Geehhoeemaá 9 - Biblía Axweesantá Hhohho' ar Mungú 2004

¹ Malaykamoó kooán tarumbeéta gari ufaáhh. Aníng tsatsee/ír naa gawaá doorí wa /et ngiri ár, iri hú' gawaá daanduú yaamu. Tsatsee/irí gweermór bohongwdá' aa tsarere'eet gari sleér.

² Tsatsee/irí bohongwdá' nguwa gwét, quui niri baraá bohongwdá' wa ti'ít adór quuír baraá bohóngw asltá ur. Tsee/amá nee doori kiri giwís nee quuír baraá bohongwdá' daahh.

³ Aluuwo ingigi niri ti'ít baraá quuidá' wa ale, iri hardát baraá yaamu. Ingigidá' kari aleesleemuú i haniís oo adór kuduú xiiraawe i koon, baraaká' yaamuwo.

⁴ Kiri báy, «Gitsór yaamu ma hhitiimara', laqaá umuúqo gár naa/a, laqaá tam umuúqo xa'anoowo, ala a mukdá' layár Mungú ga koomaaká gawaá gitsee/er'ine.»

⁵ Ingigidá' kari hara'ayín mukdá' munguwa tsú/, ala ngu slahh'eemis har qoomár slahheeraá kooane. Slahh'eemisuuín kudá' a adór kuduú xiiraangw, hee burngwa tsiíl.

⁶ Qoomaadae muu gwa'ara ga fitlín, ala ka baloó ariiká. Nee inooín ka ilatleeruus tawa qatli, ala gwa'ara gi ilagóp.

⁷ Tlehhemuú ingigití a adór faraásír taa amohhe'eés slaqwarár wa ale. Gawaá sager'ine gár i kona' a gár adór slamángw sahaábu. Nee gitsee/er'ín a adór tiqár muu.

⁸ Se'engw'ín a adór kuquú /ameena. Nee sihhinaaín a adór kuqaá direeri.

⁹ Gaambór'ín ar da/eewa a adór gaambór muqsli. Nee afór hhampe'eeri'ín a adór afór gaarduudá' faras i uuruxun bir slaqwarár áy.

¹⁰ Nee hhayser'ín i laqeelaá koón adór tidár xiiraawe. Nee /uureemooín awa muu ngur slahh'eemisiya' slahheeraá kooane i gawaá hhayser'ín.

¹¹ Nee inooín i waawutmoó koná'. Waawutmoowí a malaykamoó bohongwdá' aa tsarere'eet. Umuuwós tsifrír Ebraniaro a Abadoni, nee tsifrír Yunaniro a Apolioni, gídaabárós a Hhitusmo.

¹² Slahh'ámuú geera aa waaraáhh. Ga/aawaak, slahh'amuú tsár aa meét, i lawee'.

¹³ Malaykamoó lahhoó' tarumbeéta gari ufaáhh. Afór wák ngiri axaás. Afoorí amór i dahh a amór xareemiidá' tsiyáhh awa gawaá kitangwduú ilahhooa, kuduú sahaábu, kudá' geeraá Mungú i dirií'.

¹⁴ Afoorí malaykamooduú lahhoó', kudá' tarumbeétár koóm, guri beér, «Malaykeedá' tsiyáhh gweereek, tidá' taa tseék dír yaaeedá' ur ta babay Eufrate.»

¹⁵ Malaykeerí kana amohhe'eés as qoomaadá' nee baalaadá' nee slahhangwdá' nee kurkudá'. Malaykeerí tsiyáhh kari gweér as daqtá wák ar muu ngiwa tsu/ baraá daqoorayduú tám oo múk baraaká' yaamuwo.

¹⁶ Aníng faarór askaáridá' aa tsa/aan gawaá faras ngiwa axaás, faaror'ín a kume mibeeri tsár sagaáwa kume mibaangw.

¹⁷ Baraá iigu'utueene faras nee mukdá' gwaa i tsa/ani una ár. Mukdá' gawaá farás i dirií' gaambuín awa da/eewe ki da/aten adór asltá wa ale, slám ki sirbo/, nee slám ki tsee/atayen. Sagér farásuudá' a adór sagér direeri, nee baraá afer'ine gár ti'imiit a asla nee quui nee asltá xaraasl ar kiberiíti.

¹⁸ Daqtá wák baraá daqooraydá' tame oo múk baraaká' yaamuwo kana tsuú/ ar muxtaarí tám. Kuna tsuú/ ar asla nee ar quui nee ar asltá xaraasl ar kiberiíti. Muruuwí nina ti'imiít baraá afér farsuú wa ale.

¹⁹ Asma /uuruú farsuuwí i baraá afer'ín nee baraá hhayser'ín. Hhayser'ín a adór dayshe, i sagér koón. Nee i slahh'eemisiyá' ar hhayser'ín.

²⁰ Nee múk aa meet, oo taa tsu/iiká ar muxtaarí, gadiyeédár dabaaín kaa hhu'u'unká, neetlaame kaa mayká sluufmisuuwo, nee munguaá muqslaaqatuuwo, kudá' taa tleéhh ar sahaábu nee ar peésa nee ar muqsla nee ar tlaa/e nee xaai. Munguiiká' i xumisiiaaká nee i axamisiiaaká, slám i hi'iimitiiaaká.

²¹ Mukwí tsu/utar'ín sleeme gaa hhu'u'uniká, nee da/ari'ín kudá', nee tsaatu'uumar'ín nee fiisor'ín sleeme.