HAR'OHUUSE 13 - Biblía Axweesantá Hhohho' ar Mungú 2004

Samsoni kuwa laqwaál

¹ Aluuwo múk Israeli tlakweema gina malé tleéhh dír geeraá AAKOÓ MUNGUHE, AAKOÓ MUNGÚ múk Filisti guri /uurií haniís oo múk Israeli nguwa sawaawuti'in ar afiqoomár kureeri mibeeri tsiyahhe.

² Heeko wák i deer oo yaamaá Sora, inós oo tlahhoó Dani, umuuwós a Manoa, hareerós a kampeeri.

³ Looarka wake malaykamoó AAKOÓ MUNGÚ gana i hardáh gari báy, «Ga/aaweek kiíng aáng a kampeeri, na/ii i koondaaká, ala hamí daxta a tsít na/oó garma u sleér.

⁴ Gawaá adoorihe ti harmagahh, difaái ma wahaar, laqaá gaa tam gaalá ar oonitimis, tam muruú /aymár ta harmeetin mu /ayaar,

⁵ asma kiíng a tsít, na/oó garma kway laqwál. Ságw na/aysíng mukuwa baloó deéqw, asma inós kwaa paraátl as AAKOÓ MUNGÚ iimír bál xwaylarós wa aleeró. Inós múk Israeli gu tuu/ baraá dabaá múk Filistiro.»

⁶ /Ameenidá' iri tleér hhawaatuwós guri ádbeér iri ó', «Heeko Mungú nina dir'eéní hardáh, inós slaqsaywo a adór malaykamoó Mungú, inós a heé dae tlaáq. Aníng sleeme ugwa yaahasiiká amór i dahhi, sleeme umuuwós ngwa ooiiká.

⁷ Ala inós aníng ina báy, ‹A tsít nee na/oó garma u xwayluúr.› Iri male báy, ‹Daxta difaái ma wahaar laqaá gár oonitimis, slamí gár ta harmeetin ma /ayaar, asma na/aywí Mungú gwaa tsawaár iimír bál kuwa xwayluya ay bál gwa'ararós.› »

⁸ Aluuwo Manoa AAKOÓ MUNGÚ guri firín iwa kaahi, «Aakoó Mungú, aníng kuúng u firiím heedaádá' naa ya/áp male ya/aawang as atén tiwa intsaahhatisi daanduú na/aydá' ta laqwaalana.»

⁹ AAKOÓ MUNGÚ firór Manoa gari axaás, malaykamoodá' nay malé kií/ dír /ameenidá' qoomár iwa baraá qaymór wa iwiiwit, ala hhawaatuuwós didae i kaahh.

¹⁰ Ala /ameenidá' iri ta'aaiín, hhawaatuuwós guri beér, «Qaytsiít, heedaádá' naa hardáh, kudá' baloókaaín naa dir'eé' kay.»

¹¹ Manoa hareerós gari eehár, iri hardáh dír heedaádá', guri yaahaás, «Xáy, kuúng a heedaádá' nee /ameenirí aga axwesí'i?» Inós iri oó', «Eeít, a aníng.»

¹² Manoa iri oó', «Gám bál /aymi'iiwók kudá' birna boo/iyé', daqaní na/aywí a heé adoomá? Nee gadiyeérós a milá daqaní?»

¹³ Malaykamoó AAKOÓ MUNGÚ Manoa guri bay, «Tidá' sleémeero /ameenisíng nga bawi ti ló'wa harmagahh.

¹⁴ Mamaá xa'anoó sabiíbu mingiwa /ák, laqaá difaái mingiwa wát, laqaá gár oonitimiis mingiwa wát, laqaá gár ta harmeetin mingiwa /ák. Tidá' sleémeero ngaa báw ngi ot.»

¹⁵ Manoa malaykamooduú AAKOÓ MUNGÚ guna báy, «Na'ás, daamáng, daa deelmoó leei ngu amohhe'eés as kuúng.»

¹⁶ Malaykamoó AAKOÓ MUNGÚ Manoa guri báy, «Gám tam iga harakesi ala aníng muruú /aymarhúng kwisíng u /ayaaká. Ala kuúng bar slá' ilahhooár da/a na amohhe'eeseek, haniiseek dír AAKOÓ MUNGÚ.» Asma Manoa heedaádá' gwaa tsaahhiiká adór tar malaykamoó AAKOÓ MUNGÚ.

¹⁷ Naagáy Manoa malaykamooduú AAKOÓ MUNGÚ guri báy, «Hám baalarkaaro umuuwók a heemá? Asma bál axweesantók bira bó/ u ilaiwawa/aán.»

¹⁸ Malaykamo iri oó', «Ahaá waáy, gár umuueé' kuwa yaahamis? Asma a umuú waa/oo/amór koóm.»

¹⁹ Manoa deelmoduú leei guri amohhe'eés tawa ilahhooa, guri qaás gawaá daanduú tlaa/a as tawa ilahhooár AAKOÓ MUNGÚ, kudá' waa/oo/amór tlehhaahhiít. Qoomár Manoa nee hareerós tawa tsángw asltá ga/ay, Aako gár waa/oo/amo gari tleéhh.

²⁰ Qoomár tsángw asla iwa gawaá doorí tlatlay dír kitángw ilahhooár wa ale, malaykamoó AAKOÓ MUNGÚ iri gawaá doorí tláy ar baraá tsangwduú asla. Manoa nee hareerós adoorí kawa ár tari tumbarara'aát giti ngiri yaamúr oohiyé'.

²¹ Malaykamoodá' aa sangw malé ki/iiká dír Manoa nee hareerós, Manoa gari tsaáhh adór tar malaykamoó AAKOÓ MUNGÚ.

²² Manoa hareerós gari báy, «Gimáy daxta atén a qatlaán, asma Mungú ugwa araán.»

²³ Ala hareerós guri beér, «Geeraawo AAKOÓ MUNGÚ birti tsu/utár wa slaa' alók ilahhooarén tidár da/a nee ar balaango gaa ilaoohiiká, tam geeraawo kaangwí sleeme ngwa atén bayká.»

²⁴ Aluuwo harér Manoa iri xwayluúr na/oó garmaawo, Manoa guri umií tsaát guri báy, Samson. Na/aywí iri uráy, AAKOÓ MUNGÚ na/aywí guri tsuúq.

²⁵ Qeeruú AAKOÓ MUNGÚ guri /uurií haniís iwa baraá Mahanedanír i dirii'i, tla/ángw Sora nee Eshtaoli.