HAGAI 1 - Biblía Axweesantá Hhohho' ar Mungú 2004

Doó Aako malé tleehhaak

¹ Bál slahhángw lahhoó' tawa wak oo kurkú tsár oo waawutmo Dario, AAKOÓ MUNGÚ ina axweés ar afkú aarusmo Hagai dír waawutmo Yuda kudá' ta bay Serubabeli, garmoó Shealtieli, nee dír kaahamusmoó úr oo Mungú kudá' ta bay Yoshua garmoó Yehosadaki.

² Hagai iri oó, «AAKOÓ MUNGÚ Aleesleemusmo i kaahi, mukwí mis kaahi, ‹Qoomár Doó AAKOÓ MUNGÚ nguwa tleehhaan aa xeeriiká.› »

³ AAKOÓ MUNGÚ iri axweés ar afkú aarusmo Hagai, i kaahi,

⁴ «Xáy, qoomaarí an qoomár kuungá' tawa hotá'a baraá maraá taa parootuús wa alé ar peehháy, amorqae do'owí i baraá hhituruutár wá iwiwiit.»

⁵ Gawaá adoorihe AAKOÓ MUNGÚ Aleesleemusmo i kaahi, «Lohduuhúng alqaytsitaak.

⁶ Dahaasíngw yaariír una dahasé', bu'uungw kwaa sleeré' ku ureeká. A mak /ayiindá' ala a axiinda'aaká. A wahaandá' ala a waxe gwagwa'aandaaká. Ti mak untsuumisá' ar tlaba', ala heé axwnoó slasláw i kaahh. Nee kudá' ta peésár bu'un a peésaadá' gan qamín baraá tlakoó aa foox.»

⁷ AAKOÓ MUNGÚ Aleesleemusmo gár i kaahi a tí, «Lohduuhúng alqaytsitaak.

⁸ Tsa/amé' gawaá tlom'i, xaai huwaare', do' ku tlehhá', daqaní aníng us qwalaá/, aníng muu iri xirfayees.»

⁹ AAKOÓ MUNGÚ Aleesleemusmo i kaahi, «Muruú yaariír una haraxué', ala naxés kwa sleeré' ku ureeká, slám kuwa dír maráy hubé', án ngway ufaáhh ngway ilaahúng wa qwaareés. Asma milá? Asma dooeé' kudá' hoót baraá hhituru'uumár wa alé, amorqae umuú heewo do'ós gun /aamaa/án.

¹⁰ Gawaá adoorihe, doori iga tseék tam baafoó niiná oo hara' i taxatiiká, nee yaamu sleeme kaa tseék tam mamuuín ngi duuxiaaká.

¹¹ Aníng qoomár slahhemasi ngi tleés baraaká yaamií ale, nee gawaá daandemaá tlom'i, nee baraá balaangw, nee gawaá difaáidá' /aben, nee baraá umuúqo gár di/tá duxuuma, nee baraá umuúqo gár yaamu i duxuna', nee gawaá muu, nee gawaá daanduú makaá ta de'en, nee gawaá daanduú gadiyeé sleémeero ar daba'.»

Muu axweesantá Mungú ngiwa iialooeés

¹² Serubabeli garmoó Shealtieli nee Yoshua garmoó Yehosadaki, kaahamusmoó úr oo Mungú, dinkwa nee mukdá' sleémeero naa baraá looháy wa waatl, afór AAKOÓ MUNGÚ Munguúín ngiri iialooeesiyé', nee axweesanayduú aarusmo Hagaiwo, ar adór AAKOÓ MUNGÚ, Munguúín ngura ya/aáw. Muu AAKOÓ MUNGÚ guri ilaiwawaá/.

¹³ Ala Hagai, ya/abusmoó AAKOÓ MUNGU, daanduú ya/abtór AAKOÓ MUNGUHE muu guri báy, AAKOÓ MUNGÚ i kaahi, «Án nee kuungá' a dinkwa.»

¹⁴ AAKOÓ MUNGÚ muunuú Serubabeli garmoó Shealtieli ga/aawusmoó Yuda guri dúk, nee muunuú Yoshua garmoó Yehosadaki, kaahamusmoó úr oo Mungú, nee munér mukdá' naa waatl baraá looháy wa ale. Tari tláy gadiyeé kawa tleehhamór ay baraá doó AAKOÓ MUNGÚ Munguúín oo Aleesleemusmo.

¹⁵ Adoorí iwa tleehharút a bál slahhángw lahhoó' tawa mibeeri tsár nee tsiyáhh, kurkú tsár iimír Dario iwa waawuti'ín.