Geehhoeemaá 12 - Biblía Axweesantá Hhohho' ar Mungú 2004

/Ameeni nee dayshamoó úr

¹ Layár ur iri geehhouúr gawaá doorí wa ale. Layaarí a /ameenír taa tsiitiís ar tsee/amá, nee slahhaangw i baraá tsa/a'aá ya'aawós i dirii'. Nee gár gawaá sagós a slamángw tsatse/uú mibaá nee tsár.

² /Ameenirí a tsiiháy, i /aa/amiín asma asltá xwayla nee as slahha'amaayér xwayla.

³ Layár hatlá' iri geehhouúr gawaá doorí wa ale. Layaarí a dayshamoó yangaariír oo daa/aát. Dayshamoowí sage ngi kon a faanqw nee xareemi a mibaangw. Nee gawaá sageerose gár i kon a slam'aá faanqw.

⁴ Hhaysaá dayshamoowí tsatse/uú gawaá doori nguna duuruxuné' nguri kwakwaahhiyé' baraá yaamu. Tsatse/uú taa duuruxún a bartá wák baraá baduudá' tám awa tsatse/uú doori sleémeerowo. Dayshamoodá' iri sihhiít dír geeraá /ameenidá' xwaylár slaa', as na/aywós nguwa gu/i qoomár inós bar na/aay ngwa sangw xwayluúr.

⁵ /Ameenidá' na/oó garma guri xwayluúr. Na/aywí an kudá' xoordu sleémeero gi de'eém ar hhartá muqsli. Na/aywós kurir tláy hamtidár kilae ay amór Mungú, ay amór kitaangós kuduú aleesleemu.

⁶ /Ameenidá' iri góp ay baraá xaanxaay. Amoodae dirós kaa amohhe'eés nee Mungú as kawa amoodá' wa /aymiisi deelo kumuú wák nee tsiire tsár nee mibeeri lahhoó'.

⁷ Gawaá dooriiwo slaqwara niri ti'ít. Mikaeli nee malaykeerós tari slaáqw as dayshamoodá' úr kuwa baali. Dayshamoodá' úr dinkwa nee malaykeerós tari slaáqw sleeme nee inooín.

⁸ Ala dayshamoodá' nee malaykeerós taa baalinká, dir'ín iri qwát gawaá dooriiwo.

⁹ Dayshamoodá' úr kunguri kwaáhh, dayshamooduú aáng, kudá' ta babay oo tlaákw nee Neetlaangw. Inós an kudá' muu sleémeero gu al/agagiím. Kunguri kwaáhh baraá yaamu. Malaykeerós sleeme kingiri kwaáhh dinkwa nee inós.

¹⁰ Aníng afór ur ngiri axaás gawaá doorí i alé, i kat, «Iimír hamí ba/ama nee /uuru nee waawuti'iima a ar Munguúrén, nee aleesleemu a oo Kristowós. Asma sakwasleemusmooduú hhaeerén kwaa yaamií kwaáhh, kudá' inooín gi sakwasleemaamuút dír geeraá Munguúrene tlaatla/aangw nee xweeraawo.

¹¹ Inooín sakwasleemusmoodá' kuna arbaá/ ar /uuruú tseerér Deelmoó bee/i nee ar axweesantá lamabu'ungw'ín. Asma inooín slafingw'ín ngwa slai'iiká, tam gwa'ara sleeme ngaa ilaguwi'iiká.

¹² Gawaá adoorihe, kuungá' doóri, bara/é', nee kuungaásingá' sleémeero awa baraasíng wa hootá' sleeme. Kuungá' yaámu nee tláwi, a tsaxwaahúng. Asma Neetlaangw, inós naa amorhúng i aweér. Inós i ló'wa xaraasl, asma gaa xuú' adór deeloorós ar aa met kar ureeká.»

¹³ Dayshamoodá' ngiwa ár adór kura kwaáhh baraá yaamií alé, /ameenidá' na/oó garma gwa xwayluur gari gusiisín.

¹⁴ Ala /ameenidá' kari hhampe'eeraá tsár i haniís awa gwareesidá' ur, as inós iwa /akut ay baraá xaanxaay, ay dirós tidá' inós kawa /aymaamisi qoomár kureeraá tám nee tlaqi. Didá' ka saaw dír dayshamoodae.

¹⁵ Dayshamoodá' ma'aá adór yaae giri baraá afkós wa waá/ alaá /ameenidá' wa ale, as yaaeedá' /ameeni ngiwa hayot.

¹⁶ /Ameenidá' kari alee/iís nee yaamu. Yaamu afa nguri awaatliyé', yaaeedá' ngiri gu/iyé', tidá' dayshamo aa baraá afkós wa waá/.

¹⁷ Dayshamoodá' /ameenidá' gari i buúhh, iri slaqwarár áy dír xwaylár /ameenidá', tidá' aa met. Inooín a mukdá' hara'ayár Mungú gaa oh, nee a mukduú lamabu'úngw Yesu gu koóm.

¹⁸ Dayshamoodá' iri sihhiít gawaá hhasángw afaá tlawi.