HAR'OHUUSE 14 - Biblía Axweesantá Hhohho' ar Mungú 2004

Pihh'uumár Samson

¹ Looarka wake Samson ina /eét ay baraá yaamaá Timna, baraá ayaadae dasirka wák ar Filisto'o gana ár.

² Aluuwo iri waátl amór doó baabuúwós, iwa hardáh xwayliiteerós gari báy, «Aníng amorqár Timnaro dasirkár múk Filisti aga ár, a duuxór wa slaá'.»

³ Ala xwayliiteerós guri beér, «Ahaá dasi tam ar wák iqo káhha baraá ayaawihe tam baraá mar'eefoorene, gár tas duxuun baraá xoorór ta hheehhe'emisiiká wa alé ar Filisti?» Ala Samson baabuúwós guri báy, «Dasír aníng ni duuxór wa slaa' a tidá', asma aníng iga sla'atís.»

⁴ Ala baabuúwós nee aayorose gaarí kaa xuiiká adór tar gár amór AAKOÓ MUNGÚ daahh, asma li/aay gun bu'utá wa slaa' dír múk Filisti. Qoomaadae múk Filisti múk Israeli gun sawaawuti'ii'ín.

⁵ Naagáy Samson nee xwayliiteérós tari /eét Timna, tawa hardáh baraá qamaá sabiíbu awa Timna, na/oó diraangw Samson guna i /oroótl.

⁶ Qeeruú AAKOÓ MUNGÚ Samson guri hatsiís, Samson dirangwdá' gway karslamiís adór deelmoó leeír ar alé, slám ar dabaá tawo. Kaangwí Samson gwa ooiiká dír xwayliiteérose.

⁷ Aluuwo iri /eét tay axweés nee dasiidá', Samson guri ló'wa sla'atís.

⁸ Alaá deelór niinawe iri male kií/, dasiidá' gari duúx. Didá' diraagw ngway gaás ngiwa áy, iri bihhií qaytsiít, naxés tuuaadár diraangw ba'arír yaariir gaa eér nee danú gwa tléhh.

⁹ Danú guri /aáy, iri kumiít hi'iitanto amorqae i danuú hara /aay. Iwa hardáh dír xwayliiteérós, giri qáy danuú niinawe, nguri /ayiyé'. Ala Samson gaa ooiiká adór danú dír nguwa sláy tar baraá tuuár diraangw.

¹⁰ Baabuúwós iri daqáy dír doó taatoó harér Samson, Samson muruú /aymár úr guri qaás adór masoombár qoomaadá' i tlehhaahhit.

¹¹ Qoomár muu ngiwa ár, masoombár mibeeraá tám kari didií burumbuúr as Samson nguwa hhaawisiyá',

¹² Samson giri báy, «Aníng siníkar'eé' tooka ngi dirhúngí oó'. Kuungá' bar aga sleeré' baraá deeloorí ur faanqw ar ni/ímár duuxooro, aníng daqaní tlabaá kitaánír hhohho' awa mibeeri tám ngi haniís, nee tlabaá mibeeri tám awa deelór urene ta dahamamisi ngi haniís.

¹³ Bar aga sleeri'iiká, daqaní kuungá' tlabaá kitaánír hhohho' awa mibeeri tám ngi hanisa', nee tlabaá deelór urene muu i dahamamisi awa mibeeri tám ngi hanisá' sleeme.» Inooín nguri bayé', «Áx gimáy siníkarók atén a axasaán.»

¹⁴ Inós giri báy, «Dír kudá' /ayiima, muruú /ayma baraadá' ngi daahh, dír kudá' /uuruú kooma, gár nuqnuuq nina ti'ít.» Ala ay bál tám masoombarí siníkadá' gaa sleeriiká.

¹⁵ Bál faanqw iwa xeér harér Samson ngina bayé', «Hhawaatuuwók harhheehhe'eesang, gídaabár siníkadá' a milá. Adoorí kiíng birngi tlehhká, atén kiíng i da/aán dinkwa nee múk doohunge. Atén tina iigu'usí'i as tiwa fisisiinda'?»

¹⁶ Harér Samson iri /á' dír geeraawós wa alé guri beér, «Kuúng iga áhh, kuúng aníng i sla'ká, kuúng muk'eé' una tsaaxweelír siník i qás, nee gídaabárós dir'eene nga oiká.» Inós hareerós gari báy, «Qaytsiít, tí aníng tam aga ooiiká dír xwayliitér'eene, xay ngi nqo oóa diroge?»

¹⁷ Ala inós guri i /aa/amamiín deeloodá' faanqw sleémeero ar duuxor'ine. Nee bál faanqwe Samson gari oó', asma inós kwaa ló'wa harakeés nee hareerós. Aluuwo inós kangwdá' gway ó' dír mukós.

¹⁸ Bál faanqwe, dír looa ira datká, mukdaáduú gixsadá' Samson kuri báy, «Gár tsuu' danú ba/a a milá? Gár /uuruú koóm diraangw ba/a a milá?» Inós giri báy, «Kuungá' geera bar damar'eé' aga ar dosli'iiká, geeraawo siníkar'eé' aga sleeri'iiká.»

¹⁹ Qeeruú AAKOÓ MUNGÚ Samson guri hatsiís, Samson iri /eét ay Ashkeloni. Múk mibeeri tám guri tsuú/, tlabaaín giri hayóh giri haniís dír mukdaádá' siníkarós gaa slay. Inós iri waátl ar mune ay amór doó baabuúwós.

²⁰ Hareerós tidá' kay haniís dír war/atuuwós.