HAGAI 2 - Biblía Axweesantá Hhohho' ar Mungú 2004

Xirfuú doó /abén

¹ Bál slahhángw faanqw tawa mibeeri tsár nee wak, AAKOÓ MUNGÚ ina axweés ar afkú Hagai, i kaahi,

² «Tláw daxta, axweesé' nee Serubabeli garmoó Shealtieli, ga/aawusmoó Yuda, nee Yoshua garmoó Yehosadaki, kaahamusmoó úr oo Mungú, nee mukdá' aa waatl baraá looháy wa ale, ki beer,

³ ‹Baraá tla/angwhunge heé do'owí gwa ar i deéro, qoomár iwa adoorós tidár geerií kahhi kuwa xiríf? Hamí kuwa ga/eera' a adoomá, xáy kwí i ló'wa waaqaa'atiítiíke?›

⁴ Anuú AAKOÓ MUNGÚ a kah, ‹Tam adoorihe kuúng Serubabeli muuna hhe'eés, nee kuúng Yoshua, garmoó Yehosadaki, kaahamusmoó úr oo Mungú, muuna hhe'eés sleeme. Tam múk yaamuuká' sleémeero, anuú AAKOÓ MUNGÚ a kah, kuungá' sleeme muuna hhe'eesé', gadiyeé tleehhaak, asma aníng nee kuungá' a dinkwa. Anuú AAKOÓ MUNGÚ Aleesleemusmo tí ngina oó'.

⁵ Adoodá' nura al'axweesántií oó' bál niwa baraá yaamaá Misrír wa ti'ité', tam hamí, ma hhasliitara'. Qeeruueé' i baraá tla/angwhúng wa hoot.› »

⁶ Asma AAKOÓ MUNGÚ Aleesleemusmo i kaahi, «Wa'aá wake afi qoomár niinawe aníng doori i diingiís, nee yaamuwo, nee tlawto, nee yaamaá kaahaare.

⁷ Aníng xoordu sleémeero i daaraxaás, nee daqaari'iimár xoordu sleémeero kingi huuw baraá do'owí, aníng do'owí u hatsiís xirfuuwo. Anuú AAKOÓ MUNGÚ Aleesleemusmo tí ngina oó'.

⁸ Peésa a daqaari'iimar'eé', nee sahaábu a daqaari'iimar'eé', anuú AAKOÓ MUNGÚ Aleesleemusmo tí ngina oó'.

⁹ Xirfuú alhhe'eesáy oo do'owí ku ak úr ta xirfuduú geeraawo, nee diirihe kuungá' nu diihhooárií haniís nee wayda, anuú AAKOÓ MUNGÚ Aleesleemusmo tí ngina oó'.»

Aarusmo i kaahamuusér Munguú yaahamiis

¹⁰ Bál slahhángw gwaleél tawa mibeeri tsár nee tsiyáhh oo kurkú tsár oo waawutmo Dario, AAKOÓ MUNGÚ ina axweés ar afkú aarusmo Hagai, i kaahi,

¹¹ «Anuú AAKOÓ MUNGÚ Aleesleemusmo a kah, kaahamuusér Mungú yaahasaak, yaahasarí ngi mu/aywatsiye'.

¹² Hee bar fu'unaá hhohho' awa taa haniís dír Mungú, nga gagaár ar pasltá inqwaarirós, inós bar mikaáte gaa kwatiít ar pasltós tidá', laqaá fa/a, laqaá difaái, laqaá di/i, laqaá tam muruú /ayma gaalahe, xáy, muruú /aymaadá' kwaa hhoohhooeési?» Kaahamuusér Mungú iri ó', «Aasla'áy.»

¹³ Hagai giri malé yaahaás, «Hee bar taa meetagaás ar tuua ngiwa kwatiít, bar muruú /aymaadá' gwaa kwatiít, muruú /aymaadá' aa meetagwaái?» Kaahamuusér Mungú guri beér, «Aa meetagwaá'.»

¹⁴ Hagai iri oó', «AAKOÓ MUNGÚ i kaahi, ‹Adoorí an adór xoororí ii diri' dír geeraaeene, nee an adór gadiyér dabaaín ii diri', tam gadaádá' ni ilahhooár wa haniisiya' sleeme kaa meetagaás.› »

Tsuuqaá Mungú

¹⁵ «Nu firiím daxta, iimír laarí ay amoosír aluuwo muruú ti'imiít alqaytsimiitaak, dír Doó AAKOÓ MUNGÚ kura iimu/uundi'iiká tleehhamooro.

¹⁶ Qoomár hee gár i harahhifi tawa guniyadaá mibeeri tsár awa balaangw, aluuwo naxés gár i slay tay guniyadaá mibaangw kilós, nee qoomár hee gár i harahhifi tawa quruntloó mibeeri kooán nguwa iihheeki, aluuwo naxés oo i slay a quruntloó mibeeri tsár.

¹⁷ Nuna slaáhh ar slahheemasi nee ar ququamó nee ar tluwoó tlaa/e, baraá gadiyeé sleémeero ar dabaahunge, ala naa amor'eé' ki/ii'iiká. Anuú AAKOÓ MUNGÚ Aleesleemusmo tí ngina oó'.

¹⁸ Baalaarír laarí ar slahhángw gwaleél tawa mibeeri tsár nee tsiyáhh, an baalár iihhafiirír Doó AAKOÓ MUNGÚ tleehhamooro iwa hhooeér. Gimsé', iimír laarí wa tleemu ay amoosír aluuwo muruú ti'imiít alhooreemisaak.

¹⁹ Xáy, dahaasiingw i baraá kuuntírií káhhi? Nee sabiíbuusíng, laqaá /aantsí, laqaá komamaánga, laqaá xaa'aá seituúni gár naa laqwaaliyé' i káhha? Ala iimír laarí wa tleemu án kuungá' nu tsuúq.»

Al'axweesantá Mungú dír Serubabeli

²⁰ Baalaadár kilá' slahhángw gwaleél tawa mibeeri tsár nee tsiyáhh, Hagai axweesantá AAKOÓ MUNGÚ gana malé axaás wa'aá tsare, i kat,

²¹ «Serubabeli ga/aawusmoó Yuda ku beer, ‹Aníng doori nee yaamu i diingiís,

²² aníng waawitá u kwaáhh nee kiteeriidaá waawuti'iima i /aankwaraáts. Aníng /uureemaá waawuti'iimár dimbadimbé ar xoordu i hhitiím. Aníng gaardu i /aankwaraáts nee kudá' naa gawaawósií tsa/ane', faraási nee kudaádá' ngi ii tsa/aa/amá' ki tsuu/ nee hhaeeín ar paangadu.› »

²³ AAKOÓ MUNGÚ Aleesleemusmo i kaahi, «Baalaadae aníng kuúng sagadiyusmooeé' Serubabeli, garmoó Shealtieli, un taataáhh. Anuú AAKOÓ MUNGÚ a kah, aníng kuúng un adór mungaydá' ta dugeenír qamin tleéhh, asma ugwa tsawaár. Anuú AAKOÓ MUNGÚ Aleesleemusmo tí ngina oó'.»