HAR'OHUUSE 11 - Biblía Axweesantá Hhohho' ar Mungú 2004

¹ Baraá Gileadiro heeko wák i deer, inós a migusmo, umuuwós a Yefta, ala aayoorós a tsaatuso'o, umuú baabuúwós a Gileadi.

² Gileadi na/aá hatlá' gina laqwaál nee hareerós ar bi/i. Na/aá hareerír bi/i niwa uraarayé', Yefta nguri guusiyé' dír do'o, nguri bayé', «Kuúng aalirók i káhh dír baabuúrene, asma kuúng a na/oó /ameenír hatlá'.»

³ Ala Yefta hhaeewós kuká' giri ilagoów, iri hotaá áy yaamaá Toburí ale, amoodae múk barawaslén guna i burumburiít, tari alkoomaakoné' qoomár barta gauú áy.

⁴ Alaá deelór niinawe, xoorór Amoni xoorór Israeli gari i haratleér.

⁵ Qoomár slaqwara iwa búhh, bariisér Gileadi tana tláy, Yefta kuri leéhh amór yaamaá Tobu,

⁶ nguri bayé', «Qwaláng, atén ti geerahat baraá slaqwaraarén tí tawa slaqwaan nee xoorór Amoni.»

⁷ Yefta bariisér Gileadi gari báy, «Xáy, mukdá' a kuungaeekáhe oo aníng iga aahh, iri guús dír múk doó baabuúeene? Daxta tawa slahh'amuú koonda' mas aníng leelehhitá'?»

⁸ Bariisér Gileadi Yefta guri beér, «Hamí atén nina hardahaán as tiwa alkoomaan nee kuúng, tawa slaqwaan nee múk Amoni, nee kuúng tawa geeraharusmoorén nee oo múk Gileadi sleémeero.»

⁹ Yefta bariisér Gileadi gari báy, «Aníng kuungá' in amorhúng i malé ki/iimisá' as tawa slaqwaan, barnaxes múk Amoni AAKOÓ MUNGÚ ngwa qaás gawaá dabaarén, aníng kuungá' i waawutmoohúng wa qasá'.»

¹⁰ Bariiseedá' iri oó', «Ar tsuwa ló', AAKOÓ MUNGÚ a lamabu'usmoó tí, atén adoosíng kuúng ta sla' ngi tleehhaán.»

¹¹ Yefta nee bariiseedár Gileadi tiri alkoné', inós kuri waawutmooín wa qaás. Yefta iri axweés dír AAKOÓ MUNGÚ baraá Mispár alé.

¹² Yefta afo gari ya/aáw amór waawutmoó Amoni, guri báy, «Gám atén nee kuúng gaa a milá, misinda ayaarén i haratleér?»

¹³ Waawutmoó múk Amoni, mukdá' taa ya/aáw guri báy, «Asma múk Israeli yaamuueé' aáng gina hayóh qoomár niwa Misrír dahhiya', iimír Arnonír wa tleemu ay Yaboki, tam ay Yordani, gimáy daxta yaamuuká' ki/isang ar wayda.»

¹⁴ Yefta muu gway ya/aáw wa'aá tsare amór waawutmoó múk Amoni,

¹⁵ kuwa bay, «Yefta i kaahi, ‹Múk Israeli yaamaá múk Moabu, tam yaamaá múk Amoni gaa hayoohiiká.

¹⁶ Ala múk Israeli qoomár niwa baraá yaamaá Misrír wa ti'iitiyé' tana hi'iimiít baraá xaanxáy wa ale ay tlawtá Shamu, niri hardihiyé' ay Kadeshi.›

¹⁷ Aluuwo múk Israeli afo gari ya/aáw amór waawutmoó Edomu tawa kaahi, ‹Atén kuúng u firimaán tawa waarahhaan ar baraá ayaawók.› Kár ala waawutmoó múk Edomu kaangwí gwa ya/aniká. Sleeme afo ngina ya/aawiyé' amór waawutmoó Moabu, kár ala inós aa ya/aniká sleeme, gawaá adoorihe múk Israeli iri hoót Kadeshír wa ale.

¹⁸ Naagáy múk Israeli tana kumiít hi'iitanooro baraá xaanxáy wa ale, yaamaá Edomu ngiri harweeriyé' nee yaamaá Moabuwo, nay hardihiyé' bihhaá da/aáw awa Moabu, xafay'ín nguri tleehhiyé' bihhaá da/aáw awa yaaér Arnoni. Ala inooín naa dahi'iiká baraá yaamaá Moabu, asma yaaér Arnoni an digmuú Moabu.

¹⁹ Naagáy múk Israeli afo gari ya/aáw amór waawutmo Sihoni oo múk Amori, amoodár Heshboni tawa kaahi. ‹Na'ás, atén a baraá yaamuuwók ar waarahhaán ay yaamuurén.›

²⁰ Ala Sihoni múk Israeli gwa haratlinti'iiká iwa waaraahhi ar baraá yaamuuwós. Sihoni mukós gway burumbuúr, xafay'ín nguri tleehhiyé' dír Yahasa, niri slaqwarár ayé' amór múk Israeli.

