HAR'OHUUSE 19 - Biblía Axweesantá Hhohho' ar Mungú 2004

Heé tlahhoó Laáwi nee /ameenirós ar quturmo wasl

¹ De'emudae waawutmo i kaahh baraá Israeliwo, heeko wák oo tlahhoó Laáwi ina hoót ar dah'iima baraá darmuú yaamaá tlom'aá Efraimu wa ale. Inós /ameenirka baraá Betilehemúr Yuda gay duúx tawa /ameenirós ar quturmo wasl.

² Aluudae /ameenirí iri kumít baraá fuqtá wa ale, heeduú tlahhoó Laáwi gway geexeér, iri wátl amór doó baabuúwós baraá Betilehemúr Yuda, iri amoodá' wa hót slahheeri tsiyahhe.

³ Hhawaatuuwós gari eehár tawa axweesi ar sla'aari, nee inós ngiwa malé sla'atisi. Hhawaatuudá' nee sagadiyusmoowós ti koná'. Daqwaayeerós ar tsár ga kón. /Ameenirí guri dah'ís dír doó baabuúwós. Baabá nguwa ár iri ló'wa qwalaá/ as tiwa ariyé' nee inós.

⁴ Baabuú /ameenidá' guri ilaá/, tay hoót amoodá' wa ale deelo tame, tay /ayín tay wahán.

⁵ Bál tsiyahhe matlaatlér boo/e tari tseewa daarkiít, inós iwa tlatlay, baabuú /ameenidá' guri báy, «Lakiít muruú /aymár niiná /ayeek, tla/aangw ooheek, daqaní ta tleér.»

⁶ Inooín tsaraawo tay /ayín, tay wahán dinkwár wa ale, baabuú /ameenidá' guri báy, «Na'ás, masók tu amohhoó' xweerakaá laarihe tawa deelaan, ma gurboo/awaar.»

⁷ Heedaádá' iri sihhiít iwa tlay, baabuú /ameenidá' guri malé harhheehhe'eés iwa deeli, iri deél.

⁸ Bál kooán matlaatleero iri tseewa daarkiít as iwa tlay, baabuú /ameenidá' guri báy, «Na'ás, /ayiím, lakiít ay dír tsee/amá i /uwá xui.» Inooín tsaraawo tay al/ayín.

⁹ Heedaádá' iwa sihhiít as iwa tlay nee /ameenidá' nee sagadiyusmoowós, baabuú /ameenidá' guri báy, «Qaytsiít, looa aa dát, iimi a tsiindo, kuúng diirí i deelang, ma gurboo/awaar, matlaatleero ta tseewa tleér as tawa hardat amór doohúng.»

¹⁰ Heedaádá' aa ya/aniká deelooro, ina sihhiít iri tláy, iri hardáh iisaapoó Yebusi (gídaabá Yerusalemu), inós nee daqwaayeerós tidá' tsare nee /ameenidá' nee sagadiyusmoowose.

¹¹ Qoomár tawa nakaá/ Yebusi, naxés looa i darát, sagadiyusmoodá' aako guri báy, «Na'ás a deelaán baraá gixsár múk Yebusi.»

¹² Ala inós iri oó', «Atén a paslanaaká tay deelaán baraá gixsár dahaaye, gixsár múk Israeliwooká, ala an waarahhaán ay Gibea.

¹³ Qwalaas a miniqaán as tawa tseewuwaan dír gixsár wákií ale tari qaataán Gibea laqaá Rama.»

¹⁴ Niri kumiitiyé' geerií aleeró, looa giri alee dát tawa nakaá/ Gibeárí alé, gixsár tlahhoó Benyamini.

¹⁵ Tay paásl Gibeárí ale as tawa deeli. Iri dáh, iri iwiít dír tlahhoó muu iwa iwaawiti, asma hee tumu wák oo gaa dah'is i kaahh.

¹⁶ Naxés aakoó aa uray nina hardáh, i gadiyér daahh baraá qaymoorós qoomár tsiindoowo. Aakoowí a heé yaamaá tlom'aá Efraimu. Inós i Gibeár wa hoot, yaamaá dah'iima. Yaamuloouusér yaamuudá' a múk Benyamini.

