HAR'OHUUSE 18 - Biblía Axweesantá Hhohho' ar Mungú 2004

Mika nee tlahhoó Dani

¹ De'emadae waawutmo i kaahh baraá Israeliwo. Slám qoomaadae baraá tlahhoó Daniwo ta yaamaá leelehhiit awa ta hooti, asma ay qoomaadá' tlahhoó Dani kwa yaamií ka'aasiiká baraá Israeliwo.

² Múk tlahhoó Dani, múk kooán oo pihhuuse oo tlahhay'ín, nguri ya/aawiyé', múk baraá Sorarír daáhh nee oo baraá Eshtaolír daáhh, as yaamuudá' kiwa tsawtsawuusár ay. Kiri báy, «Tlawsé' yaamuusíng araare'.» Tari hardáh yaamaá tlom'aá Efraimu, tay hardáh doó Mika, tay didií deél.

³ Qoomár tawa hardáh dír doó Mika, afór masoomowí oo tlahhoó Laáwi ngina tsaahhiyé', niri amoorósí tlayé' kway yaahamiís, «Heé kuúng ugwa amoorí huuw? Gár kuúng ta tlehh a milá? Gadiyeérók a milá diirihe?»

⁴ Inós giri báy, «Muruú aníng nee Mika taa axweesaán i deer, aníng iga baraá gadiyeédí qaás, aníng a kaahamusmoowós.»

⁵ Inooín kuri báy, «Na'ás, kangwrén kwí dír Munguhe yaahasang, as kawa xuaan áx loohirén tí ta oohaan a gár wa slawaána.»

⁶ Kaahamusmoodá' giri báy, «Tlawsé' ar wayda, loohír tar ota'a AAKOÓ MUNGÚ nu de'en.»

⁷ Aluuwo mukwí kooán iri tláy, tari hardáh Laishi. Mukdá' baraadá' hoót kuri ár adór ir hooti ar saxareema, adoodá' múk Sidoni ira hoót, múk yaanda hhó' nee amohhoó' oo gár hee ga yaahamiisaaká. Asma gár giwa /aaruur i káhh baraá yaamuwo inooín a daqaare, slam inooín ki saaw dír múk Sidoniro, nee gár nee muu tiwa diitsiya' i káhh.

⁸ Naagáy tay kií/ amór hhaeeín kudaá Sora nee Eshtaoli, inooín kiri yaahaás nee hhaeeín, «Xayshé' minda aandé'?»

⁹ Tari oó', «Gimsé', tlawaaré', a slaqwarár awaán amór mukdá', asma yaamuudá' iga araán adór kir hhoohhoó'. Xayshé' ma tawoó hhawahhawaara', ma baabaqaamisaara'! Dahé', yaamu aalaak!

¹⁰ Bar aga tleeré' múk hoót ar wayda nee saxareemo un i hardatá'. Yaamuudá' ki ur, asma a yaamaá Mungú naa dabaahúngií qaás. Umuúqo gaaro i deer, umuú gár dáw baraakaá yaamuwo i /aaruraaká.»

¹¹ Múk tsiire lahhoó' oo tlahhoó Dani oo xoslaá slaqwarár koóm niri baraá yaamaá Sora nee Eshtalír wa tlayé'.

¹² Tari tsa/án gáwtí ale, xafaay nguri tleehhiyé' baraá Kiriat-yearimu, baraá yaamaá Yuda, an gár umuuwós kusa báy Mahane-dani tam ay laarí. Diirí i bihhaá /uwa awa Kiriat-yearimu.

¹³ Inooín tari waaraáhh ay yaamuudaá tlom'aá Efraimu, tari hardáh dír doó Mika.

¹⁴ Aluuwo mukdá' kooán yaamaá Laishi ngaa tsawtsawuusár aye', hhaeeín ngiri bayé', «Xayshé', kuungá' a xuá'a adór baraá do'koowo murslaaqatuú taa daákw kuri parootuús ar muqslír taa weeqatís i deer, nee slaqsa'aá hatlae nee naifeéra. Hám daxta kuungá' ma katá' adór ta laqaan.»

¹⁵ Tari warqáy tay tláy amoodií ale. Tari dáh baraá doó Mika, kangós kway yaahaás.

