Geehhoeemaá 6 - Biblía Axweesantá Hhohho' ar Mungú 2004

Dugeenidaá faanqw kiwa gwediít

¹ Aluudae Deelmoó bee/i nguri ár qoomár inós dugnooduú geera nguwa gweér baraá dugeenidá' faanqwe. Nee gár wák baraá muruudá' tsiyáhh oo slafa ana axaás i axwés ar afór adór kududuhaay, i kat, «Qwaláng.»

² Aníng niri qaytsiít, faraásír /awaak ana ár. Heé faraásidá' gaa i tsa/an i ga/alér kón. Nee inós kuri slamángw i haniís. Iri ti'iít ar baali, nee iri baalír áy.

³ Nee Deelmoó bee/i dugnooduú tsár nguwa gweér, aníng afór gár tsár baraá muruudá' tsiyáhh oo slafa ana axaás, i kat, «Qwaláng.»

⁴ Faraásír hatlá' ar daa/aat adór asltá wa ale niri ti'ít. Nee heé faraásirí gaa i tsa/an kuri aleesleemuú i haniís oo wayda nguwa hingeesi baraá yaamuwo, as muu tiwa kilooín tsu/i. Nee paángár ur kari inós i haniís.

⁵ Nee Deelmoó bee/i dugnooduú tám nguwa gweér, aníng afór gár tám baraá muruuduú tsiyáhh oo slafa ngiri axaás, i kat, «Qwaláng.» Niri qaytsiít, faraásír boo/ ngiri ár. Heé faraásirí gaa i tsa/an xooslmoó qoomeemes gu kón baraá dakose.

⁶ Afo ngiri axaás sleeme, ar baraá tla/ángw muruudá' tsiyáhh oo slaáf daahh. Afoorí i kat, «Angaáno oo har qoomoó slooqomoó wák, tlaxoorós a bu'utuú tlaatla/ángw wák. Balángw shayiíri oo har qoomoó slooqa'aá tám, tlaxoorós a bu'utuú tlaatla/ángw wák. Ala di/i nee difaái ma hhitiimaar.»

⁷ Deelmoó bee/i dugnooduú tsiyáhh nguwa gweér, aníng afór gár tsiyáhh baraá muruudá' tsiyáhh oo slafa ngiri axaás, i kat, «Qwaláng.»

⁸ Aníng niri qaytsiít, faraásír hatlá' ngiri ár ar baabahay. Heé faraásirí gaa i tsa/an umuuwós a Gwa'ara, gi'i nee inós tina al koomakoné'. Inooín kiri aleesleemuú i haniís baraá yaamuwo daanduú barakár wák baraá baduudá' tsiyahhawo, as muu kuwa tsu/i ar paánga, nee ar giyeé nee ar pu/i, nee ar makaá xaraaslá' awa baraaká' yaamu.

⁹ Nee Deelmoó bee/i dugnooduú kooán nguwa gweér, aníng qeereemaá muu ina ár baraá guruú kitángw ilahhooa. Mukwí an kudá' taa tsuú/ as axweesantá Mungú nee as lamabu'ungw'ín kudá' taa lamabu'ún.

¹⁰ Inooín tari tseeamín ar afór ur ta kaahi, «Aáko, kuúsíng hhoohhoó' nee oo looeemaá axweés, kuúng ta damraaraan ay xaylá? Kuúng sakwasleema ka tlehh a xaylá, as li/oó tseereerén kuwa bu' dír mukdá' baraá yaamuú wa hoota?»

¹¹ Umuúqo heewo baraaine kuri hiyoó tleér i haniís oo /awaák. Kiri báy, «Kuungá' iwiiwité', deelór niiná kilós i káhh, ay dír faarór sagadiyuusér adór kuungá' nee ar hhaeehúng i bo/, kudá' ta tsu/i adoodá' kuungá' tundura tsuú/.»

¹² Nee Deelmoó bee/i dugnooduú lahhoó' nguwa gweér, kunseelír ur niri hardát, looa iri boo/eér adór guniár taa tleéhh ar se'eengw, slahhaangw sleémeero iri tseere tleehhiít.

¹³ Tsatse/ iri paáhh yaamií alé adoodár na/aá /aantsí awa naa hamaari'iiká kir paahhamaamisi qoomár bar ka diingiís nee bambaaór yaariir.

¹⁴ Doori niri quutliyé' adór slambaree/i kar waageqaaqay. Nee umuúqo tloomaro kari loohatís dirós tidá' i dir'a. Nee umuúqo yaamaá kaahaare awa baraá tla/ángw tlawtí diriia'a kiri loohatís sleeme.

¹⁵ Qoomaadae waawitú baraaká' yaamu nee múk urén, nee geeraharuusér slaqwara, nee múk daqaare, nee múk aleesleemuú koóm, nee umuúqo heewo, oo lawaalmo nee oo lawaalmoowooká, sleémeero tari nahhaát baraá mar'o, nee baraá gur'ér tla/u ar baraá tlom'í dirii'.

¹⁶ Inooín tari tseé' ar afór ur, dír tlom'i nee dír tla/u, ta kaahi, «Atén ti harahue', atén ti lu/e', dír geeraá gitsee/aá kudá' aa iwiiti gawaá kitangwduú aleesleemu, nee dír xarasleemaá Deelmoó bee/iro.

¹⁷ Asma Deeloodá' ur naa hardát ar Mungú nee Deelmoó bee/i sakwasleema kawa tleehhi, nee heé sihhtano ga aleesláw baalaadae a heemá?»