HAR'OHUUSE 17 - Biblía Axweesantá Hhohho' ar Mungú 2004

Murslaaqatuú Mika aa tleéhh

¹ Qoomaarihe heeko wák oo baraá yaamaá tlom'aá Efraimu i deer, umuuwós ku bay Mika.

² Looarka wake aayoorós gana báy, «Peésaadár kumuú wák nee tsiiru, tók tidá' taa fiís, kiíng heedaádá' kuri lu'ús, qoomaadae aníng a axamiís, ala aníng peésaadá' a koóm. Heé peésaadá' gaa taataahh a aníng.» Aayoorós iri ó', «Garmaaeé', kuúng AAKOÓ MUNGÚ u tsuuqi.»

³ Mika peésaadár kumuú wák nee tsiiru gari dír aayoorósí ki/ís, aayoorós guri beér, «Adór kuúng lo'oodá' uwa sleeraaká a tí: Peésaarí an paraátl as AAKOÓ MUNGÚ kawa murslaaqatúr tleehhi, nee peésaarí ngi amoorók i ki/ís.»

⁴ Mika peésaadá' ngiwa ki/ís dír aayoorós, aayo peésár tsiire tsár gana hanís dír kareeramo as murslaaqat nguwa tleehhi. Murslaaqatuuwí kuri qaás baraá doó Mika.

⁵ Heewí ta bay Mika, doó mungú nguwa sluufmiisi guna tleéhh, nee naifeéra gana tleéhh, nee slaqsa'aá munguaá hatlae, garmaawós gway kaahamusmoowós wa qaás.

⁶ Qoomaadae waawutmo i kaahh baraá Israeliro, ala umuú heewo tós tidá' i slai gana tlehhiít.

⁷ Qoomaadár kilae masoomoko wák oo tlahhoó Laáwi i deer oo baraá gixsár Daudi ar ta bay Betilehemu, ar baraá yaamaá Yuda.

⁸ Inós ina Betilehemúr wa tláy, dír hota gari leelehhtuú áy ayaá hatlá'. Baraá aaiiwós kukae doó Mika guri harati'iít gawaá tlom'iidaá Efraimu.

⁹ Mika guri yaahaás, «Kuúng dír niwa tleér?» Inós guri mu/aywaáts, «Aníng a heé tlahhoó Laáwi oo baraá gixsár Betilehemu tidár baraá Yuda. Gám aníng a heé dír hotaá leelehhiít.»

¹⁰ Mika iri oó', «Diirí wa hootang. Kuúng masók dir'eene a adór baabá nee kaahamusmoó dooeé', aníng kuúng u buú' ar parhheemaá mibaangw awa peésa umuúqo kurko, nee tlabaawo, nee muruú /aymaaroge.»

¹¹ Masoomooduú tlahhoó Laáwi iri ya/án iwa hooti nee Mika, inós tari adór garmoó Mika.

¹² Mika masoomoodá' guri kaahamusmoó wa qaás, iri do'ós wa hoót.

¹³ Naagáy Mika iri oó', «Daxta aníng kaahamusmo ugwa sláw oo tlahhoó Laáwi, AAKOÓ MUNGÚ aníng i tsuuq.»