Geehhoeemaá 18 - Biblía Axweesantá Hhohho' ar Mungú 2004

Hu'umaá Babuloni

¹ Alaá muruuwihe malaykamoó hatlá' nguri ár. Malaykamoowí i awdiit gawaá doorí wa ale. Inós aleesleemuú úr gu kón. Yaamu kiri gwa/atís xirfuuwose.

² Malaykamoowí iri tseé' ar afór ur iri oó', «Babulonidá' ur aa hú'. Inós aa hotángw neetlaamér tlakw tleehhít, nee slám a mar'ír neetlaameedá' slasla/aren, nee a mar'ír umuúqo tsir/ír tlaakw, tidá' ta ahhiiti.

³ Asma múk xoordu sleémeero gwa oonitimís ar tsaatu'uumarós tidá' xaraasl adór difaáír aa hamat. Nee waawituú baraá yaamu aa fuquús nee inós. Nee múk halaanu'uumár tlehhiít baraá yaamuwo, aa daqaari'iít ar daqaari'iimarós tidá' ur ar har qoomay wasl.»

⁴ Aníng afór hatlá' ngiri axaás ar gawaá dooraá daahh. Afoorí i kat, «Muk'eé', kuungá' ti'iité' baraawose, as ma dinku'uumisaara' nee inós baraá tlakweemaawose, nee slám as kuungá' mutunduwa muúx dinkwa nee inós.

⁵ Asma tlakweemaawós naa tlahhiyé' nay hardihiyé' gawaá doori. Nee Mungú tlakweemaawós sleémeero gaa insláy.

⁶ Kuungá' inós buaak ar adoodá' inós ira bu'uún. Ka sagaáwa tsár wa buá' ar tlehhemi'iiwós kudá'. Inós wahaasaak ar wahaangw oo adór kudá' inós muu ngura wahamís, ala dirose sagaáwa tsár wa doogaak.

⁷ Slahh'ámu nee gurhaami dirós i haniisaak ar adoodá' inós tira xirfayeemís, nee ira hót ar slafíngw diihhooa. Asma inós i baraá muunaáwósí kat, ‹Aníng a waawuto'o, slám a kwaalo'orooká. Aníng gurhaami a baloó araaká.›

⁸ Ala as inós iwa adoorí kat, muxtaarós i baraá looár wák i hardát, pu/i nee gurhaami nee giyeé. Inós kari xaawúy kángw kilá' wa aleeró ar asla. Asma Aakoó Mungú kudá' inós gaa sakwasleemuut, inós i /uuruú kón.»

⁹ Nee waawituú baraá yaamu, kudá' aa fuquus nee inós, nee kudá' nee inós diihhooa kaa al/aay, inooín tari tsuunqumiis qoomár quuír asltá inós gaa xaawuur bar kaa ár.

¹⁰ Inooín tari amór saáw i sihhiit as tawa da'ayumiiti slahh'eemisuuwós kudae. Tari ooi, «Gixsadá' ur ar Babuloni, gixsadá' /uuruú koom, hhiintluuwók ku gawít, asma ar qoomár niinawe sakwasleemarók ina i hardát.»

¹¹ Nee mukdá' halaanu'uumár tlehhiít baraá yaamuwo, inooín sleeme ta /aa/amín nee ta tsuunqumiis as inós. Asma heé muruuín kudá' gu tlaxuúm i kaahh daxta.

¹² Muruuín kudá' ta tlaxwaaxun a kwí, sahaábu nee peésa nee tlaa/eedá' tlaxo uren nee kwasluudá' tlaxo uren, inqwaruudá' /awák taa tleéhh ar kitaánír hhohho' nee kudá' sirda/atén, nee inqwaruudá' natsaatsaá' nee kudá' da/atén, nee umuúqo xa'anoó mooyaangw tsuua, nee umuúqo xooslmoó taa tleéhh ar xareemaá daawe, nee umuúqo xooslmoó taa tleéhh ar xa'anoó tlaxo úr, nee kudá' taa tleéhh ar muqslár sirda/aten, laqaá ar muqslár da/aten, laqaá ar tlaa/eedá' ta bay marumaru.

