HAR'OHUUSE 12 - Biblía Axweesantá Hhohho' ar Mungú 2004

Slaqwarár Yefta nee tlahhoó Efraimu

¹ Tlahhoó Efraimu tari dinkwárí burumburiít tari tláy yaaér Yordani kari waaraáhh ay amór Safoni, Yefta nguri bayé', «Asma milá atén mista atetká yaaér Yordani kawa waaráhh qoomár tawa slaqwarár eér amór múk Amoni? Hamí daxta do'ók un kuúng alda/aán.»

² Yefta giri báy, «Aníng nee muk'eé' ana hootaán ar wakaari nee múk Amoni, qoomár aníng kuungá' nuwa firiím, ala kuungá' aníng iga tu/utá eeri'iiká.

³ Qoomár aníng ngiwa tsaáhh adór kuungá' ira sié' tu/uto, tsamuúeé' una tluú', niri slaqwarár áw, AAKOÓ MUNGÚ múk Amoni nguri qaás gawaá dabaaeé'. Asma milá laarí aníng nee kuungá' gár tas slaqwaan?»

⁴ Naagáy Yefta múk Gileadi sleémeero guri dinkwár i burumbuúr, tari slaáqw nee múk Efraimu, múk Efraimu kuri baál nee múk Gileadi. Mukwí oo Efraimu aáng múk Gileadi gun baabay, «Kuungá' múk Gileadi aáng a tlahhoó Efraimu, ana baraadá' wa ti'ité' tari daté' baraá tlahhoó Manase.»

⁵ Múk Gileadi loohír Yordani ngiri tseegiyé' as múk Efraimu miwa /akumiít. Umuú qoomaaro heé Efraimu bira didií hardáh as iwa waaraahhi, múk Gileadi guna yaahaás, «Xáy gan, kuúng a heé tlahhoó Efraimuwo?» Nee bira oó', «Aasla'áy,»

⁶ kuna bay, «Ax too, Shiboleti.» Inós iri ooi, «Siboleti», as iwa tifqimiisi, kuri oh, kuri gaas didár kilár waarahhamuú yaaér Yordani. Múk tlahhoó Efraimu oo kume mibeeri tsiyáhh nee tsár kuri tsuú/.

⁷ Yefta múk Israeli guri har'ohín kureeri lahhooe. Aluuwo Yefta heedaaduú Gileadi iri gwaá', kway foól baraá gixsarós, baraá yaamaá Gileadi.

Haar'ohuuse Ibsani nee Eloni nee Abdoni

⁸ Alaá Yeftawo, Ibsani oo Betilehemu tari har'ohusmoó múk Israeli.

⁹ Inós na/aá daaqaay ngi kon mibeeri tám, na/aá dasu aqo mibeeri tám sleeme, dasuuwuú mibeerí tám kuri duxuút nee múk tlahh'aá hatlá', daaqaay dasuú tlahh'aá hatlá' guri duxuút. Ibsani múk Israeli guri har'ohín har afiqoomár kureeraá faanqwe.

¹⁰ Aluuwo iri gwaá', kuri foól baraá gixsár Betilehemu.

¹¹ Alaá Ibsaniwo har'ohusmo Eloni nina ti'iít, heé tlahhoó Sebuluni, inós múk Israeli guri har'ohín har afiqoomár kureeraá mibaango.

¹² Eloni aluuwo iri gwaá', kuri foól baraá Aiyaloni ar baraá yaamaá Sebuluni.

¹³ Alaá Eloniwo Abdoni garmoó Hileli heé Piratoni, tay har'ohusmoó múk Israeli.

¹⁴ Inós daaqaay ngu kon a mibeeri tsiyáhh, nee na/aá naangós a mibeeri tám, inooín daqwaayér mibeeraá faanqw nginar hi'iimaamitiyá'. Abdoni tari har'ohusmoó múk Israeli har afiqoomár kureeraá dakaate.

¹⁵ Abdoni garmoó Hileli heé yaamaá Piratoni, iri gwaá', kuri foól Piratoni baraá yaamaá tlom'i awa múk Amaleki.