Geehhoeemaá 8 - Biblía Axweesantá Hhohho' ar Mungú 2004

Dugnoó faanqw

¹ Deelmoó bee/i dugnooduú faanqw nguwa gweér, tari xasliít gawaá dooriiwo har qoomár niinawe.

² Aníng malaykeedá' faanqw, tidá' sihhimiit geeraá Mungú wa ale ngiri ár. Malaykeedá' kari tarumbeétadaá faánqw i haniís.

³ Malaykamoó hatlá' niri hardáh iri sihhiít dír geeraá kitángw ilahhooa. Inós xooslmoó sahaábu gu kón oo muruudá' mooyángw tsuú' koóm ku i da/a/an ilahhooár wa ale. Muruudá' mooyángw tsuú' koóm oo yaariír kuri inós i haniís, as nguwa haragaasi dinkwa nee firór múk hhohhó' oo Mungú, gawaá kitángw ilahhooa, kuduú sahaábu. Kitaangwí i dír geeraá kitángw aleesleemu.

⁴ Nee quuír muruudá' mooyaangw tsuú' dinkwa nee firór múk hhohhó' oo Mungú iri tsa/aán dír geeraá Mungú, gawaá dákw Malaykamoó wa ale.

⁵ Nee malaykamo xooslmooduáu ilahhooa ka i da/a/an guri taataáhh, guri dalaá/ aslto, tidá' gawaá kitángw ilahhooár i dirii'. Xooslmoodá' guri kwaáhh gawaá daanduú yaamu. Qoomaadár kilae kududuha niri hardát, nee afo nee mankari nee kunseeli.

tarumbeetadu

⁶ Nee malaykeedá' faanqw, tidá' tarumbeétadaá faanqw gi koom, inooín tiri amohhe'eesiyé' as tarumbeetadu kiwa ufaahhi.

⁷ Malaykamoó geera tarumbeéta gari ufaáhh. Tluwoó tlaa/e iri tluúw, nee asltá taa aleedoók nee tseere, muruuwí kuri kwaáhh baraá yaamu. Bartaka wák baraá baduudá' tame awa yaamu asla gari /ák. Bartá wák ar xaai baraá baduudá' tame sleeme asla gari /ák. Nee gitsór naa/ sleémeero asla gari /ák sleeme.

⁸ Malaykamoó tsár tarumbeéta gari ufaáhh. Gár adór tloomár ur ar asltá wa oh kari kwaáhh baraá tlawi. Bartá wák baraá baduudá' tám awa tlawto iri tseere tleehhít.

⁹ Muruudá' slaáf oo baraá tlawi daqtá wák iri qátl baraá daqooroó tame. Nee miringeedá baraá tlawtá wa hi'iimiit daqtá wák kari hhaamiís baraá daqooroó tame.

¹⁰ Malaykamoó tám tarumbeéta gari ufaáhh. Tsatsee/ír ur niri hú' gawaá doorí wa ale. Tsatsee/idá' i ót adór tsaa'astá wa ale. Tsatsee/idá' iri hú' gawaá yaudaá baraaká' yaamuwo. Ala a yau sleémeerowooká. A yaaér wák baraá umuúqo yaudá' tame. Nee slám iri hú' gawaá kutloó ma'aay.

¹¹ Umuú tsatsee/idá' ku babay «Qarqaraay.» Nee bartá wák baraá baduudá' tame awa ma'aay iri qarqarút. Múk yaariír iri qaátl as ma'aydá' asma adoodá' ma'aydá' kiwa qarqareés.

¹² Malaykamoó tsiyáhh tarumbeéta gari ufaáhh. Bartá wák baraá baduudá' tám awa tsee/amahe kari óh, iri gíp, nee awa slahhaangw nee awa tsatse/ sleeme. Gwa/aateemaá tlaatla/aangw bartá wák iri /aaruúr baraá baduudá' tame. Nee gwa/aateemaá xweera sleeme niri adoodár /aaruyé'.

¹³ Aníng gwareesi ngiri ár ar tlatlaw baraá tla/ángw doorír alé, ngiri axaás i tseeamiín ar afór ur, i kat, «Múk baraá yaamuú wa hoót, a tsaxwaaín, a tsaxwaaín, a tsaxwaaín, qoomár malaykeedá' tám aa meti tarumbeetaduuín binga ufáhh. Asma malaykeedá' taa amohhe'és kiwa ufaahhi.»