Geehhoeemaá 21 - Biblía Axweesantá Hhohho' ar Mungú 2004

Dooraá /aben nee yaamaá /aben

¹ Aluuwo dooraá /aben ngiri ár, nee yaamaá /aben. Asma dooridá' geera nee yaamuudá' geeraawo naa waarahhiyé', slám tlawtá malé dáw i káhh.

² Gixsadá' hhoohhoo' ngiri ár, Yerusalémúr /aben, i gawaá doorí wa awdít, amór Mungú wa ale. Gixsadá' kaa tsiitiís adór dasír ta duxuuti, ar taa parootuús as garmaadá' ga duxuút.

³ Aníng afór ur ngiri axaás ar baraá kitangwduú aleesleemuú daahh. Afoorí i kat, «Ga/aawaak, hotángw Mungú dír i dirii'i a dír tla/ángw muu. Inós iri hoot tla/angw'ín wa ale, nee inooín tari mukós. Nee Mungú inósuú kilá' tari dinkwa nee inooín.

⁴ Inós hhirhheeri sleémeero gi fiits gawaá ilaaine. Nee slám gwa'ara didae i káhh, tam tsuunqumis, nee tam /aa/e, nee slahh'eemis sleeme i kaahh. Asma muruuduú geera aa qaroó waaraáhh.»

⁵ Kudá' aa iwiit gawaá kitangwduú aleesleemu iri oó', «Ga/aaweek, aníng mura' sleémeero u /abeemií ki/ís.» Nee iri malé báy, «Gooimeek. Asma /aymi'iiká' a /ayma'aá ló' nee awa hariimá' haratlintaaooro.»

⁶ Nee inós aníng iri báy, «Aa tleehharút. Aníng an Alfa nee Omega, iimu/uungw nee alhhe'eesaay. Heé aa waxiit u ma'áy haniis awa bu'utu wasl, awa baraá kutlá ma'aá slafíngw dahhá'.

⁷ Heé arba/ati ga sláw, inós muruuwí sleémeero gu aal. Daqaní aníng tari Munguúwós nee inós tari garmaaeé'.

⁸ Ala mukduú da'ayuuse, nee kudá' naa haratlinti'ii'iiká, nee kudá' buhhtimisá', nee mukdá' múk tsuú/, nee múk fuquuse, nee da/aluuse, nee múk munguaá hatlá' haratlintaatií', nee lamuuse sleémeero, dir'ín a baraá tlawtadá' asltá kiberiíti iwa ohahiin. Gaarí an gwa'arár tsár.»

Yerusalémúr /aben

⁹ Malaykamoó wák aníng iri i hardáh. Inós an malaykamoó wák baraá malaykeedár faanqwe, tidá' slooqa'aá faanqw gi koom. Slooqi'iidá' i hatsiyá' muxtaadá' faanqw ar alhhe'eesaywo. Malaykamoowí aníng iri báy, «Qwaláng amoorí, aníng dasiidár duuxo ngi laqaám, harér Deelmoó bee/i.»

¹⁰ Inós aníng iri ar tláy ar baraá Qeeru ay gawaá tloomár ur ar tleerantleer. Gixsár Yerusalemu ngiri laqán, gixsadá' hhoohhoo', i awdít gawaá doorí wa ale amór Mungú.

¹¹ Gixsarí xirfuú Mungú gu koón. Nee gixsarí iri gwa/át adór tlaa/anoodá' ló'wa gwa/aát, kudá' tlaxo úr, kudá' ta babay yaspi oo gwa/aát adór looa.

¹² Gixsadá' koo/ír ur ga koón ar tleerantleer. Koo/irí afe ngi koon a mibaá nee tsár. Nee malaykér mibaá nee tsár afeerí mibaá nee tsár gana xuún. Nee gawaá afeerihe umér mibaá nee tsár kaa gooín, ar tlahhi'iidá' mibaá nee tsár awa múk Israeli.

