Geehhoeemaá 13 - Biblía Axweesantá Hhohho' ar Mungú 2004

Makaá tsár

¹ Aluuwo makiito'o ana ár i baraá tlawtá wa ti'imít. Xareemiwós a mibaangw nee sage ngi koon a faanqw. Nee gár gawaá xareemiwós a slam'i mibaangw. Nee gár gawaá sageerós a umér /ooslisliingw.

² Makiito'oodá' naa ár slaqsaywós a adór du'uma. Ya'aawós a adór kudá' makiito'ór ta babay duúbu. Afkós a adór kuduú diraangw. Dayshamoodá' úr makiito'oorí gari /uurií haniís, nee kitaangós oo aleesleemuwo, nee gari aleesleemuú yaariír i haniís.

³ Nee sagós oo wák una ár a adór ságw taa tliqiís ar tliqsantá gwa'ara, ala inkahhayduú gwa'ara kwa hungu/uús. Yaamu sleémeero makiito'oodá' ngiri sa waa/oo/iyé', kari eeharahár.

⁴ Dayshamoodá' úr kuri sluufmiís asma adoodá' makiito'oodá' ngiwa aleesleemuú i haniís. Makiito'oodá' sleeme kari sluufmiís, tari káh, «Heé slaqás nee makiito'oorí a heemá? Nee slám heé makiito'oorí ga aleesláw slaqwaraaro a heemá?»

⁵ Makiito'oodá' kari afkwí haniís oo /ayma'aá dara/aangw nee awa /ooslisliingw ngiwa axwes. Slám kari aleesleemií haniís oo gadiyeé ngiwa tlehh slahheeri mibeeri tsiyáhh nee tsár.

⁶ Makiito'oodá' afa guri awátl, Mungú guri /ooslisliín, nee umuú Mungú sleeme, nee hotángw Mungú, nee tam kudá' sleémeero awa gawaá doorí wa hootá'.

⁷ Slám kari ya/án as iwa slaqw nee múk hhohhó' oo Mungú nee nguwa ar ba/. Aleesleemu guri sleér gawaá umuúqo tlahhaywo nee umuúqo muko nee tsifriro nee umuúqo xoorooro.

⁸ Muu sleémeero oo baraá yaamuú wa hoót makiito'oodá' ka i tumbarara'aat, kudá' umer'ín taa gooiniká baraá kitaábuuduú slafiingw iimír iimu/úngw yaamuwo. Kitaábuuwí oo slafiingw oo Deelmoó bee/i, kudá' taa gaás.

⁹ Heé iiaá koóm i axaasi.

¹⁰ Hee bar kwa tseegamór i gooín, aqo kun tseek. Nee hee bar kwa gaasár i gooín ar paánga, aqo kun gaas ar paánga. Baraá kaangwihe múk hhohhó' oo Mungú gár kuwa hariím a qitla nee haratlintaao.

¹¹ Aluuwo makiito'ór hatlá' ngiri ár. Makiito'oorí i ti'imít yaamuú wa ale. Makiito'oorí xareemiwós a tsár, a adór xareemaá deelmoó bee/i. Makiito'oorí bir axwés afoorós a adór tidár dayshamoó úr.

¹² Makiito'oorí aleesleemuudá' sleémeero oo makiito'oodár geera gun ar gadiyús dír geeraá makiito'oodár geeraá wa ale. Makiito'oorí yaamu gina harakeemís, nee múk baraá yaamuú wa hoót sleémeero, as makiito'oodár geera kawa i tumbarara'ati. Tidá' tliqsantá gwa'ara gaa sleer, iri hungú/.

¹³ Makiito'oodár tsár layaá uren gina tlehhít, tam asla gan aweerís gawaá doorí wa ale ay baraá yaamu, dír geeraá muu.

¹⁴ Nee inós múk baraá yaamuú wa hoót gun paslimís ar layuuwós kudá' i tlehhit dír geeraá makiito'oodár geeraá wa ale. Inós mukdá' baraá yaamuú wa hoót gun babeer, «Murslaaqat tleehhaak oo slaqsoó makiito'oodá' taa inkaahhi'ií qaás ar paánga, nee iri male sláf.»

¹⁵ Makiito'oodár tsár aleesleemu guri malé sleér oo murslaaqatuudá' nguwa hiinsluú i qas, as murslaaqatuudá' iwa axweesi, nee mukdá' sleémeero inós gwa sii' i tumbarara'ataro, kuwa tsu/i.

¹⁶ Nee inós muu sleémeero guri harakeemís kuwa layár i qaasi baraá dákw doó /iyayhe, laqaá gawaá gitsee/a. Múk urén nee oo ninakwe guri harakeemís, nee daqaare nee narkuute, múk lawaale nee kudá' lawaaleerooká sleeme.

¹⁷ Nee slám hara'aya gari ó' as heé layaarí ga koomaaká, gaa mingiwa tlaáxw laqaá mingiwa weeriís. Layaarí an umuú makiito'oodá' laqaá faarór umuuwós.

¹⁸ Diirí an dír sagalooór slaa'. Heé fuqurángw koóm faarór makiito'oorí ngi faari. Asma faaroorós a faarór hee. Nee faaroorós a tsiire lahhoó' nee mibeeraá lahhoó' nee lahhoó'.