HAR'OHUUSE 16 - Biblía Axweesantá Hhohho' ar Mungú 2004

Samson iwa baraá Gasa

¹ Looarka wake Samson ina tláy ay gixsár Gasa, amoodár Gasaro /ameenír tsaatuso'o gari sláy, nee inós tari alqaát.

² Múk Gasa kuri báy, «Samson i ayaawí dirii'.» Inooín niri giirór ayé' dír afkú gixsa, nguri damraarané' xweera sleémeero, as tawa kaahi, «Qwalaasé' u daamaán ay matlaatle, daqaní u gaasaán.»

³ Samson ina guú' ay xweeraá dakiing, tla/ángw xweeraawo iri tláy, afkú gixsa nee maandaarose nee duuxuuteero sleémeero gina tuú/, giri qaás gawaá sum'iiwós, giri huúw ay gawaá tloomadá' nee Hebroni ti ga/aawá'.

Samson nee Delila

⁴ Alaá tihe Samson /ameenír hatlá' gari slaá' ar baraá Soreki, /ameenidá' ka bay Delila.

⁵ Geeraharuusér múk Filisti gari i daqeér, gari beér, «Samson harhheehhe'eesang, daqaní masók adór kur slawaan ngi dirók i oo'. Atén un tseegaán nguri slahh'eemisaán. Umuú heewo direne peésár kume mibaá nee wak ngi haniis.»

⁶ Delila, Samson guri beér, «Na'ás /uuruuwók amór i dahi na ooang, adór tseegaro tur aleeslay as tuwa baramaanuusi.»

⁷ Samson gari báy, «Aníng bira tseegiyé' ar waatlarmaá faanqw awa /aben, daqaní /uuruueé' i faak, aníng tari adór heé hatlá'.»

⁸ Geeraharuusér múk Filisti waatlarmaá faanqw awa /aben giri hanís, Delila Samson guri tsék ar waatlarmaadá'.

⁹ Inós hhawaate gaa baraá kutuwírí lú/, Delila iri ó', «Samsón, múk Filisti areengw naa haratláy.» Ala Samsoni waatlarmaadá' gina tsaát adór neewór asla aa /ák. Gawaá adoorihe Samson lu/aroó /uuruuwós gwa ooiiká.

¹⁰ Naagáy Delila Samson guri beér, «Qaytsiít, kuúng aníng iga niqís tam looeema nga ooiká, na'ás áx adór kuúng tur aleeslay ooang.»

¹¹ Samson gari báy, «Barnaxes iga tseegiyé' ar hhutleemaá taa gaár tseegiiká, daqaní /uuruueé' i faak, aníng tari adór heé hatlá'.»

¹² Delila hhutleemaá /aben giri taatáhh, Samson guri tsék, guri beér, «Samsón, múk Filisti areengw naa haratláy.» Qoomaarihe hhawaateedá' naa nahhaatiyé' baraá kutuwi. Ala Samson hhutleemidá' gina tawo kahhtís adór neewór wa ale.

¹³ Delila Samson guri beér, «Tam ay hamí aníng kuúng in tawo niqiín, looeema nga ooiká, áx ooang adór kuúng tur aleeslay.» Inós gari báy, «Daqoroó faanqw oo se'engw'eé' bura dinkwár i tsék ar warqamo nee kway gawdés ar kiki'i, daqaní /uuruueé' i faak, aníng tari adór heé hatlá'.»

¹⁴ Qoomár iwa qaát, Delila se'eengw guna hhútl daqoroó faanqw guri dinkwár i tsék ar warqamo, guri gawdés ar kiki'i. Samson guri beér, «Samsón, múk Filisti areengw naa haratláy.» Samson iri tláy baraá gu'utér wa alé, kiki'iidá' gari tuú/ nee warqamoodá' guri gweér.

¹⁵ Inós guri beér, «Xáy ala adór kuúng tar kat, ‹Aán kiíng i slaá',› bartaqane muunaáwók ku saáw dir'eene. Ay nee hamí iga niqís sagaáwa tám wa ale, adór kuúng tur aleeslay ngaa ooiká dir'eene.»

¹⁶ Umuú deelooro Delila ina kuntaatiín, Samson iri slahhaá' baraá muunaáwose, gwa'ara gari fitlín.

