Geehhoeemaá 14 - Biblía Axweesantá Hhohho' ar Mungú 2004

Daa'ángw mukdá' taa gweér

¹ Aníng niri qaytsiít, Deelmoó bee/i nguri ár aa sihhiít gawaá tloomár Siyoni. Nee múk kume tsiiruú wák nee mibeeraá tsiyáhh nee tsiyáhh aa sihhiít dinkwa nee inós. Gawaá gitsee/ér mukwihe gár taa gooín a umuú Deelmoó bee/i nee umuú Baabuúwós.

² Aníng afo ngiri axaás ar gawaá dooraá daahh. Afoodá' a adór afór ma'aá yaariir awa wa/amiimá' baraá wa/ángw i alé, nee a adór afór kududuhár ur. Afoorí naa axaás a adór afór múk marímbár muúx, qoomár inooín marímbar'ín ngiwa muxiya'.

³ Inooín daa'ángw /abén kuna daá' dír geeraá kitangwduú aleesleemuú wa ale, nee dír geeraá muruudá' slaáf oo tsiyáhh, nee dír geeraá bariiseedá'. Ala heé daa'angwdá' intsaahharo gwa aleeslay i kaahh, aqo har mukduú kume tsiiruú wák nee mibeeri tsiyáhh nee tsiyáhh, kudá' taa tlaáxw baraá yaamuú wa ale.

⁴ Mukwí an kudá' taa slasla/aareemisiiká ar /ameena. Inooín taa duuxuxunká. Inooín Deelmoó bee/i kun eeharahaar amór inós iqo kaya. Inooín kaa tlaáxw baraá múk wa ale as tawa bu'úngw geera oo Mungú nee oo Deelmoó bee/i.

⁵ Nee gawaá afer'ine lama i káhh. Asma inooín tlakweema kaa tleehhiiká.

Malaykér tám

⁶ Malaykamoó hatlá' nguri malé ár, i gáwtí dirii' baraá tla/ángw doori. Malaykamoowí i Ya/abtór hhó' kón ar alhhe'eesay wasl, ar i alki/ituú ay dír múk baraá yaamuú wa hoót, dír umuúqo xoorooro nee tlahhaywo nee umuúqo tsifriro nee muko.

⁷ Iri tseé' ar afór ur iri oó', «Mungú ilaiwawa/aak, nee xirfayeemisaak. Asma siiwa naa hardát ar inós sakwasleema ngiwa tleehhi. Gawaá adoorihe, inós i tumbarara'amiitaak, asma inós an tleehharusmoó doori nee yaamu nee tlawi nee kutloó ma'aay.»

⁸ Aluuwo malaykamoó hatlá', oo tsár, aluudá' ngiri haár, iri oó', «Gixsadá' ur ar Babuloni aa hú'. Gixsarí an tidá' xoordu sleémeero gaa oonitimis ar tsaatu'uumarós, tidá' xaraasl, adór difaáír aa hamat.»

⁹ Aluuwo malaykamoó hatlá', oo tám, niri aluudá' haár, iri tseé' ar afór ur iri oó', «Umuúqo heewo oo makiito'oorí ga i tumbarara'aát nee murslaaqatuuwós kudá', nee oo layár makiito'o gaa slay gawaá gitsee/awose laqaá gawaá dakós,

¹⁰ heé adoorí difaáidár buhhtaá Mungú ga wah, tidá' taa baraá xooslmoó buhhtaawós i tleéhh, slám kaa aleedoogiiká nee ma'aay. Nee slám heé adoorí ku slahh'eemiis ar asla nee ar asltadá' xaraasl ar kiberiíti dír geeraá malaykeedá' hhohhó' wa ale, nee dír geeraá Deelmoó bee/i.

¹¹ Quuír slahh'eemisuuín in tsa/aán gáwtí alé ay alhhe'eesay wasle. Mukdá' makiito'oodá' gaa i tumbarara'amiit, nee murslaaqatuuwose, nee umuúqo heewo oo umuú makiito'oodá' gwa slay tawa layaarós, mukwí amohhooár i slay i káhh tlaatla/aangw nee xweeraawo.»

¹² Baraá kaangwihe múk hhohhó' oo Mungú, kudá' hara'ayár Mungú gaa oh nee oo aa kumiit Yesu haratlintaaooro, inooín gár kiwa hariím a qitla.

¹³ Aluuwo afór gawaá dooraá daahh ngiri axaás i kat, «Gooimeek, ‹Múk amohhoó' a kudá' qaátl baraá Aakoó i alé iimír hamí.› » Qeeru iri oó', «A ló', asma inooín ta hunguu/ alaá daawitimer'ine. Asma tlehhemi'ii'ín ti alkoná' nee inooín.»

Bu'úngw yaamu

¹⁴ Aluuwo aníng niri qaytsiít, huunkír /awaak ngiri ár. Nee gawaá huunkirihe oo wák aa iwiít. Inós a adór Garmoó hee. Gawaá sagose gár i kon a slamángw sahaábu, nee baraá dakose gár i kon a tsatoó xaraásl oo tsaaráy.

¹⁵ Malaykamoó hatlá' niri baraá Doó Mungú wa ti'iít, iri tseeamín ar afór ur amór kudá' aa iwiit gawaá huunkidá' guri báy, «Tsataywók taataahheek, ar bu'uumeek, asma qoomár bu'uungw aa xeér, asma balángw baraá yaamu aa ló'wa hamaár.»

¹⁶ Nee kudá' aa iwiit gawaá huunki, tsataywós guri ya/aáw baraá yaamu, yaamu kiri bu'ún.

¹⁷ Malaykamoó hatlá' niri baraá Doó Mungú wa ti'iít, do'duú gawaá doorií dirií'. Malaykamoowí sleeme i tsatoó xaraásl kón oo tsaaráy.

¹⁸ Aluuwo malaykamoó hatlá' niri baraá kitángw ilahhooár wa ti'iít. Malaykamoowí a kudá' aleesleemuú asltá koóm. Kwí iri tseé' ar afór ur amór kudá' tsatoó xaraásl koóm, iri oó', «Tsataywók kudá' xaraásl taataahheek, /ar'aá mamaá xa'anooduú sabiíbu oo baraá yaamu bu'uumeek, asma mamaá sabiíbu naa ló'wa hamaariyé'.»

¹⁹ Malaykamoodá' tsataywós guri ya/aáw yaamií alé, mamaá xa'anooduú sabiíbu oo baraá yaamu giri bu'ún. Mamuudaá sabiíbu giri kwaáhh baraá bohongwdá' mamaá sabiíbu kiwa tsoo/iti, bohongwdá' úr oo buhhtaá Mungú.

²⁰ Mamaá sabiíbu kiri baraá bohongwdá' wa tsoo/iít, tsee/aá gixsa. Tseere niri baraá bohongwdá' wa wá/, iri hardát ay afi qoomár afér faras, tlenaango a adór kilomiíta tsiire tám.