HAR'OHUUSE 15 - Biblía Axweesantá Hhohho' ar Mungú 2004

¹ Alaá qoomár niina iwa waaráhh, qoomár bu'úngw angaáno, Samson iri hareerós taaqweesár áy, deelmoó leei guri huúw. Iwa hardáh iri oó', «Aníng naa qatuú áw amór harer'eé'.» Ala taatoó hareerós a ya/aniiká.

² Taatoó hareerós iri oó', «Aníng geeraawo ngi xuu' kuúng aga qaroó sí', aníng aga haniís dír mulqumoowók. Dinkwa nee tihe hho'oorós ar niina i deer, slám kan ak hhoohhoo' ta inose. Na'ás, gám inós na duuxeek.»

³ Samson iri oó', «Waikae aníng dakuús a koomaaká daanduú múk Filistiro, qoomár bir slahh'eemisuú áw.»

⁴ Samson iri tláy iintsaawér tsiire tám gari ohín, gay hhayshe dinkwár i tsegiít tsár tsár. Naagáy gufuú asla gway qaás baraá tla/ángw hhayshér intsaawér tsár.

⁵ Aluuwo gufeedá' gay daá/, iintsaaweedá' iri dát baraá qamaá múk Filisti, angaánoó taa burumbuúr asla guri /ák, nee kudá' taa buiiká, nee qamaá hatlá' awa sabiíbu nee awa seituúniro.

⁶ Múk Filisti tari oó', «Heé adoorí gaa tleehh a heemá?» Tari oó', «A Samson, hhawaatuú dasír heedaáduú Timna, asma harér Samson gana haniís dír war/atuú Samson.» Naagáy múk Filisti dasiidá' nee baabuúwose kiri daá/ ar asla.

⁷ Samson iri oó', «Gimsé' daxta barqo adoosíng, aníng li/aay ngu buú' dirhúng i alé, daqaní aníng a tláw.»

⁸ Giri ló'wa muúx, múk yaariír guri tsuú/, iri tláy iri hotaá áy baraá mar'ír tlaa/ár Etamu.

Samson múk Filisti nguwa baál

⁹ Múk Filisti niri hardáh xafay'ín nguri tleehhiyé' baraá yaamaá Yuda, nee gixsár Lehi ngiri i haratlayé'.

¹⁰ Múk Yuda iri oó', «Ahaá waáy mista i haratleeré'?» Inooín tari oó', «Atén nina hardahaán as Samson kuwa tseegaan nee li/ayrén nguwa buaan.»

¹¹ Múk kume tám oo Yuda tari amór Samsonuú káy baraá mar'ír tlaa/ár Etamu, nguri bayé', «Xáy, a xu'ukáhe adór múk Filisti atén tir sawawuti'ii'ín? Ga/aaweek daxta atén amotlakwér adór tí taa sleér.» Samson giri báy, «Adoodá' naa aníngí tleehhiyé' ana inooín i tleéhh.»

¹² Inooín nguri bayé', «Atén hamí nina hardahaán as uwa tseegaan uri qaasaán gawaá dabaaín i alé.» Samson giri báy, «Gimsé' barnaxes aníng kuungá' i gasa'aaká lo'o /ayaak.»

¹³ Inooín nguri bayé', «Atén kuúng u gaasanaaká, aqo un tawoó daba' tseegaán uri dir'ín i hanisaán.» Nguri tseegiyé' ar him'ér tsár ar /aben, nguri duuxiyé' baraá mar'ír wa aleeró.

¹⁴ Qoomár iwa hardáh Lehi, múk Filisti ina amór Samson i haraatláy ar tseeo. Samson Qeeruú AAKOÓ MUNGÚ guri hatsiís him'eedá' kura daba' tseék iri tsatít adór neewór taa daá/ ar asla, iri yaamií hú'.

¹⁵ Samson taqeesmoó daqwaay oo naá/ guri sláy, múk kumuú wák oo Filisti guri tsuú/.

¹⁶ Samson iri oó', «Ar taqeesmoó daqwaywo múk kumuú wák ugwa tsuú/, ar taqeesmoó daqwaywo ufuú tu'u una tluf'uús.»

¹⁷ Adoorí axweesanto ngiwa hhe'eés, taqeesmodá' guri kwaáhh, didá' ngway kwaáhh gari umií i tsaát iwa kaahi, «Ramat-lehi.» Gídaabarós a tloomár taqeesmo.

¹⁸ Naagáy iri ló'wa waxiít, AAKOÓ MUNGÚ guri firín, iri oó', «Aá Mungú, kuúng an kudá' ba/amarí ngaa hup, a loohír anuú sagadiyusmowók. Xáy, daxta i meéra niwa gwaa' ar waxe nee tiwa ar tlay nee múk Filisti kwí taa hheehhe'eesiiká.»

¹⁹ Ala Mungú dirka bohóngw koom gana fooxiís baraá Lehiro, ma'aay giri wa/ás. Samson ma'aydá' giri wáh, /uuruuwós iri kií/. Didár kutltadá' gari báy, «En-hakore», tam ay laarí i deer Lehiro.

²⁰ Samson tari har'ohusmoó yaamaá Israeli de'emaá múk Filistiro, afiqoomár kureeraá mibeeraá tsare.