HABAKUKI 3 - Biblía Axweesantá Hhohho' ar Mungú 2004

Firór Habakuki

¹ Kaangwí an firór aarusmo Habakuki.

² Aá AAKOÓ MUNGÚ, aníng kangók ugwa axaás, nee tlehhmi'iiwók iri de'e tsatiyé'. Eeít AÁKO, gadiyeérók malé /abeeseek baraá kureeriikae. Baraá kureeriikae tlehhmi'iiwók i xu'utiitiye', bar aga búhh gurtleemuuwók inslaweek.

³ Mungú naa hardáh i Temanír daahh. Inósudá' Hhoohhoó' i gawaá tloomár Paranír daahh. Xirfuuwós doori gina tuuntuúk. Tam yaamu niri hatsiyé' xirfuwose.

⁴ Miira/oorós a adór gwa/aateemaá maankari. Tsángw asla i baraá dabaawós wa ti'imiit. Diirí an didá' aleesleemuwós kway luú/.

⁵ Pu/i in geeraawós wa hi'ít. Nee gwa'ara gun aluú wa eeharaahát.

⁶ In sihhiit yaamu giri diingiis. Iri qaytsiit xoordu giri kwisltis. Tlom'iidaá alhhe'eesay wasl niri feehhamiitiyá', nee gongooamadá hotaatimá' niri sluk'umitiyá', lohduuwós awa alhhe'eesay wasl.

⁷ Múk Kushani una ár iwa slahhahhai, nee múk yaamaá Midiani iwa daaraaxi.

⁸ Aá AAKOÓ MUNGÚ, kuúng anaqo búhhi gawaá yau? Laqaá anaqo tláwtí búhhi? Qoomár tawa tsa/aán gawaá farsuuwók, nee tawa tsa/aán gawaá gaarduwók kudaá arba/ati.

⁹ Kuúng ga/aleerók aga geehhoés, maheeriiwók kiri qás gawaá waatlaarmoó ga/ale, yaamu kiri feehhamís ar yau.

¹⁰ Tlom'i uwa ariyé' nina daaraxaatiyé'. Alwuór ma'aay iri waaráhh, iloo niri xuuruuiyé', /ur/urti'ín iri gáwtí tsifaaqamít.

¹¹ Tsee/amá nee slahhaangw niri sihhiitiyé' wa/aamer'ín tidá' i hootiya', qoomár qwiiraa/ór maheeriiwók ngiwa ariyé' iwa weelaahát, nee qoomár mitsaahhór lawaalarók ngiwa ariyé'.

¹² Yaamu ina kal/aán ar xaraasleemaawók, xoordu kiri nakaa/aruúr as buhhtaawók.

¹³ Tari tleér as mukók kuwa ba/amis, nee as heewók kudá' taa iimbaláx kuwa ba/amis. Kuúng geeraharusmoó múk tlákw un suwa tsát, nee eeharuuseerós kari hhaamís.

¹⁴ Baaluusér slaqwaruuseedá' ana tlaqút ar maheeri'ín awa kilá'. Inooínaadá' naa haraatlaye' adór bambaór wa ale as atén tiwa tlatlahhasiya', inooín a adór múk a qwalaa/ as narkuute ngiwa naaqo gu/iya'.

¹⁵ Tlawi kari adarát ar farsuuwók gawaá gwaanduú ma'aay oo /uuruú koóm.

¹⁶ Kaangwí sleémeero una axaás tam guruueé' ma'aay ngway dalaa/iyé'. De'eero afkueé' iri daaraxaát. Diqiyaeé' niri tsatiitiyé', ya'aaeé' niri daaraaxiyé'. Aníng baalaadár slahh'amu an daamaaraám ar qitla, tidá' hardah dír mukdá' amoorénií haraatlatláw.

¹⁷ Geera tam /aantsí i laqwalkahe, laqaá tam sabiíbu i na/aá konkahe. Laqaá tam seituúni mamaá seituúni ngi laqwalindaakahe, tam qamu balaangw ngu hamaaremisiaakahe, nee tam bee/ángw baraá dito i faaki qatlooro, laqaá tam hikwa ni su'unsuu'utiia baraá slumto,

¹⁸ aníng aqo an kumamiít AAKOÓ MUNGÚ nguwa saqwalalaa/, un saqwalalaá/ Munguúduú ba/amusmooeé'.

¹⁹ AAKOÓ MUNGÚ, kuduú Aako, an /uuruueé'. Inós diqiyaá ya'aaeé' gin gawdeemiis adór kuqaá saaragi. Aníng in alee/iis tlom'i ngiwa tsa/am. Ku haniisi dír /aylusmoó daá' ar gidaandoori.