¹⁶ Mukduú tsiire lahhoó' oo tlahhoó Dani oo xooslár slaqwara gaa oh, taa sihhiít afkú do'.

¹⁷ Mukdá' kooán yaamuudá' gaa tsawtsawuusár ay, tana tsa/án tay dáh baraá do'duú murslaaqatuudá' taa tleéhh, nee kudá' taa daákw kuri parootuús, kuri duúx, nee naifeéraro. Qoomaarihe kaahamusmo i dinkwa nee hhawaateedaá tsiire lahhoó', kudá' xoosla ngaa oohiye', tari dír dahmaá afkú doó áy.

¹⁸ Tawa dáh baraá doó Mika, murslaaqatuudá' taa daákw oo taa parootuús nee naifeéraro nee slaqsoó hee kudá' taa tleéhh ar muqslír taa weeqatís, muruuwí kuwa ar tláy, kaahamusmo giri yaahaás, giri báy, «Kuungá' ma tlehhá'?»

¹⁹ Kuri báy, «Xasliít, afkók tsa/áy qaaseek, tlawáng dinkwa nee atén, kuúng direne ta baabá nee kaahamusmo, xáy ka hhoóe diroge kuúng tawa kaahamusmo as doó heé wák, laqaá tawa kaahamusmoó úr as tlahhaay nee mar'eefaá baraá Israeli.»

²⁰ Kaahamusmoodá' muunaáwós iri qwalaá/, inós naifeéra gari taataáhh nee murslaaqatuú taa tleéhh, nee murslaaqatuudá' taa daákw kuri parootuús, iri tláy baraá tla/ángw muu tiri alkoné'.

²¹ Tari warqáy tay tláy, na/ii'ín awa ninakw nee makay'ín awa de'eengw nee xosluuine niri geeraaín wa hi'iitiyé'.

²² Qoomár tawa tláy har afiqoomár hhawaaká doó Mikawo, múk inslaawoó doó Mika kuri ateét, múk Dani kuri aluú wa alkón kway loohírí aleesláy.

²³ Múk Dani kuri altseé', tari alií warqáy, Mika nguri bayé', «A milá kuúng misti alkoondá' nee amaqawár yaariir?»

²⁴ Mika iri oó', «Kuungá' munguiidá' aníng naa tleéhh ina ar tleeré' dinkwa nee kaahamusmo, ala gár aníng ni koom a milá? Slamí án kuungá' adór ir yaahasa' a adoomá?»

²⁵ Múk Dani nguri bayé', «Afoorók tisíng makawa axamiís baraá tla/angwrene, múk buhhtaá koóm muwa i hardáh, kuúng turi af'oh dinkwa nee múk do'ók sleémeero.»

²⁶ Múk Dani iri tláy. Mika ngiwa ár a múk inós gu baá/ /uuruuwo, iri warqáy iri kií/ amór do'ós.

²⁷ Inooín tidá' Mika aa tleéhh ngina ar tlayé' dinkwa nee kaahamusmoowós, nee inooín tay alhardáh Laishi, dír múk hoót ar yaandahhooa nee saxareema, kiri muúx ar paangadaá xaraaslá', gixsar'ín kay daá/.

²⁸ Ala heé mukwí gwaa tuu/ i kaahh, asma gixsadá' ka saaw dír Sidoniro, inooín ta algadiyumamisiká nee múk hatlá'. Gixsarí dír i diri' a baraá xatstá Bet-rehobu. Múk tlahhoó Dani gixsarí ngiri /abeesiyé' tleehhamooro, niri baraadá' wa hootiyé'.

²⁹ Gixsarí umuuwós kway báy Dani, as ooartá umuú baabuúín kudá' taa laqwaál nee Israeli. Umuú gixsarí geeraawo a Laishi.

³⁰ Múk Dani murslaaqatuudá' taa daákw kuri parootuús nguri sihhtisiyé'. Yonatan garmoó Gershomu garmoó Mose, inós nee na/iiwós kiri kaahamuusér wa qaás baraá tlahhoó Daniwo, ay qoomár yaamuudá' kiwa hayóh nee múk hatlá'.

³¹ Múk tlahhoó Dani murslaaqatuduú Mika aa daákw guri parootuús nguri sihhtisiyé', de'emaadá' sleémeero Doó MUNGÚ iwa baraá Shilórí dirii'i.