tleéhh dír ilaá AAKOÓ MUNGUHE, inooín Ba'ali ngway sagadiyuusiyé'.

¹² AAKOÓ MUNGÚ nguna mayé', Munguú baabi'ii'ín, kudá' ngaa huuw iimír yaamaá Misrír wa ale, munguidaá hatlá' ngiri sluufmisuú ayé', kudaá mukdá' dír iisaapay'ínií dirií', nina xupapu'uuyé' geeraaíní ale AAKOÓ MUNGÚ nguri kwatiitiyé' ar tlehhmuuín kwí, iri qa/iít.

¹³ AAKOÓ MUNGÚ nguna mayé', Ba'ali nee Ashtaroti ngiri sagadiyusiyé'.

¹⁴ AAKOÓ MUNGÚ iri qa/iít buhhtaawo dír múk Isreli. Inós giri qaás gawaá dabaá mukdá' gaa i haraatlay. Inós gina ya/án kiwa arba/i nee wakuuser'ín bihhe sleémeero, tam sihhtanór geeraá wakuuser'ín ngiri harslaaqatiyé'.

¹⁵ Umuúqo slaqwarár taa ayi AAKOÓ MUNGÚ gina ya/an kiwa baali, ar adoodá' ngira oó', nee ar adoodá' lo'o ngira /aáy, inooín niri ló'wa amoqwaariyé'.

¹⁶ Aluuwo AAKOÓ MUNGÚ har'ohuuse gari ya/aáw as mukwí nguwa tu/ gawaá dabaá hoomaadá' gaa ar tleeri.

¹⁷ Ala inooín har'ohuuseerí nga iiárií qaasi'iiká. Asma Mungú nguna geexayé', nee munguaá hatlá' ngay sluufmisuú aa'ayé'. Inooín nina warqayé' ar gaanslaay, lohdaá baabi'ii'ín naa eehariyé', ngiri mayé'. Baabi'ii'ín AAKOÓ MUNGÚ nguna ilaiwawa/iyé', ala inooín adoorí nga tleehhi'iiká.

¹⁸ Nee umuúqo qoomár AAKOÓ MUNGÚ har'ohusmo nguwa ya/aawi, AAKOÓ MUNGÚ a dinkwa nee har'ohusmoodá', AAKOÓ MUNGÚ múk Israeli guna ba/amís baraá dabér wakuuser'ín wa alé, deelo sleémeero ar har'ohusmoodá' iwa slafi. Asma AAKOÓ MUNGÚ kuna gurtleés nee /aa/eeín, as adoodá' kiwa slahh'eemiís nee kiwa baramaanuús nee wakuuser'ín.

¹⁹ Ala qoomár har'ohusmoodá' bira gwaá', inooín nin alií ki/iyá', tlakweema ngin male tleehhiyá', baabi'ii'ín ba/a, munguaá hatlá' ngin eehariyé' nee ngin sagadiyuusiyá', nee ngin i tumbarara'amiitiyá'. Tlehhmi'ii'ín kudá' tlakw nga mayi'iiká, laqaá tam saga gawdeemaaín nga mayi'iiká sleeme.

²⁰ Naagáy AAKOÓ MUNGÚ iri ló'wa qa/iít buhhtaawo dír múk Israeli, inós iri oó', «Xooroorí alqaduueé' kudá' naa baabi'ii'íní oó' gina haaliín, asma afor'eé' ngaa iiárií qaasi'iiká.

²¹ Gawaá adoorihe iimír hamí xoorduudá' Yoshua aa meetiís qoomár iwa gwaá', aníng tam xoorór wák a guusaaká,

²² as kahhó' aníng múk Israeli nguwa iiar ar xoorduuká', áx loohir'eé' ngi eehariía adór xwayliitér'ín wa ale, láq aasla'áy.»

²³ Naagáy AAKO xoorduudá' giri máy, sleeme ga guusiiká ar gaanslaay, sleeme ga hanisiiká gawaá dabaá Yoshua.