Geehhoeemaá 17 - Biblía Axweesantá Hhohho' ar Mungú 2004

Sakwasleemár /ameenidár tsaatuso'o

¹ Malaykamoó wák niri hardáh. Inós a malaykamoó wák baraá malaykeedá' faanqwe, tidá' slooqa'aá faanqw gi koom. Inós iri amor'eé' axweés iri báy, «Qwaláng amoorí. Aníng sakwasleemár tsaatuso'oodá' ur ngi dirógií laqaám. Inós a tidá' aa iwit gawaá ma'aá yaariir i alé.

² Waawituú baraá yaamu aa fuquús nee inós. Nee mukduú baraá yaamaá hoót kwaa oonitimís ar difaáír tsaatu'uumarós.»

³ Malaykamoodá' aníng iri ar tláy ar baraá qeeru ay baraá xaanxaay. /Ameeni ngiri ár aa iwít gawaá makiito'ór ló'wa daa/aat. Makiito'oorí i háts umér /ooslisliingo. Sagér faanqw ga koón nee xareemaá mibaango.

⁴ Nee slám /ameenidá' kaa tsiitiís inqwaruú sirda/atene nee oo da/atén. Inós kaa parootuús ar sahaábu nee ar tlaa/edá' tlaxo uren, nee ar kwaslaá hhohho'. Inós i xooslmoó sahaábu koón baraá dakose. Xooslmoowí aa haáts muruú tlakwe nee umuúqo slasla/aruú tsaatu'uumarose.

⁵ Nee baraá gitsee/awose umuú naaqo kwaa gooín, «Gixsár ur ar Babuloni, aayór tsaatuuse sleémeero nee aayór slasla/aru sleémeero oo baraá yaamu.»

⁶ Aníng ngiri tsaáhh adór /ameenidá' kara oonitiís nee tseerér múk hhohhó' sleémeero oo Mungú, nee ar tseerér mukdá' taa tsuú/ as Yesu kuwa lamabu'ún. Aníng inós ngiwa ár niri ló'wa waa/oó/.

⁷ Malaykamoodá' aníng iri báy, «Gár ta waa/oo/amiin a milá? Aníng naaqór /ameenirí ngi dirók i oó', nee ar makiito'oorí /ameenirí ga gagariim, tí sagér faanqw ga koom, nee xareemaá mibaangw.

⁸ Makiito'oodá' taa aán inós geeraawo i deer, ala hamí i káhh. Nee inós i ti'ít baraá bohongwdá' aa tsarere'eét wa ale, nee iri tleér amór qwanaay. Nee múk baraá yaamuú wa hoót, kwí umer'ín taa gooinká baraá kitaábuú slafiingw iimír yaamu kiwa tleehhiiká, inooín ta waa/oo/ qoomár makiito'oodá' bar kaa ár. Asma makiito'oorí geeraawo i deer, ala hamí i káhh, nee aluuwo i hardát.

⁹ «Baraá kaangwihe gár ta slai a fuquraangw, nee sagalooa. Sageedá' faanqw a tlom'aá faanqw awa /ameenidá' aa al iwít. Nee slám sageedá' a waawituú faanqw.

¹⁰ Waawituú kooán kwaa daraáhh qaroó alé, nee oo wák i deer. Oo hatlá' naa hardihiiká. Kwí bir naa hardáh, inós deelór iwa hooti ka ureeká.

¹¹ Nee makiito'oodá' geeraawo dáw nee hamí i káhh, inós an waawutmooduú dakaát. Nee slám inós an waawutmoó wák baraá wawitaádá' faanqwe, nee inós i baraá qwanoó káy.

¹² «Xareemidá' mibaangw awa taa aán a waawituú mibaangw. Inooín waawuti'iima kaa slayká. Ala inooín waawuti'iima ka sláy tawa adór waawitá ar har qoomár looár wák dinkwa nee makiito'oodá'.

¹³ Inooín axweesantaín a wak. Gár inooín ta slai a makiito'oodá' kan /uuruuín i haniis nee aleesleemuuín.

¹⁴ Inooínaká' ta slaaqw nee Deelmoó bee/i. Ala Deelmoó bee/i inooín gi ar baa/, asma inós a Aakoó bariise, nee slám inós a Waawutmoó waawitá. Nee mukós kudá' taa ateét nee oo taa tsawaár nee oo inkihhím, inooín baali ngi slayá' dinkwa nee inós.»

¹⁵ Aluuwo malaykamoodá' iri báy, «Ma'aydá' taa aán, kudá' /ameenidár tsaatuso'o aa al iwít, a muu nee boo/aay nee xoordu nee tsifri.

¹⁶ Nee xareemidá' mibaangw awa taa aán, nee makiito'oodá', kuká' /ameenidár tsaatuso'o ngi aahhiyá'. Inooín /ameenidá' ka liitlakuso'o tleehh nee kari /aankweetsiis, fu'unaywós kiri /aay, nee kari xaawúy ar asla.

¹⁷ Asma Mungú inslawaywí gwa qaás baraá muner'ín i aleeró as kawa tleehhi tidá' inós i slai, nee inooín tiwa axweesani slaslaya' as waawuti'iimar'ín kawa haniisi dír makiito'oodá', ay dír axweesanoó Mungú i boo/i.

¹⁸ «Nee /ameenidá' taa aán a gixsadá' ur, tidá' waawituú baraaká' yaamu gu sawaawuti'ii'iim.»