Geehhoeemaá 15 - Biblía Axweesantá Hhohho' ar Mungú 2004

Malayke nee muxtár alhhe'eesaay

¹ Aluuwo layár hatlá' ana gawaá doorí ár. A layár ur nee ar waa/oo/amo. Layaarí a malayke faanqw ar muxtár faanqw ga koom. Muxtaarí faanqw a tidár alhhe'eesaay. Asma buhhtaá Mungú naa boo/iyé' ar muxtaarí.

² Aluuwo garka ngiri ár, a adór tlawtá gwa/aat adór looár wa ale, ar taa aleedoók nee asla. Mukdá' makiito'oodá' gara baa/, nee murslaaqatuuwós kudae, nee faarór umuuwós kudá', mukwí sleeme una ár. Inooín taa sihhiít gawaá tlawtadá' gwa/aat ar adór looár wa ale. Inooín ta marímbár Mungú kón.

³ Nee slám inooín daa'ángw ta daai oo Mose, sagadiyusmoó Mungú, nee daa'ángw Deelmoó bee/i, ta kaahi, «Aakoó Mungú, Aleesleemusmoó mura' sleémeero, tlehhemi'iiwók ki uren, nee i waa/oo/amór koná'. Waawutmoó xoordu sleémeero, kuúng lohuwók i ganaaiyá' nee slám awa ló'.

⁴ Aáko, heé kuúng u da'ayumiitaaká a heemá, nee heé umuuwók xirfayeemiisaaká a heemá? Asma oo hhoohhoó' a kuúng kilók. Xoordu sleémeero ni hardihiyá' nee niri dír geeraawók i tumbarara'amitiyá', asma tlehhemi'iiwók awa ganaa'á' naa geehhouyé'.»

⁵ Alaá muruuwihe niri qaytsiít, Doó Mungú nguri ár, kuwa gweér. Do'wí a heémadár lamabu'uungw, tidár gawaá doorií dirii'.

⁶ Malaykeedá' faanqw, tidá' muxtaadá' faánqw koom, niri ti'ít baraá Doó Mungú wa ale. Inooín kaa tsiitimiís ar inqwaruú /awák oo taa tleéhh ar kitaánír hhohho'. Nee slám him'ér sahaábu ngaa da/eewer'ínií tsegiitiyé'.

⁷ Nee oo wák baraá muruudá' slaáf oo tsiyáhh slooqa'aá faanqw awa sahaábu giri hanmiís dír malaykeedá' faanqw. Slooqi'iiká' naa hatsiyé' buhhtá Munguhe. Munguúdá' slaáf ay alhhe'eesay wasle.

⁸ Doó Mungú iri haáts quuiro, tidá' amór xirfuú Mungú daahh nee amór aleesleemuuwós. Slám heé dahmuú baraá Doó Mungú gwa aleeslay i kaahh ay dír malaykeedá' faanqw muxtaadá' faanqw ngay hhe'es.