Geehhoeemaá 2 - Biblía Axweesantá Hhohho' ar Mungú 2004

Ya/abtór ta huwi amór Efeso

¹ «Kaangwí gooiimeek amór malaykamooduú múk kríshaanáy oo baraá Efesór i dirií', «Axweesantí dír i dahh an dír kudá' tsatse/uú faanqw gwa oh ar dakós oo doó /iyáy, kudá' hi'iimiít baraá tla/ángw kiteeridá' faanqw awa sahaábu awa tsaa'asór koomá'.

² Aníng kángw tlehhemi'iiwók u xuú', nee daawitimeerók nee qiqtliingók. Nee slám a xuú' adór múk tlákw sa qiqtliingo kur aleesleeraaká. Slám mukdá' ugwa iiát, kudá' káh, inooín a ya/abuuse, ala laatí a ya/abuuseerooká, kiri tsáhh adór tar lamuuse.

³ Slám kuúng ana qiqtliín nee slahha'amaayér yaariir ana slaasleér as aníng, slám aga slaaqatká.

⁴ Ala aníng axweesantaka a koóm daanduuwoge, ‹Kuúng sla'aarirók tidár geera aga meér.›

⁵ Gawaá adoorihe, inslaweek didá' kuúng tawa hú', hhu'u'uúm, nee tlehhemi'iiwók kudá' geera ta tlehhahhit ki tléhh. Ala adoorí barnaxes aga tlehhiká, aníng niqo hardáh amoorók, nee aníng daqaní kitaangók kudá' tsaa'astá koóm u hingeés dirós tidá' i dirii'i, bar kuúng aga hhu'u'uundiiká.

⁶ Ala kuúng garka hhoo' aga tléhh, asma kuúng tlehhema'aá múk Nikolai iga áhh. Aníng sleeme tlehhemi'ii'ín iga aáhh.»

⁷ «Heé iaá koóm, axweesantí ngi axaasi, tí Qeeru i kaahi dír múk kríshaanáy, «Heedaádá' arba/ati ga sláw, aníng u ya/aám mamaá xa'anooduú slafiingw ngiwa /ayi, kudá' baraá asalmoó Mungú i dirií'.»

Ya/abtór ta huwi amór Smirna

⁸ «Kaangwí gooiimeek amór malaykamooduú múk kríshaanáy oo baraá Smirnár i dirií', «Axweesantí dír i dahh a dír kuduú geera nee oo alhhe'eesaay. Inós geeraawo ina gwaá' ala iri slaáf.

⁹ Aníng slahh'amaayeerók a xuú', nee narkuwoge. Ala kuúng a daqaarmo. Nee slám a xuú' /ooslislíngw mukdá' káh, atén a múk Yahudi, ala laatí a inooineeká, ala inooín a múk Neetlángw eeharahár.

¹⁰ Slahh'amaayeedá' kuúng ta sleer ma da'ayuutaar. Ga/aaweek, Neetlaangw kuungá' bahh'alé nu tsegiit baraá doó tseegamo, as tunduwa iiari. Nee kuungá' slahh'amu u sleerá' deelo mibaangw. Kuúng masók tu inkihhím tam ay gwa'ara, daqaní aníng slamángw slafiingw ngu haniís.

¹¹ «Heé iaá koóm, axweesantí ngi axaasi, tí Qeeru i kaahi dír múk kríshaanáy, «Heé arba/ati ga sláw, inós ku slahh'eesiiká nee gwa'araadár tsár.»

Ya/abtór ta huwi amór Pergamo

¹² «Kaangwí gooiimeek amór malaykamooduú múk kríshaanáy oo baraá Pergámó i dirií', «Axweesantí dír i dahh a dír kudá' paángadá' afa xaraasl badu tsaraawo ga koóm.

¹³ Kuúng dír ta hot aníng a xuú'. Kuúng dír ta hot a didár kitángw aleesleemu oo Neetlaangw. Ala án kuúng iga sa tlankká, slám ana kumaamít aníng iwa haratlintaati' tam qoomár de'emaá Antipa lamabu'usmooeé', slám a lamabu'usmooeé' oo inkihhím. Inós kuna gaás baraá tla/angwhúng i alé, didá' Neetlaangw i hooti.