¹⁷ Inós kangwdá' sleémeero guri oó' dír Delila, iwa kaahi, «Sagw'eé' kwaa baloó deeqwiiká, asma aníng tina qaroó paraátl as Mungú iimír tiwa laqwaali. Aníng barnaxes taa deéqw, aqo /uuruueé' in faak, niri daqa tlakúw, tari adór heé hatlá'.»

¹⁸ Qoomár Delila ngiwa tsáhh adór Samson tidár baraá muunaáwós sleémeero ngira faák, Delila afo gari ya/áp amór geeraharuusér múk Filisti, iwa kat, «Qwalaasé' ar wa'aá wák, asma naaqoorós tidá' sleémeero ngaa oó'.» Geeraharuusér múk Filisti nay hardát, peésa gari húp amór Delila.

¹⁹ Delila Samson guri harhheehhe'és, guri gu'ús gawaá geeraawós, heé wák guri atét, Samson guri se'eengw deéqw. Delila Samson guri iimu/uún baramaaniro, asma /uuruuwós aa faák.

²⁰ Delila Samson guri beér, «Sámsón, múk Filisti areengw, naa haratláy.» Samson baraá gu'uteero niri tláy, iri oó', «Aníng daa a tsee/aá káw adoodá' /iisí ni /imamiis, nee slaqwtaeé' ngi alduúx.» Ala inós gár i xui i káhh adór AAKOÓ MUNGÚ ngura geexáy.

²¹ Samson kuri óh nee múk Filisti, kuri ila tu/ún, nguri huwiyé' Gasa, kuri tseék ar tlatlawtá muqsli, iri xooslín baraá tseegamór wa ale.

²² Se'éngw sagós niri malé ti'iít alaá kuwa deéqw.

Gwa'arár Samson

²³ Geeraharuusér Filisti tari dinkwaárií burumburiít as ilahhooár muruú ta tsu/i kawa haniisi dír munguúín kudá' ta bay Dagoni, tawa baraa/i ar qwala/, iwa kaahiya', «Munguúrén wakusmoorén Samson ngwa haniís gawaá dabaarén i alé.»

²⁴ Samson nguwa ariyé' Munguúín nguri sluufmisiyé' tawa kaahi, «Munguúrén wakusmoorén Samson ngwa haniís gawaá dabaarén, inoósuudá' yaamuurén gaa hhitin nee mukrén oo yaariír gwaa tsuú/.»

²⁵ Muner'ín iwa ló'wa qwalá/ tana oó', «Samson ateetare' baraá doó tseegamooro, neetoorós a araán, i neeti áx u araán.» Naagáy Samson kuri ateetár áy baraá doó tseegamo iri geeraaín wa neét. Inooín nguna sihhtisiyé' dír tla/eeraá uheemaá tsár.

²⁶ Samson garmaadá' gu dawa koóm guri báy, «Aníng huwáng dír uheemidá' do' ngwa gáwtí oohiye', aníng a tliintií'.»

²⁷ Do' ina haáts hhawaate nee /ameenaro. Geeraharuuse sleémeero ta didií dirii'. Gawaá daáriro muu a kume tám hhawaate nee /ameenaro, múk xumiís qoomár Samson iwa neeti.

²⁸ Samson AAKOÓ MUNGÚ guna firín, iri oó', «AAKOÓ MUNGÚ, aníng inslawáng, /uuruueé' ki/isang! Tí kilós waiiká' wake ngin firiím, as li/aay nguwa buu' daanduú ilaeé' kuká' tsár taa tu/uni nee múk Filisti.»

²⁹ Samson iri tliintií' gawaá uheemidá' tsár, kudá' do' ngwaa gáwtí oohiye', dakós oo doó /iyáy i gawaá uhumoó wák nee oo doó basáy i gawaá kuqá'.

³⁰ Samson iri oó', «Xaa aníng ni gwaá' dinkwa nee múk Filisti.» Uheemidá' giri tliwií/ ar /uuruuwós sleémeero. Do'odá' inós guri i huú', dinkwa nee geeraharuusedár múk Filistiro nee muu sleémeero oo baraadií dirii'. Baalaadae múk aa tsuú/ ku ló'wa úr ta ak kudá' aa tsu/i qoomár iwa slafi.

³¹ Hhaeewós nee múk dooín sleémeero nina hardihiyé' as tuuaadá' kawa foolár ay. Slaqwtós ngiri ar tlayé', kuri foól dír tla/ángw Sora nee Eshtaoli didár muu folit ar Manoa baabuúwós. Samson múk Israeli guna har'ohín afiqoomár kureeraá mibeeraá tsare.