Geehhoeemaá 7 - Biblía Axweesantá Hhohho' ar Mungú 2004

Múk Israeli oo taa layín

¹ Alaá tihe aníng malaykér tsiyáhh ngiri ár aa sihhít bihhe tsiyáhh ar yaamu. Inooín fur'aadá' tsiyáhh ar yaamu kan ila/án, as fur'aadá' miwa fukukueeliín baraá yaamií alé, laqaá tam gawaá daanduú tlawi, nee laqaá tam gawaá umuúqo xa'anoowo.

² Nee malaykamoó hatlá' nguri malé ár oo tsa/a/ám amoodá' looa niwa tsiirarihh. Inós i layár kón ar Munguú slaáf. Inós malaykeedá' tsiyáhh gari i tseé' ar afór ur, tidá' aleesleemu gwa sleer yaamu ngiwa hhitiin nee tlawi.

³ Malaykamoodá' iri oó', «Yaamu mi kwatiitara', laqaá tlawi, laqaá tam xaai, ay dír laya ngay hhe'eesaan qaasaro gawaá gitsee/ér sagadiyuusér Munguúrén.»

⁴ Mukdá' taa layár i qamín aníng faaror'ín ana axamiís. Faaror'ín a múk kume tsiiruú wák nee mibeeraá tsiyáhh nee tsiyáhh oo taa layár i qamín baraá tlahhi'iidaá múk Israeliwo.

⁵ Múk tlahhoó Yuda oo taa layár i qamín a kume mibaá nee tsár. Oo tlahhoó Reubeni a kume mibaá nee tsár. Oo tlahhoó Gadi a kume mibaá nee tsár.

⁶ Oo tlahhoó Asheri a kume mibaá nee tsár. Oo tlahhoó Naftali a kume mibaá nee tsár. Oo tlahhoó Manase a kume mibaá nee tsár.

⁷ Oo tlahhoó Simeon a kume mibaá nee tsár. Oo tlahhoó Laáwi a kume mibaá nee tsár. Oo tlahhoó Isakari a kume mibaá nee tsár.

⁸ Oo tlahhoó Sebuluni a kume mibaá nee tsár. Oo tlahhoó Yosefu a kume mibaá nee tsár. Oo tlahhoó Benyamini a kume mibaá nee tsár oo taa layár i qamín.

Boo/oó yaariír oo xoordu

⁹ Alaá tihe aníng niri qaytsiít, boo/oó yaariír ló'wa ale nguri ár, oo hee faarooro i baloó aleeslayká. Mukwí dír i dahhi a baraá umuúqo xoorooro nee umuúqo tlahhaywo nee umuúqo mar'afto nee umuúqo tsifriro. Taa sihhiít dír geeraá kitangwduú aleesleemu, nee dír geeraá Deelmooduú bee/i, kaa tsiitiís ar tlabaá /awak, nee slám i haleemaá slaanslár koná' gawaá dabaaine.

¹⁰ Inooín tari tseeamín ar afór ur, ta kaahi, «Ba/ama amór i dahh a amór Munguúrén kudá' aa iwiit gawaá kitangwduú aleesleemu, nee amór Deelmoó bee/i.»

¹¹ Nee malayke sleémeero taa sihhiít umuúqo bihhiwo, kitangwduú aleesleemu gwa harwét, nee bariiseedá' nee muruudá' tsiyáhh oo slaáf sleeme kaa harweér. Inooín sleémeero tari tumbarara'aát dír geeraá kitangwduú aleesleemu, Mungú kuri xirfayeemís,

¹² tari káh, «Amin. Mungú an kudá' tsuuqaá koóm, nee xirif nee sagalooa nee sluufaay, nee ilaiwa/ame nee aleesleemu nee /uuru ay alhhe'eesay wasle. Amin.»

¹³ Aakoó wák baraá bariiseedae aníng iri yaahaás, «Ahaá, mukwí taa tsiitiís ar tlabaá /awak a ín heemá? Nee inooín amór i dahhiya' a amá?»

¹⁴ Aníng nguri báw, «Aáko, kuúng i xú'.» Iri báy, «Mukwí amór i dahhi a baraá slahh'amaayeedá' ur. Nee inooín inqwaruuín kuna hhuúnts nee kuri /awakeemiís ar tseerér Deelmoó bee/i.

¹⁵ Gawaá adoorihe inooín i geeraá kitángw aleesleemuú i dirii'iyá' oo Mungú. Nee inooín i Munguú sagadiyuusiyá' baraá do'ós wa aleeró tlaatla/aangw nee xweeraawo. Nee kudaádá' aa iwiit gawaá kitangwduú aleesleemu, heémarós ga hhaaf gawaaín wa aleeró.

¹⁶ Inooín ta baloó qwariitiiká, nee slám ta waxiitiiká, slám tsee/amá gi baloó slayká, laqaá tam siiree/ír gi baloó slaw i káhh.

¹⁷ Asma Deelmoó bee/i kwí tla/ángw kitángw aleesleemuú i dirií', inós inooín gi de'én, giri geeraharahaar didár kutloó ma'aá slafíngw koóm i dirii'i. Nee Mungú hhirhheeri'ín sleémeero gi fiits baraá ilaaine.»