¹⁷ Inós iwa qaytsiít, heé aausmo guna ár aa iwiít dír tlahhoó muu iwa iwaawiti. Aakoowí guri yaahaás, «Amór ta keer a amá, nee amór ta dahh a amá?»

¹⁸ Heedaádá' iri oó', «Atén a dahaaye, amór ta dahhaan a Betilehemúr Yuda, amór ta kawaan ka saaw, a baraá yaamaá tlom'aá Efraimu. Aníng ana Betilehemúr káw, tidár yaamaá Yuda. Ala aníng hamí an waátl amór dooeé'. Taa dahi'isiiká tam nee heé wák.

¹⁹ Gitso a koomaán nee muruú /aymár hatlá' oo daqwaaye. Mikaáte sleeme a koomaán nee difaáiro as aníng nee sagadiyuso'oorók nee masoomoowí. Gár hatlá' ar ta sla'aan i káhh.»

²⁰ Aakoodá' iri oó', «Wayda masók i dirhúng umuú gár ta sla'a a daanduueé', ala ma dír tlahhaywí deelaar.»

²¹ Giri dah'ís baraá do'ós, daqwaaye gay gitsór i haniís. Inooín ya'aaín ngiri hamatliyé', tay /ayín, tay wahán.

²² Qoomár tawa qwalaala/i, múk gixsadá' oo barawaslén doó heedaádá' nguna harweeriyé' bihhe sleémeero, nay ateetiyé' baraá do', tay axweés nee aakoó do' loó', kway báy, «Heedaádá' naa do'ógií qatuú ay, tsee/í duuxang as kahhó' nee atén tawa fuquusaan.»

²³ Heé do' loó' giri harati'iít tsee/í ale, giri báy, «Aasla'áy, a adoosingeeká, hhaee'eé', án kuungá' nu firiím, tlakweemaá adór kwisingá' mi baloó tleehhara', asma heewí a dahaaymoó dooeé', iringeésíng ma tleehhara'.

²⁴ Ala dasir'eé' i deer ar nee hhawaata naa alqati'iiká, nee /ameenír heewí ar quturmo wasl, aníng ngi tsee/ií duúx. Ar tlawaak, adór ta sla'a' inooín tay tlehhe'. Ala heewí mu gár tlaakw ar adór tisíngií tleehhara'.»

²⁵ Ala mukdá' iia gaa qaasiiká, slamí naa ya/ani'iiká. Aausmoodá' /ameenirós tidá' gay tsee/ií duúx niri fuquusiyé', ngiri tlehhmuú alsi'imií tleehhiyé' xweera sleémeero ay matlaatle. Iimi iwa pinsli'iimit ngiri geemayé'.

²⁶ /Ameenidá' iri hardát matlaatlér boo/e, iri yaamií hú' dír afkú do'dá' aakoowós i dirii'i, iimi niri /awaakuúr.

²⁷ Aakoowós matlaatleero niwa tláy, afkú do' nguwa gweér, iri tsee/ií ti'iít. Iwa qaytsiít, naxés /ameenirós tidá' aa hú' dír afkú do' dabaawós gaa qás gawaá duuxuutmo.

²⁸ Gari báy, «Góh a tlawaán!» Ala heé gwa mu/aywaats i kaahh. Gari tleés gari tsa/aás gawaá daanduú daqwaay, heewí iri tláy amór do'ós.

²⁹ Iwa dáh baraá do', tsataay guri taataáhh, /ameenidá' gari tlaáq umuú diqiito'ooro, diqay mibaá nee tsár, gari huúw baraá ayeemaá Israeli sleémeero.

³⁰ Mukdá' sleémeero adoorí gaa ar tay oó', «Kángw adór kwí aa baloó tleehharuutiiká, nee sleeme ugwa baloó araaniiká deeloorí sleémeero, iimír xoorór Israeli niwa baraá yaamaá Misrír wa ti'ít ay laarí. Kaangwí áx aldakwaak, ti gurbu'uunde' nee axweesé'.»