HABAKUKI 2 - Biblía Axweesantá Hhohho' ar Mungú 2004

Mungú Habakuki nguwa mu/aywaáts

¹ Aníng niri sihhiít didár xuumar'eé', nari tsa/ám gawaá /aampa nari gawaadá' wa xumaamiís, xáda xáy, AAKO aníng mi báy daanduú wa/aa/ir'eene.

² AAKOÓ MUNGÚ aníng iri báy, «Iigu'utuuwí gooiimeek gawaá peehhi, geehhooeeseek as kahhó' umuúqo heé didár waaraahha kangwsíng ngu soomuusi ar adór inslaahh.

³ Asma iigu'utuuwí qoomár kus hariím i deer, a kángw ló' oo alhhe'eesaydá' gaanslár hardáh. Barnaxes i tligatliik, kuúng daameek, asma looeemawo niqo hardah, i tligiiká.

⁴ Gár ta gooiin a tí: ‹Múk tlakweemaá tlehhaahhiít ga/a/awaagáy i xayká. Ala heé gan'amuú koóm gár ir slafi a haratlintaao.› »

Tlakuuse i hhaán

⁵ Tam adoorihe difaái a slaslaáwár al/aymuso'o, heé daara/usmo i tleeresiiká. Ilatleerír heewí a adór tiqár gi'i, «hhiínhh» ga aainká adór gwa'arár wa alé. Xoordu sleémeero gin buruumburín, xoordu sleémeero gin buruumburín as tawa kós.

⁶ Xáy, múk adoorí sleémeero kuqo niqinkáhe, nee mukdá' ta ohín kiqo waaqaaqaikáhe tawa kaahi, «Tsaxwaawók kuúngudá' daqaari'iimár tlehhiít ar muruú múk hatlá', nee kuúnguú huwaá arhaanír uhiím kari bu'uká, ta adoorír kumamit ay xaylá?

⁷ «Iinuuseerók nin tleér ar wa'aá wák, nee mukdá' ta da'ayumamiti niri gaanslár sihhiit, kuúng uri alwarqayá' uri oohiyá'.

⁸ Asma kuúng xoordaá yaariir ina hayoohahiín, panaydá' aa meet kuúng tun hayoh, asma tseerdaá mukdá' kuúng taa ku'umaamís nee tlakweemaadá' taa tlehhahhít dír múk baraá yaamu nee gixsaduuine.»

⁹ «Tsaxwaawók kuúngudá' do'ók ugwa daqaari'itís ar /aytár muruú múk hatlá', nee do'ók oo tleér kuri tléhh as gár tlaakw uwa sleeraaká.

¹⁰ As adoodá' xoordaá yaariir kiwa tsu/aa/iín, do'ók ugwa mureekesár eér, nee slafiingók kuri kilók qwaarés.

¹¹ Gawaá adoorihe tlaa/e i tseeiyá' baraá koo/ír wa ale, nee waaqas iri ilaaoh.

¹² «Tsaxwaawók kuúnguusíng gixsa aga tlehh ar tseerdaá muu ku'umis, nee gixsa gaa iihhaaf ar muruú naa /awa/awín.

¹³ Ga/aawaagáy gaarí amór i dahh a amór AAKOÓ MUNGÚ Aleesleemusmo. Tí muu iwa daawimiti as gár asla i fak nee xoordu gadiyér tawo gaa fák.

¹⁴ Asma xirfuú AAKOÓ MUNGÚ i xu'utiit baraá yaamu sleémeero, adoodár ma'aay tlawi ngira dalaa/iyé'.»

¹⁵ «A tsaxwaawók kuúngudá' inslaawmoowók ugwa wahas ar gár oonitimis nee qara kuwa qamiin baraá difaái as kahhó' /aankwetsuín kuwa aan.

¹⁶ Gár tawa háts a mureekesaay ta xirfuuwo, kuúnguú kilá' na waheek daqaní ta ta/amít, kuúng tari adór heé ta hheehhe'eesiiká. AAKOÓ MUNGÚ kuúng u wahaas ar aleesleemuuwós, mureekesoó yaariír u dabár ót ta xirfuuwo.

¹⁷ Asma tlakweemaadá' taa tlehhahhít dír múk Lebanoni kuúng u i ki/iyá', nee makaydá' taa tsu/aa/iín kuúng u de'eérár gaasiyá'. Tí sleémeero kuúng u sleér asma mukdá' taa tsú/ nee /aytaadá' taa tlehhahhít baraá yaamuuká' nee dír yaamuloouusér baraá gixsaduín wa hoot.

¹⁸ «Munguú slaqsaay oo taa tléhh ar daba' gár uwa bui, inós bar muqslír hee aa kwahhuút, gaa barqo lamtá tawo. Heedaádá' murslaaqat gwaa tleehh nguwa malé harahhifi gár nguwa bui, munguúwós kwí i qamin bar munguú murslaaqatuú axweesantá aslawká.

¹⁹ Tsaxwaawós heedaadá' xa'anoó babáw, ‹Tlawáng›, laqaá kudá' tlaa/ár afaa wasl ga babáw, ‹Sihhiitáng›. Xay, muruusíng kuúng u intsaahhatísi? Qaytsiít, kwaa sliík ar sahaábu nee ar muqslár peésa, ala i hiinsluú kon'aaká baraaine.»

²⁰ «Ala AAKOÓ MUNGÚ i baraá do'ós kudá' hhoohhoó' i dirii', yaamu sleémeero i xasliitiye' geeraawós i ale.»