HABAKUKI 1 - Biblía Axweesantá Hhohho' ar Mungú 2004

¹ Kaangwí an iigu'utuú AAKOÓ MUNGÚ oo aarusmo Habakuki aa ár.

Wa/aa/ír aarusmo

² «Aá AAKOÓ MUNGÚ, kuúng firor'eé' ka siaaiin ay xaylá? Una i /aa/amiím asma /ayta, ala kuúng i sla'aká ba/amisaro.

³ Waáy, mihar muruú tlákwií laqaqaán nee slahh'amuwo, asma hhita nee /aytaro i dír geeraaeé' dirii'iyá', slám gila nee afo tlaxungo naa /eetiyé'.

⁴ Gawaá adoorihe dabe kaa waaslaá', nee sakwasleemár ganaa' i káhh, asma múk tlákw múk hota ganaá' guna /amaatseék. Gawaá adoorihe tam sakwasleemár ganaa' barka tleéhh, kan isa geeqáy.»

Mu/aywatstá Mungú

⁵ «Baraá xoordu i qaytsitaak, daqaní ta waa/o/á' nee ta samqaarutá', asma aníng gadiyérka a tleéhh dír kuungá' tar slafíngwí kahha', gadiyér kuungá' ta haratlintia'aaká tam kingi ooi.

⁶ Asma ga/aawaak, aníng xoorór Kaldayo ngi tleés, xoorodá' xaraasl tidá' slaqo tsadér, tam gár kir qoomeesi i káhh. Inooínadá' waraarahhá' ar baraá ayeemo as aalír múk hatlá' ngiwa aaliya'.

⁷ Mukwí a múk tlií/ nee oo dae tlaáq ló'wa alé, mukwí a sager'ín gan /aay baraá kwasleemaduuine nee baraá uray'ine.»

⁸ «Farsuín ku isláhh ta dueemiwo, i xaraasliyá' ta tawerú qwariita, nee slaqwaruusér faras gwa i tsa/aan amór i dahhiya' ka saaw, ki islahh adór gwareesír aa gaanslár tleer amór gár /ayma.

⁹ «Inooín sleémeero nin hardihiyá' as malgu'uuma ngiwa tleehhiya', gitsee/er'ín i xarásl adór fur'ár da/aá daahh, nee múk taa haasaáng wa ohín kun buruumbuur adór hhaasaángw.

¹⁰ Inooín waawitá ngun niqiná', nee múk urén kuri harneet, koo/ír gixsa dir'ine a gár waaniqaay, ngin hhapeérí dalaa/iyá', gixsadá' kari hayoh.

¹¹ Inooín tari waaraahh ar gaanslaay adór fur'a, tlakweema ngin tleehhiyá', i diiqiiaaká asma /uureemooín an adór munguúín.»

Habakuki i malé wa/aa/uus

¹² «Kuúng, AAKOÓ MUNGÚ, Munguúeé' Kudá' hhoohhoó', kuúng an daadeer iimír iimu/uungw wasle, nee an baloó alhhe'eesoó koondaaká. Kuúng AAKOÓ MUNGÚ, múk Kaldayo nguna tlés amooréní ale as tiwa sakwasleemuutiya'. Kuúng Tlaá/a, mukdá' ugwa aleesleemuú hanís as atén tiwa muxiya'.

¹³ Kuúng tu hhoohhoó', tam gár tlaakw ii qaytaro a sla'aká, kuúnguudá' sagagawdu gu sla'aaká arto. Ahaá waáy, mukdá' al/aymár tlehhiít misa tawo ga/eér nee tari dirógí xaslít, qoomár heé tlaákw bar heé hota ganaá' ta inose gu gaamiis.»

¹⁴ «Nee muu kuri adór siyoó baraá tlawi tleéhh, nee adór makaá gur'ér hi'iimitá' awa waawutmoó kooma'aaká?

¹⁵ Múk Kaldayo muu gun uhín ar him'er'ín, kuri burumbuur baraá baratsufay'ín. Inooín adoodá' gin qwal/atamís tiri xirfayemisiyá'.

¹⁶ Gaarí an gár baratsufay'ín ngus ilahhooár muruú ta tsú/í hanmiisiya', nee an gár baratsufay'ín ngus ilahhooár da/a/ángwí hanmamisiya'. Asma baratsufay'ín kudá' gaa diihhooár ar áy nee muruú /aymár yaariire.»

¹⁷ «Xáy, mukduú baraá baratsufayín i dirií' ngu duuxiiaakáhe? Xáy! Aqo xoordu kin tsu/aa/ína ay alhhe'eesay wasle? Ki baloó gurtlaykáhe?»