HAR'OHUUSE 1 - Biblía Axweesantá Hhohho' ar Mungú 2004

Tlahha'aá Yuda nee Simeon yaamaá Kana'ani ngiwa bahh hayoohiyé'

¹ Alaá Yoshua iwa gwaá', xoorór Israeli AAKOÓ MUNGÚ, Mungú guri yaahasár eér, guri beér, «AAKOÓ MUNGÚ, tlahhoó geerií slaqwarár áw nee múk Kana'ani a gaalá?»

² AAKOÓ MUNGÚ iri oó', «Tlahhoó Yuda i giirin, asma yaamuusíng aníng i gawaá dabaaíní qaás.»

³ Tlahhoó Yuda hhaeeín awa tlahhoó Simeon ngiri bayé', «Qwalaasé' ti alkoomaán baraá slaqwararén tí ar xoorór Kana'aniro, as kahhó' yaamuurén kuká' ngiwa hayohaan, daqaní atén kuungá' nu tu/aán baraá slaqwarár yaamuuhunge.» Tlahhoó Simeon iri ya/án tiwa alkona' nee tlahhoó Yuda baraá slaqwararo.

⁴ Tlahhoó Yuda iri slaqwarár áy, AAKOÓ MUNGÚ múk Kana'ani nee múk Perisi giri gawaá dabaaíní qaás. Múk kume mibaangw nguri baaliyé' baraá yaamaá Besekír wa ale.

⁵ Waawutmo Adoni-beseki kuri baraá gixsár Besekírí áy, niri slaqwiyé' nee inós, múk Kana'áni nee oo Perisiro kuri baál.

⁶ Aluuwo Adoni-beseki iri goów, inooín nguri alkoné' nguri oohiyé', dugeeniiwós awa ya'a' nee awa dabaawo kiri tlaáq.

⁷ Adoni-beseki iri oó', «Waawitaádá' mibeeri faanqw, kudá' aníng naa dugeenaá ya'a' tlaáq nee awa dabaawo, kudá' muruú /aymár aa paahh gawaá meésar'eé' wa ale ngu nuqmamisá', adoodá' aníng naa /imiís, Mungú li/aydá' ngwaa dir'eéní buú'.» Kuri huúw ay Yerusalemu, inós iri amoodií gwaá'.

Tlahhoó Yuda Yerusalemu nee Hebroni ngiwa hayóh

⁸ Múk Yuda nee múk Yerusalemu tari slaáqw, múk Yerusalemu kuri muúx ar paangadu, kuri tsuú/, nee gixsa kari daá/ ar asla.

⁹ Múk Yuda iri kumiít as nee múk Kana'ani tawa slaqwi, kudá' baraá yaamaá tlom'ií wa hoót, nee oo baraá yaamaá Negebu, nee oo yaamaá xatso.

¹⁰ Múk Yuda iri haraatláy amór múk Kana'ani oo baraá Hebronír hoót. Umuuwí Hebroni aáng ku babay Kiriat-arba. Inooín tlahh'aá tám awa Sheshai nee Himani nee Talmai kiri baál.

Otnieli gixsár Debiri ngiwa hayóh

¹¹ Múk Yuda tana Hebronír wa tláy gixsár Debiri kari i haratláy. Debiri geeraawo ka babay Kiriat-seferi.

¹² Kalebu iri oó', «Heé yaamaá Kiriat-seferi ngaa hayoh u dasir'eéní haniís, tí ta bay Aksa, as ngiwa duuxi.»

¹³ Otnieli garmoó Kenasi, hhiyoó niiná oo Kalebu, gixsadá' gari hayóh, Kalebu guri iimbalaáx ar dasiirós tidá' ta bay Aksa, inós gari duúx.

¹⁴ Bál duuxooro Otnieli Aksa gana harakeés baabá nguwa firiin qaymooro. Aluuwo dasi ina amór baabuúwós keér. Qoomár iwa awét gawaá daanduú daqwáy wa ale, baabuúwós gari yaahaás, «Kiíng ma slá' hato'.»

¹⁵ Dasiirós guri beér, «Baabá, yaamuudaá basa kuúng naa aníngí hanís i baraá xaanxoó Negebu, gimáy male qawáng hhaleeraá kutltá kooma'a.» Kalebu gari hhaleeraá ma'áy haniís awa gawaá diindirma' nee awa baraá tlapuwo.

Tlahha'aá Yuda nee Benyamini niwa baaliné'

¹⁶ Xwaylár Keni, taatoó harér Mose, nina gáwtí tsa/ané' iimír baraá gixsadár slaansla, dinkwa nee múk Yuda, tay dáh baraá xaanxoó Yuda, kuduú baraá Negebu bihhaá yaamaá Aradi, inooín nay tlayé', niri alhootiyé' nee múk yaamuudá'.

¹⁷ Aluuwo tlahhoó Yuda nee tlahhoó Simeon tiri alkoné', múk yaamaá Kana'ani, kudá' baraá Sefati ga hoót kuri muúx, gixsa kari ló'wa hhitín. Gixsadá' kari báy Horma.

