HAR'OHUUSE 10 - Biblía Axweesantá Hhohho' ar Mungú 2004

Har'ohusmo Tola

¹ Alaá Abimeleki iwa gwaá', Tola garmoó Pua nángw naangoó Dodo, heé tlahhoó Isakari ina hardáh as múk Israeli nguwa ba/amisi. Inós dír i hooti a Shamiri ar baraá yaamaá tlom'aá Efraimu.

² Inós an har'ohusmoó xoorór Israeli har afiqoomár kureeraá mibeeri tsár nee tame. Aluuwo inós iri gwaá' kuri foól baraá yaamaá Shamiri.

Har'ohusmo Yairi

³ Alaá Tolawo Yairi oo tlahhoó Gileadi xoorór Israeli gana har'ohín afiqoomár kureeraá mibeeri tsár nee tsare.

⁴ Inós daaqaay ngu kon mibeeri tám, kudá' daqwaayér mibeeri tám gar hi'iimamiít nee gixsadaá mibeeri tám ngi koná', kudá' ta bay Hawot-yari tam ay laarí, baraá yaamaá Gileadiro.

⁵ Yairi iri gwaá' kuri foól baraá yaamaá Kamoni.

Har'ohusmo Yefta

⁶ Múk Israeli tlakweema gina malé tleéhh dír geeraá AAKOÓ MUNGUHE. Inooín munguiidá' ta bay Ba'ali nee Ashtaroti ngina sagadiyuusiyé', nee munguaá hatlá' awa Shamu, nee awa Sidoni, nee awa Moabu, nee awa múk Amoni, nee awa múk Filistiro sleeme. Inooín AAKOÓ MUNGÚ nguna mayé', tam sleeme naa kumiiti'iiká nguwa sagadiyuusiya'.

⁷ Ala AAKOÓ MUNGÚ xoorór Israeli gari i buúhh, giri máy kiwa baali nee múk Filisti nee múk Amoni as kiwa sawaawuti'in.

⁸ Inooín qoomaadae múk Israeli nguna slahh'eemisiyé' nee nguna baramaanusiyé'. Har afiqoomár kureeraá mibaá nee dakaate múk Israeli kudá' hotatiím baraá yaamaá múk Amorír wa ale, gayuú da/aáw oo yaaér Yordani baraá yaamaá Gileadi, kuna waanjín nee kuna ló'wa slahh'eemiís.

⁹ Múk Amoni sleeme yaaér Yordani gana waaraáhh as tawa slaqwi nee tlahh'aá Yuda, nee Benyamini nee Efraimu. Múk Israeli tari ló'wa slahhaá'.

¹⁰ Múk Israeli tari /aá/ dír AAKOÓ MUNGÚ, tari oó', «Atén kuúng ugwa tlakweemií tleehhaán, asma atén kuúng Munguúrén una geexawaán, Ba'ali kuri sagadiyuusaán.»

¹¹ AAKOÓ MUNGÚ múk Israeli guri báy, «Xáy, aníng kuungá' naa tu/iikáhe dír múk Misriro, nee dír múk Amoriro, nee múk Amoniro, nee dír múk Filistiro?

¹² Muksíng oo Sidoni nee múk Amaleki nee múk Midiani kuungá' nuwa baramaanuusiya', kuungá' nina /aa/é' amor'eénií alé, aníng kuungá' nuri tuú/ baraá dabaaine.

¹³ Ala tam adoorihe aníng kuungá' ina geexeeré', munguaá hatlá' kiri sagadiyusé', gawaá adoorihe aníng kuungá' nu malé tu/aaká.

¹⁴ Tlawsé' munguihúng kudaá hatlá' taa tsawdé' i /aa/aá awaak, nu /iisiye' baraá slahh'amuuhunge.»

¹⁵ Ala múk Israeli ina kumiít axweesanto dír AAKOÓ MUNGÚ tawa kaahi, «Atén tlakweema iga tleehhaán. Ala tidá' kuúng ta sla' daandemoorene tleehheek, na'ás, atén laarí ti tu/.»

¹⁶ Múk Israeli munguiidaá /eetuuse kiri kwaáhh, AAKOÓ MUNGÚ nguri sagadiyuusiyé'. AAKOÓ MUNGÚ muunaáwós iri gurhamuút as slahh'amuú múk Israeli.

¹⁷ Naagáy slaqwaruusér múk Amoni tari amohhe'eesiyé', xafay'ín nguri tleehhiyé' baraá yaamaá Gileadi, nee múk Israeli ina burumburiít, xafay'ín nguri tleehhiyé' baraá Mispa didár yaamaá Gileadi.

¹⁸ Didaádae múk Israeli nee geeraharuuser'ín tina yaahamiisiyé' tawa kaahi, «Xáy, heé ti geerahaár a heemá bar aga slaqwarár awaán nee múk Amoni? Heé atén taa geerahaar un waawutmoorén wa qaasaán baraakaá Gileadiro.»