²¹ AAKOÓ MUNGÚ, Munguú múk Israeli, Sihoni guri qaás gawaá dabaá múk Israeli, Sihoni nee mukose kiri baál. Múk Israeli yaamuudaá múk Amori giri aál.

²² Yaamaá múk Amori sleémeero ngina alqaatiyé' iimír yaaér Arnoni bihhaá basko, ay yaaér Yaboki bihhaá /iiko, iimír xaanxaay bihhaá da/aawe ay Yordani bihhaá /uwaawo.

²³ Gawaá adoorihe, AAKOÓ MUNGÚ, Munguú múk Israeli, múk Amori guri guús geeraá múk Israeli wa ale. Xáy, daxta kuúng yaamuurén i hayoohár wa slá'a?

²⁴ Ahaá aalisíng tinda haniís nee Kemoshi munguúwók i bu'utkáhe? Ala yaamu sleémeero kudá' AAKOÓ MUNGÚ, Munguúrén muu nguwa guús baraadá' wa ale, ngiri atén i haniís kuká' an daqaari'iimarén.

²⁵ Xáy, kuúng a tsiníhe ta Balakiwo garmoó Sipora, waawutmoó múk Moabu? Inós nee múk Israeli taa tlampa'asi'iiká laqaá taa muxi'iiká.

²⁶ Qoomár múk Israeli yaamaá Heshboni ngiwa oohiyé' nee ayeemoowose, Aroeri nee ayeemoowose, gixsadudaá gangeefír yaaér Arnoni har afiqoomár kureeri tsiire tame, iimidae yaamuuká' gár kisa tu/uká a milá?

²⁷ Aníng kuúng ugwa sadakuusiiká, nee án bir i haratlatleér a dakumís. AAKOÓ MUNGÚ kuduú kwasleemusmo kasi laarí ngi tsati tla/ángw múk Israeli nee oo Amoniwo.»

²⁸ Ala waawutmoó múk Amoni ya/abtoodá' Yefta aa oó' gaa iiarií qaasiiká.

²⁹ Qeeruú AAKOÓ MUNGÚ Yefta guri hatsiís, Yefta iri tláy, iri waaraáhh yaamaá Gileadi, nee awa Manase, nee iri kumiít ay Mispár Gileadi, ay yaamaá múk Amoni.

³⁰ Yefta lo'o gari /aáy dír AAKOÓ MUNGÚ wa ale, iri oó', «Barnaxes múk Amoni ngu gawaá dabaaeénií qás,

³¹ heé naa geerií al'awin, aníng qoomár binda baraá slaqwarár wa waátl, nee múk Amoni ugwa baál, kwí an kók, AAKOÓ MUNGÚ, aníng ngu ilahhooár da/tá wa haniís.»

³² Naagáy Yefta iri waaraáhh as tawa slaqwi nee múk Amoni, AAKOÓ MUNGÚ múk Amoni guri qaás gawaá dabaawósií ale.

³³ Yefta baalír ur gana sláy, gixsadaá mibeeri tsár awa Aroeri, nee kudaá iisaapoó Minitiro, nee Abel-keramimu giri hayóh. Múk Amoni kuri ló'wa baál nee xoorór Israeli.

Dasír Yefta

³⁴ Qoomár Yefta iwa waátl baraá slaqwararo amór do'ós baraá Mispárí ale, dasiirós guna al'eér ar neeto nee daa'aangw, i hara mitingaroó tsingili'imís. Dasiirí aayorose a wak, na/oó hatlá' i kaahh. Yefta na/oó hatlá' oo garma laqaá oo dasi gu konká.

³⁵ Yefta ngiwa ár dasiirós nguwa al'eér, tlabaawós gina feehhamiís iwa kaahi, «Dasir'eé', iga gurtlés nee iga slahh'amuú yaariír ar eér, asma aníng lo'o aga /aáy dír AAKOÓ MUNGÚ, slám lo'oorí amohhu'uumaro a aleeslawaaká.»

³⁶ Dasiirós guri beér, «Baabuúeé', kuúng lo'o bar aga /ák dír AAKOÓ MUNGÚ, adoodá' taa ó' daandueé' aníng i tleehhang, asma kuúng ugwa aleesleemií haniís oo wakuuseerók tidár múk Amoni kuwa li/áy bú'.»

³⁷ Iri malé ó', «Baabá, gár wake aníng kuúng u firiím, slahheeraá tsár haniisang nee mulqer'eé' tawa gawaá tlom'aá kawaan, as gwa'arar'eé' ar duwe kawa satsuunqumiisaan, asma slamí taa duuxiiká.»

³⁸ Baabuúwós iri ya/án afiqoomár slahheeraá tsár gari haniís. Inós iri tleér dinkwa nee mulqeerós as gwa'ararós ar duwe ngiwa sa tsuunqumiisiya'.

³⁹ Alaá slahheeraá tsár niwa waaraahhiyé', iri amór dó' i wátl. Baabuúwós al'axweesantós gari boo/eés ar adoodá' ngira axweés. Dasiirí nee hhawaata taa alqaatiiká. Iimír qoomaadae dakwí iri iimu/ún baraá Israeliro.

⁴⁰ Umuú kurko /ameenár Israeli in tsuunqumaamís deelo tsiyahhe as gwa'arár dasír Yefta, garmoó Gileadi.