¹⁸ Dinkwa nee tihe tlahhoó Yuda gixsár Gasa gari hayóh nee ayeemowose, nee gixsár Ashkeloni nee ayeemowose, nee gixsár Ekroni nee ayeemowose.

¹⁹ AAKOÓ MUNGÚ múk Yuda guna alee/iís, inooín múk baraá yaamaá tlom'aá hoót nguri guusiyé', ala kudá' baraá xatstá hoót kwa aleeslayká guusaro, asma mukdá' i gaardaá muqslár kón.

²⁰ Naagáy Kalebu kuri Hebroni i haniís ar adoodá' Mose ngira oó', inós tlahh'aá tám awa Anaki giri tlatlahhaás.

²¹ Ala múk Benyamini múk Yebusi kudá' baraá gixsár Yerusalemúr hoót ngwaa gusi'iiká. Múk Yebusi nee múk Benyamini tana alhotaatín Yerusalemúr wa ale tam ay laarí.

Tlahha'aá Efraimu nee Manase Beteli ngiwa hayoohiyé'

²² Múk tlahhoó Yosefu sleeme, ina haratláy baraá gixsár Beteli, AAKOÓ MUNGÚ a dinkwa nee inooín.

²³ Tlahhoó Yosefu muu nguna ya/aawiyé' ay Beteli as tawa tsatsawuusár ay. (Umuú gixsarí aáng ku bay Lusu.)

²⁴ Mukdá' aa tsatsawuusér ay heeko wák nguna ariyé' naa ti'iít baraá gixsár wa ale, kuri báy, «Na'ás, loohír dahmuú baraá gixsarí laqaamang, atén kuúng u gár hhoóí tleehhaán.»

²⁵ Naagáy loohír dahmuú baraá gixsa gari laqán, inooín múk baraá gixsadá' ngway hhaamiisiyé' ar paangadu, ala heedaádá' ngway mayé', inós nee múk do'ós sleémeero.

²⁶ Heewí iri tláy baraá yaamaá múk Hiti, gixsa gari tleéhh, umuú gixsadá' gway báy Lusu, tam ay laarí umuú gixsadá' aqo kwí.

Xoordaá taa guusiiká nee xoorór Israeli

²⁷ Múk tlahhoó Manase yaamuloouusér baraá yaamaá Bet-sheanír hoot, ngaa guusi'iiká, nee kudá' baraá gixsár Ta'anikír hoota'a, nee Doriro nee awa Ibleamuro nee oo Megidoro nee ayeemodaá inslaawaydae. Múk Kana'ani iri kumiít tawa ayeemodá' wa hooti.

²⁸ Ala qoomár múk Israeli /uuru nguwa sláy, mukduú Kana'ani ngwa guusa hhe'eesi'iiká ala nguna qaminé' baraá gadiyedaá tawa bihhií biririkitiiká.

²⁹ Tlahhoó Efraimu múk Kana'ani, kudá' baraá yaamaá Geserír hoót ngwa guusi'iiká, ala múk Kana'ani kuduú baraá Geseri nee inooín tana alhoót.

³⁰ Tlahhoó Sebuluni, yaamuloouusér Kitroni nee yaamuloouusér Nahalalír hoót ngaa guusi'iiká, ala múk Kana'ani kudá' baraá tla/angw'ín hoót kuna /uurutís baraá gadiyedaá tawa bihhií noongo'ootiiká.

³¹ Tlahhoó Asheri sleeme múk gixsár Akko ngwa guusi'iiká, tam kudá' Sidonír hoota'a, nee oo Alabúr hoota, tam oo Aksibúr hoota nee oo Helbár hoota nee oo Afekár hoota, tam oo Rehobúr hoót sleeme.

³² Ala tlahhoó Asheri iri hoót baraá tla/ángw múk Kana'anír wa ale, asma yaamuloouuse nga guusi'iiká.

³³ Tlahhoó Naftali, múk Bet-shemeshi ngwaa guusi'iiká, tam kudá' baraá Bet-anati ngi hootá', ala nina hootiyé' baraá tla/ángw múk yaamaá Kana'anír wa ale, yaamuloouuse dinkwa nee múk Bet-shemeshi. Nee yaamuloouusér Bet-anati ngiri /uurutisiyé' baraá gadiyér tawa bihhií noongo'ootiiká.

³⁴ Naagáy múk Amori tlahhoó Dani nguna harakeesiyé' tawa hotaá ay gawaá tlom'i, asma kaa ya/aniiká niwa aweeriya' baraá xatsa.

³⁵ Ala kukaá Amori nina kumiitiyé' niwa hootiya' baraá goongoamaá Heresír wa ale, nee baraá Aiyaloni, nee baraá Sha'albimu. Ala tlahhoó guruú doó Yosefu iri baalín, tam kiri harakeemiís ar /uuru baraá gadiyedaá iwa bihhií biririkiitiaaká.

³⁶ Digmuú múk Amori yaamaá Sela ngina /iikú wa óh ay tsa/amtór Akrabimu.