¹³ Afér tám i bihhaá da/aáw i dirí', nee bihhaá /iya afe tám, bihhaá basa afe tám, nee bihhaá /uwa afe tám sleeme.

¹⁴ Koo/ír gixsadá' gaa harwet kana iihhaáf ar tlaa/aá mibaá nee tsár. Nee gawaá tla/uká' mibaá nee tsare umér ya/abuuseedá' mibaá nee tsár ar Deelmoó bee/i kana gooín.

¹⁵ Nee kudá' aa axwees nee aníng, inós i daaír kón ar taa tleéhh ar sahaábu, as gixsadá' ngiwa qoomeesi ar daaidá', nee afeerós nee koo/irose.

¹⁶ Gixsadá' tlenaangós nee tlenángw bihheero a gár wák. Inós gixsadá' gari qoomeés ar daaír aáng. Har qoomaywós a adór kilomiíta kume tsár nee tsiire tsár nee mibeeri tsár. Tlenangós nee tlenángw bihhe nee tlenángw gawa sleémeero a wak.

¹⁷ Koo/irós sleeme ngiwa qoomeés, gár aa sláy a miíta mibeeri lahhoó', ar har qoomaydá' hee /iisí ir qoomaameesi. Nee qoomaywí an kudá' malaykamo sleeme ira qoomeemeés.

¹⁸ Nee koo/idá' gár kara tleéhh a tlaa/eedá' hhohho' awa ta babay yaspi. Nee gixsadá' gár kara tleéhh a sahaábu hhohhó', oo qwiirií/ adór looa.

¹⁹ Nee tlaa/eedá' koo/ír gixsa kara iihhaáf kaa parootuús ar tlaa/eedá' tlaxo uren awa da'aweemaá dimbadimbé. Tlaa/anoó geera oo iihhafiiri a yaspi, oo tsár a yakútír sirboo/, oo tám a kalkedóni, oo tsiyáhh a sumarídi,

²⁰ oo kooán a sardoníki, oo lahhoó' a akíki, oo faanqw a krisolíti, oo dakaát a sabarajádi, oo gwaleél a yakútír qantsaar, oo mibaangw a krisopráso, oo mibaá nee wak a hiakínto, nee oo mibaá nee tsár a ametísto.

²¹ Nee afeedá' mibaá nee tsár a kwaslaá mibaá nee tsár, umuúqo afko gár kura tleéhh a kwaslaaslír wák. Nee loohír baraá gixsa gár kara tleéhh a sahaábu hhohhó', oo qwiirií/ adór looa.

²² Ala Doó Mungú oo naa ár baraá gixsadae i kaahh. Asma Aakoó Munguú Aleesleemusmoó mura' sleémeero, nee Deelmoó bee/i, an Doó Mungú oo gixsadá'.

²³ Tsee/amá nee slahhaangw gixsarí gár ngis i gwa/aatiya' i káhh, asma xirfuú Mungú i baraadá' wa gwa/aat, nee tsaa'astós an Deelmoó bee/i.

²⁴ Múk xoordu tari hi'iimiit ar gwa/aateemaá gixsadá'. Nee waawituú baraá yaamu xirfuuín nguri baraá gixsadií huwiyá'.

²⁵ Nee afér gixsadá' ka baloó tseegiiká qoomár tlaatla/aango, nee xweera baraadae i kahhiyá'.

²⁶ Xirfuú múk xoordu kunguri baraá gixsadá' i huuw, nee ilaiwa/amer'ín sleeme.

²⁷ Ala gár slasla/aar ar baraadá' i dah i káhh. Nee slám heé muruú slasla/arén tlehhahhiít, nee heé lamusmoowo i dahiaaká baraadae. Ala múk baraadá' i dáh, a kudá' kilós umer'ín taa gooín baraá kitaábuuduú slafiingw oo Deelmoó bee/i.