Geehhoeemaá 19 - Biblía Axweesantá Hhohho' ar Mungú 2004

¹ Alaá muruuwihe afór ur ngiri axaás ar adór afór boo/oó yaariír oo gawaá doori. Afoorí iri ó', «Mungú i xirfuuti!» Ba/ama ar Munguúrén, nee xirif nee /uuru.

² Asma sakwasleemarós ar ló' nee i ganá'. Inós tsaatuso'oodá' ur, tidá' yaamu gaa hhitiin ar tsaatu'uumarós, gaa sakwasleemuút. Mungú gana li/áy buú' asma inós sagadiyuusér Mungú gana tsú/.»

³ Tari malé oó', «Mungú i xirfuuti! Quui i gawaawós wa sihhmaamít ay alhhe'eesay wasle.»

⁴ Bariiseedá' mibeeri tsár nee tsiyáhh, nee muruudá' slaáf oo tsiyáhh tari tumbarara'amiít dír geeraá Mungú, kudá' aa iwiit gawaá kitángw aleesleemu. Mungú kuri sluufmiís, tari oín, «Mungú i xirfuuti!»

Bar/uú duuxór Deelmoó bee/i

⁵ Afór baraá kitángw aleesleemuú daahh iri ó', «Munguúrén na diidi'iimisaak, kuungaásingá' sleémeero awa sagadiyuuseerós, kuungaásingá' Munguú ilaiwawa/á/, múk ninákw nee múk urene.»

⁶ Afo ngiri axaás ar adór afór boo/oó yaariír, nee adór afór ma'aá yaariír awa wa/amiimá' baraá wa/ángw i alé, nee slám adór afór xuuraaír /uuruú koom. Afoorí iri ó', «Mungú i xirfuuti! Asma Aakoó Munguúrén, Aleesleemusmoó mura' sleémeero, inós waawuti'iima gaa sláy.

⁷ Gimsé', qwalaa/aré', baraa/aré', Mungú u xirfayeemisaán. Asma qoomár duuxór Deelmoó bee/i aa xeér, nee dasidár duuxo taa qaroó amohhe'és.

⁸ Nee slám Mungú dasidá' gaa aleesleemií haniís kawa tsiitisi ar inqwaruú /awák oo taa tleéhh ar kitaánír hhohho'.» Inqwaruudá' /awák oo hhohhó' a tlehhemi'iidá' ganaa'á' awa múk hhohhó' oo Mungú.

⁹ Inós aníng iri báy, «/Aymi'iiká' gooiimeek, ‹Múk amohhó' a kudá' taa dahi'ís baraá duuxór Deelmoó bee/i.› » Iri malé báy, «Axweesanaywí a axweesanoó ló' oo Mungú.»

¹⁰ Aníng niri tumbarara'aát dír ya'aawós i alé as inós nguwa sluufmiis. Ala inós aníng iri báy, «Adoosíng ma tlehhiitaar. Asma aníng sleeme a sagadiyusmo dinkwa nee kuúng nee hhaeewoge, kudá' sleémeero awa lamabu'úngw Yesu ngu koomá'. Ala kuúng Mungú na sluufmiiseek.» Asma lamabu'úngw Yesu an qeeruú aaru'uuma.

Heé faraásír /awaak gaa i tsa/an

¹¹ Aluuwo doori ngiri ár naa gweeriitiyé'. Nee faraásír /awaak ngiri baraadá' wa ár. Nee heé faraásidá' gaa i tsa/an ku bay Heé inkihhím nee Heé Looeemaá káh. Inós sakwasleema ga tleehh nee slaqwara ar gan'amu.

¹² Ilaawós a adór tsángw asla, nee gár gawaá sagós a slam'aá yaariir. Inós kwaa umií gooín oo hee i xuiiká, aqo har inós kilós.

¹³ Inós kwaa tsiitiís ar inqwaarír taa tumquús baraá tseere, nee umuuwós ku bay Axweesantá Mungú.

¹⁴ Nee boo/oó gawaá doorí dirií' guri eehár, taa tsa/án gawaá farsuú /awák. Inooín inqwaruú kaa i tsiitimiís a inqwaruudá' /awák taa tleéhh ar kitaánír hhohho'.

¹⁵ Nee paángár xaraasl i baraá afkós wa ti'imít, as inós múk xoordu nguwa darahhi ar paángadá'. Inós inooín gi sawaawuti'ín ar hhartá muqsli. Nee inós bohongwduú mamaá sabiíbu kiwa tsoo/iti gu kala/án, kuduú buhhtaá Munguú Aleesleemusmo.

¹⁶ Nee inós baraá inqwaarirose nee gawaá kutl/umoowose kwaa umií gooín tawa kaahi, «Waawutmoó waawitá nee Aakoó bariise.»

¹⁷ Aluuwo malaykamoó wák nguri ár aa sihhiít gawaá looa. Inós iri tseé' ar afór ur iri oó' dír tsir/o sleémeero ar gáwtí tlatlaw, «Qwalaasé', burumburiitaré' dír muruú /aymaadá' úr oo Mungú.

¹⁸ Qwalaasé', fu'unaá waawitá /ayaak, nee fu'unaá geeraharuusér askaári, nee fu'unaá askaári, nee tam fu'unaá faras, nee awa mukdá' farsuú i tsa/a/ám, nee fu'unaá muu sleémeero, awa múk lawaale nee múk lawaaleerooká, awa múk ninákw nee múk urene.»

¹⁹ Aluuwo makiito'oodá' ana ár, nee waawituú baraá yaamu nee askaárir'ín. Inooín tana burumburiít as tawa slaqwi nee kudá' gawaá daanduú faraásír i dirií' nee askaárirose.

²⁰ Makiito'oodá' kari óh dinkwa nee aarusmooduú lama. Aarusmoowí a kudá' tlehhema'aá waa/oo/amo gaa tlehhiit geeraá makiito'oodá' wa ale. Nee slám inós muu guna al/agín ar tlehhemi'iiwós kudá'. Múk taa al/aáy a kudá' layár makiito'o gaa ilaoh nee oo murslaaqatuú makiito'oodá' gwa i tumbarara'aat. Kuká' tsaraawo kiri slafi kwaáhh baraá tlawtadá' asla iwa ohahiin ar kiberiíti.

²¹ Nee mukdá' aa meet kuri tsuú/ ar paángár kudá' aa iwiit gawaá daanduú faraási. Paángarí dír i dahh a baraá afkós. Nee tsir/o sleémeero iri áx fu'unay'ine.