¹³ Nee slám qafoodá' tsuuá' awa xa'anoodá' ta bay dalasini, nee muruudá' mooyaangw tsuú' oo ta baraá di/tá i qamaamin, nee xwatsoodá' ta da/a/an awa mooyaangw tsuuá', nee di/itadá' mooyaangw tsuu', nee di/tá na/amo, tidá' mooyaangw tsuu'. Nee difaái nee di/tá seituúni, nee puuruú /awák nee angaáno, nee hikwa nee bee/aangw, nee faras nee gaardu, nee lawaale nee tam múk hatlá' sleeme.

¹⁴ Án kiíng i baw, «Mamaá xaai kudá' muunaáwók i slai naa ilaawók wa qwaariyé'. Muruuwók sleémeero kudá' tlaxo urén nee kudá' xirfuú koóm, aa ilaawók wa qwaár sleeme. Nee slám muruuwí muu gu baloó ariiká.»

¹⁵ Mukdá' halaanu'uumár tleéhh ar muruuwí, kudá' daqaari'iima gaa slay ar Babuloni, tari amór saáw i sihhiit as slahh'eemisuuwós kuwa da'ayuumiti, tari /aa/amín nee tari tsuunqumiís.

¹⁶ Tari oín, «Hhiintluuwós ku gawít, Gixsadá' ur, tidá' taa tsiitiís ar inqwaruú /awák oo taa tleéhh ar kitaánír hhohho', nee inqwaruú sirda/atén nee oo da/atén, tidá' taa parootuús ar sahaábu nee ar tlaa/edá' tlaxo uren nee ar kwaslaá hhohho'.

¹⁷ Asma daqaari'iimarí sleémeero aa qwát gawaá looár wák i alé.» Nee umuúqo heewo oo miringér gan'aamiís baraá tlawto, iri sihhiit amorqá' saáw i ale, nee mukdá' sleémeero oo aa'aá káw ar baraá tlawi ar miringe, nee tam kudá' sleémeero baraá miringér wa gadiyuús, kuká' sleémeero tari sihhiit amór saáw i alé.

¹⁸ Mukwí iri ló'wa /aa/amín qoomár quui kawa ár ar gixsár Babuloni asla ngiwa al ót. Tari oó', «Gixsár ur ar adór tí i deéro?»

¹⁹ Hhape kari kwakwaáhh gawaá sager'ín i aleeró, tari /aa/amín ar afór ur nee tari tsuunqumiís, tari oín, «Gixsadá' ur hhiintluuwós ku gawít. Asma muu sleémeero oo miringér koóm ar baraá tlawtá wa hi'iimiit, inooín tana daqaari'iít ar daqaari'iimár gixsarí. Ala hamí ar qoomár niinawe daqaari'iimarós sleémeero aa qwát.»

²⁰ Kuungá' doóri, nee kuungá' múk hhohhó' oo Mungú, nee ya/abuuse nee aaruuse, kuungá' qwalaala/é' as inós. Asma Mungú gixsarí gaa sakwasleemuút as tlehhemi'iiwós kudá' inós naa kuungá' i tlehhít.

²¹ Malaykamoó wák oo /uuruú koóm tlaa/ano guri taataáhh oo adór tlaa/ár xoosliingw. Tlaa/anoowí guri kwaáhh baraá tlawtí alé, iri oó', «Gixsár ur ar Babuloni, kiíng ti kwaahh ar /uuru adór tlaa/anoowí ar alé, nee slám ti ariiká baloó alé.

²² Nee slám mukdá' marímbadá muúx, nee tam múk /ayluuse nee múk filímbír ufhhaám nee múk tarumbeétár ufhhaám, afor'ín ka malé axaasiiká baraawoge baloó ale. Nee slám mukdá' gadiyér dimbadimbé ar daba' ga xuú', inooín ki baloó ariiká baraawoge. Nee slám afór tlaa/ár xoosliingw ka baloó axaasiiká baraawoge.

²³ Nee slám gwa/aateemaá tsaa'asi ki baloó ariiká baraawoge. Nee afór garmoó duuxuxuúm nee ar dasír ta duxuuti ka baloó axaasiiká baraawoge malé alé. Asma mukók kudá' halaanu'uumár tleéhh, inooín a múk aleesleemuú koóm baraá yaamuwo, nee xoordu sleémeero kina al/agín ar da/ariwók.»

²⁴ Baraá gixsarihe tseerér aaruuse kaa ár, nee ar múk hhohhó' oo Mungú, nee ar mukdá' sleémeero taa tsuú/ baraá yaamuwo.