Geehhoeemaá 22 - Biblía Axweesantá Hhohho' ar Mungú 2004

¹ Aluuwo malaykamoodá' yaaér ma'aá slafíngw koom ngiri laqán. Yaaeedá' ma'aywós i gwa/aatiyá' adór looa. Yaaeerí dír niwa wa/amiin a baraá kitangwduú aleesleemu oo Mungú nee oo Deelmoó bee/i,

² nee iri waaráhh ar baraá tla/ángw loohír gixsa. Nee dír afaá yaaeero, bihhaá bartaqá' nee bihhaá bartihe xa'anoó slafiingw i deer. Xa'anoowí i laqwalín sagaáwa mibaá nee tsár gawaá kurkú wake. Mamuuwós giri hamaareemiis umuúqo slahhaango. Nee loo/ór xa'anoowí múk xoordu gun hungu/uumís.

³ Gár taa lu'ús nee Mungú ka baloó ariiká baraá gixsarihe. Ala kitangwduú aleesleemu oo Mungú nee oo Deelmoó bee/i i baraá gixsadá' i dirii'. Nee sagadiyuuseerós inós guri baraadá' wa sluufmís.

⁴ Inooín gitsee/awós ngi ga/ayá', nee umuuwós kwaa gawaá gitsee/er'ín i gooín.

⁵ Xweera baraadae i kahhiyá'. Gwa/aateemaá tsaa'asi inooín gár kis yaahamiisi i káhh, tam gwa/aateemaá tsee/amá sleeme. Asma Aakoó Mungú an gwa/aateemaaín, nee inooín tari waawuti'ii'ín ay alhhe'eesay wasle.

Yesu ni hardah ar gaanslaay

⁶ Aluudae malaykamoodá' iri báy, «/Aymi'iiká' a awa ló' nee awa hariimá' haratlintaaoro. Aakoó Mungú, Munguúduú qeeruú aaruuse, inós malaykamoowós ngwaa ya/aáw as muruudá' hardáh ar gaanslaay nguwa dír sagadiyuuseerós i laqan.»

⁷ «Ga/aaweek, aníng ni hardáh ar gaanslaay. Múk amohhoó' a kudá' axweesanoó aaru'uuma gwa oh, kudá' baraá kitaábuuwí i dirií'.»

⁸ Anuú Yohane muruuwí una axaás nee nguri ár. Nee muruuwí nguwa hhe'eés axaasaro nee arto, aníng niri tumbarara'aát dír ya'aá malaykamoodá' muruuwí ngwa laqan, as inós nguwa sluufmiis.

⁹ Ala inós aníng iri báy, «Adoosíng ma tlehhiitaar. Asma aníng sleeme a sagadiyusmo dinkwa nee kuúng nee hhaeewók kudá' aaruuseero, dinkwa nee kudá' sleémeero awa axweesanoó kitaábuuwí ngwa oohiye'. Ala kuúng Mungú na sluufmiseek.»

¹⁰ Inós aníng iri báy, «Axweesanoó aaru'uuma oo kitaábuuwí mu dugnií qaasaar, asma qooma aa naká/.

¹¹ Heé /aytusmo i kumiiti baraá /aytaarose. Heé slasla/aruú tlehhaahhiít i kumiiti baraá slasla/aruwose. Heé hota ganaá' i kumiiti baraá gan'amuuwo, nee heé hhoohhoó' i kumiiti tiwa hhoohhoeemisi.»

¹² «Ga/aaweek, aníng ni hardáh ar gaanslaay, nee slaqwer'eé' i dinkwa nee aníng, as umuúqo heewo nguwa buu' ar adoodá' tlehhmi'iiwós i dirii'iya'.

¹³ Aníng an Alfa nee Omega, kuduú geera nee kuduú alhhe'eesaay. Nee slám aníng an iimu/uungw nee alhhe'eesaay.»

¹⁴ Múk amohhoó' an kudá' inqwaruuín gu hhuuntsiít, as kahhó' inooín tawa harín mamaá xa'anooduú slafiingw kiwa /ayi, nee tawa baraá gixsadií dahi ar afeerós.

¹⁵ Amór tsee/aá gixsaro seeaawe i deer, nee da/aluuse, nee fuquuse, nee tsu/utuuse nee kuduú munguaá hatlá' haratlintaatií', nee mukdá' sleémeero axweesanoó lama gwa intsaahh axweesanto.

¹⁶ «Anuú Yesu malaykamooeé' nguna ya/aáw as muruuwí nguwa dirhúngií lamabu'un, kuungá' múk kríshaanáy oo baraá gixsadaá dimbadimbé. Aníng a heedá' baraá tlahhoó Daudí daáhh. Aníng oo xwaylár Daudi. Aníng an tsatsee/idá' gwa/aat ar matlaatle ar ta bay Haymú.»

¹⁷ Qeeru nee dasiidá' ta duxuuti ta kaahi, «Qwaláng.» Nee heé adoodá' gaa axaas i ooi, «Qwaláng.» Nee heé aa waxiit ni hardihi, nee umuúqo heé ma'aá slafiingw gi slaá' ngi taataahhi awa bu'utu wasl.

¹⁸ Umuúqo heewo oo axweesanoó aaru'uuma gu axamiís, kudá' baraá kitaábuuwí i dirií', aníng inós u gurbuú' niwa kah, Hee barnaxes garka gaa doók baraá axweesanaywí i alé, daqaní Mungú muxtaadá' taa gooín baraá kitaábuuwí i aleeró ga dook daanduú heewí alé.

¹⁹ Nee hee barnaxes garka gaa /aareés dír axweesanoó kitaábuuwí oo aaru'uumaro, daqaní Mungú hariímár heedá' ga hingees baraá xa'anoó slafiingo nee baraá gixsadá' hhoohhooe. Hariímarós ar ta hingeesi an tidá' kangós taa gooín baraá kitaábuwí i alé.

²⁰ Kudá' muruuwí gu lamabu'uúm i kaahi, «Eeít, aníng ni hardáh ar gaanslaay.» Amin. Qwaláng, Aako Yesu.

²¹ Tsuuqaá Aako Yesu ta dinkwa nee kuungá' sleémeero. Amin.