Geehhoeemaá 16 - Biblía Axweesantá Hhohho' ar Mungú 2004

Slooqa'aá buhhtaá Mungú

¹ Aníng afór ur ngiri axaás baraá Doó Mungú i alé. Afoorí malaykeedá' faanqw gari beér, «Tlawsé', slooqi'iidá' faanqw awa buhhtaá Mungú gawaá daanduú yaamu ti ku'use'.»

² Malaykamoó geera iri tláy, slooqomoowós guri ku'uús gawaá daanduú yaamu. Mukdá' layár makiito'oodá' ga koóm, nee oo murslaaqatuuwós kudá' gwa i tumbarara'amiit, mukwí kuri ohín nee um'aá tlakw, awa slahh'eemisá'.

³ Malaykamoó tsár slooqomoowós guri ku'uús baraá tlawi. Nee ma'aá tlawi niri tseere tleehhitiyé' adór tseerér heé aa gwaa'. Nee mura' sleémeero kudaádá' slaáf oo baraá tlawi iri qaátl.

⁴ Malaykamoó tám slooqomoowós guri ku'uús baraá yau nee baraá kutlaay. Ma'aay niri tseere tleehhitiyé'.

⁵ Aníng malaykamooduú aleesleemuú koóm daanduú ma'aaywo nguri axaás i kaahi, «Kuúsíng hhoohhoó', kuúng a kudá' dáw nee a kudá' qaroó daadáw. Kuúng a gan'amuú koón asma kuúng muruuwí kuwa sakwasleemút.

⁶ Asma inooín tseerér mukdá' hhohhó' oo Mungú, nee ar aaruuse kana ku'uús, nee hám kuúng inooín iga tseerér i hanís kawa wahi. Nee adoorí a adór hariim dir'ine.»

⁷ Aluuwo afo ngiri axaás ar baraá kitángw ilahhooár daahh, i kat, «Aakoó Mungú, Aleesleemusmoó mura' sleémeero, sakwasleemarók ar ló' nee i ganá'.»

⁸ Malaykamoó tsiyáhh slooqomoowós guri ku'uús gawaá daanduú tsee/ama. Tsee/amá kuri aleesleemií haniís oo muu nguwa da/a/an ar asla.

⁹ Muu kuri ló'wa da/aa/án, ala tam adoorihe inooín umuú Mungú nguri /ooslisliné', kudá' aleesleemuú koóm daanduú muxtaarihe, nee slám taa hhu'u'unká, nee Mungú kwa xirfayeesiiká.

¹⁰ Malaykamoó kooán slooqomoowós guri ku'uús gawaá daanduú kitangwduú aleesleemu oo makiito'oodá'. Waawuti'iimarós kari giwtír i kwaáhh. Muu tsifreeri'ín giri kikiíhh as slahh'amu,

¹¹ Munguú gawaá doori kuri /ooslislín as slahh'amuuín kudá', nee as um'idá' ngaa ohine', slám tlehhemi'ii'ín kudá' kaa hhu'u'unká.

¹² Malaykamoó lahhoó' slooqomoowós guri ku'uús baraá yaaeedá' ur ar ta bay Eufrate. Ma'aá yaaeedá' niri kahiyé', as waawituú da/aá daáhh loohir'ín kawa tleehhi.

¹³ Aluuwo qeeruú tám oo slasla/arén nguri ár, oo slaqás nee aamaxupa. Qeeruuwí amór i dahhi a baraá afkú dayshamoodá' úr, nee baraá afkú makiito'oodá' nee baraá afkú aarusmooduú lama.

¹⁴ Qeeruuwí a qeeruú neetlaame, kudá' layár tlehhiít. Inooín tan tlatláy amór waawitá sleémeero oo baraá yaamu, as nguwa dinkwár i haragaasi as slaqwara. Slaqwararí i tleehharut a baalaadá' ur ar Munguú Aleesleemusmoó mura' sleémeero.

¹⁵ «Qaytsiít, aníng ni hardáh adór fisusmo. Heé amohhoó' a kudá' dalaá' nee oo tsitaywós gu amohhe'eemiís as miwa hi'iimiít ar /aankwets, tam muu alsi'imuuwós munguwa ár.»

¹⁶ Qeeruudá' waawitádá' guri burumbuúr didá' ta babay Harmagedoni tsifrír Ebraníaro.

¹⁷ Malaykamoó faanqw slooqomoowós guri gáwtí tsifaaqaás. Afór ur niri baraá Doó Mungú dáhh baraá kitangwduú aleesleemu. Afoorí iri ó', «Aa tleehharút.»

¹⁸ Qoomaadár kilae mankari niri hardát, nee xuuraai nee kududuhaay. Nee kunseelír ur niri hardát. Kunseelirí ka ló'wa ur, tam kunseelír ur ar adór tí naa baloó ti'itká iimír hee kuwa tleehhi baraaká' yaamuwo.

¹⁹ Gixsadá' ur kari qasmiís badu tám, nee gixsadaá xoordu niri yaamií paahhiyé'. Mungú gixsadár Babuloni, tidá' ur, gari insláy, gari xooslmoó wahángw i haniís oo buhhtaawós kudá' xaraaslá'.

²⁰ Umuúqo yaamaá kaahaar awa tla/ángw tlawtí diriiá' niri ilaá wa qwaariyé', nee tlom'i sleeme kari ariiká.

²¹ Tluwoó tlaa/e oo ló'wa úr oo gawaá dooraá daáhh, iri tluúw gawaá múk i alé. Tlaa/aá tluwaywí umuúqo tlaa/anoowo iiloeemaawo a adór kílo mibeeri kooán. Muu Mungú guri /oosliislín asma muxtaadár tluwoó tlaa/e, asma muxtaarós tí ka ló'wa ur.