¹⁴ Ala aníng axweesanoó niiná u koóm daanduuwoge. Kuúng mukko u koón diroge, oo intsaahhatimisuú Bala'amu gu eeharahaár. Inós an kudá' Balaki gwa intsaahhatimis adór múk Israeli ngur al/ayi, as masók inooín fu'unaydá' kiwa /ayi, kudá' taa ilahhooár wa hanimiís dír munguaá murslaaqat, nee tawa fuquusi.

¹⁵ Nee slám malé alé kuúng mukko u koón oo intsaahhatimisuú múk Nikolai gu eeharahaár.

¹⁶ Gawaá adoorihe, hhu'u'uúm. Nee bar hhu'u'uundaaká, aníng ni gaanslár hardáh amoorók, nee aníng niri slaáqw nee inooín ar paángár gawaá afkueé' daahh.

¹⁷ «Heé iaá koóm, axweesantí ngi axaasi, tí Qeeru i kaahi dír múk kríshaanáy, «Heedaádá' arba/ati ga sláw, aníng muruú /aymaadá' ta bay Maána kudá' taa luú/, u haniís. Nee tlaa/anoó /awaák nguri haniís. Gawaá tlaa/anoodae umuú /abén kwaa gooín, oo ta baloó tsaahhiiká nee hee, aqo har heedaádá' gu sláw.»

Ya/abtór ta huwi amór Tiatira

¹⁸ «Kaangwí gooiimeek amór malaykamooduú múk kríshaanáy oo baraá Tiatírár i dirií', «Axweesantí dír i dahh a dír Garmoó Mungú, kudá' ilaawós gwa/aatá' adór tsángw asla, nee ya'aawós a adór muqslír sirdaa/aat ar taa ló'wa hhohhoeés ar asla.

¹⁹ Aníng tlehhemi'iiwók i xuú', nee sla'aarirók, nee haratlintaaoorók, nee gadiyeérók nee qiqtliingók. Nee slám a xuú' adór tlehhemi'iiwók kudá' alhhe'eesaay kir ak yaariír ta kudaá kudá' geeraawo.

²⁰ Ala aníng axweesantaka a koóm daanduuwoge, /ameenidá' ta babay Yesebeli a aleeya/a/aán. Inós ti babeer a aaruso'o, nee sagadiyuuser'eé' gari intsaahhatimís nee gari qwaarés as tawa fuquusi, nee fu'unaydá' kiwa /ayi awa taa ilahhooár wa haniís dír munguaá murslaaqat.

²¹ Aníng pa/aangw una haniís dirós i alé as iwa hhu'u'uun. Ala fuqtós tidá' gaa sí' hhu'u'uungo.

²² Qaytsiít, aníng inós a qaatiís ar tiqti, nee mukdá' nee inós alfuquusá' u slahh'amuú yaariír i haniís, inooín barnaxes ta hhu'u'unká nee tlehhema'aá /ameenidá' birka mayká.

²³ Nee aníng na/iiwós i faák tsu/utaaro. Nee múk kríshaanáy sleémeero gari xuu' adór aníng tar kudá' munér muu ga tsee/ariím nee inslawaywo. Nee aníng umuúqo heewo baraahunge un buú' ar adoodá' inós wa hariím as tlehhemi'iiwós kudá' aa tlehhiít.

²⁴ «Ala kuungaásingá' aga mete' dír Tiatira, kuungá' intsaahhatimisuuwí tlákw ugwa eehadi'iiká. Kuungá' muruudá' ugwa xui'iiká, kudá' inooín tawa kaahi a lu/aaroó muruú Neetlaangw. Án kuungá' nu baw, án huwár hatlá' ngi qaasaaká daandeemoohúng i aleeró.

²⁵ Ala tisíng ta koonda' na ooha hhe'eesaak ay dír án ni hardah.

²⁶ Heedaádá' arba/ati gaa slay, nee adoodá' aníng ni slaa' gari tlehhahhiit ay alhhe'eesaay, aníng heewí u waawutmoó wa qaás daanduú múk xoorduwo.

²⁷ Nee inós múk xoordu guri sawaawuti'ii'ín ar hhartá muqsli, nee guri parhhamiis adór qaambeesamá wa ale. Asma tam aníng waawuti'iimarí ana sláw dír Baabuúeé' wa ale.

²⁸ Nee aníng tsatsee/idár matlaatle a dirós i haniís.

²⁹ «Heé iaá koóm, axweesantí ngi axaasi, tí Qeeru i kaahi dír múk kríshaanáy.»